قاراعاندى مەملەكەتتىك مەديتسينالىق ۋنيۆەرسيتەتىنىڭ تۇلەكتەرى ءۇشتاراپتى كەلىسىمشارت نەگىزىندە وزدەرىنىڭ بولاشاق جۇمىس ورىندارىندا ينتەرناتۋرادان وتەدى.
وقۋدى بىتىرمەي تۇرىپ, جۇمىسقا ورنالاسۋدىڭ مۇنداي مۇمكىندىگى – مەملەكەتتىك جانە الەۋمەتتىك تاپسىرىس نەگىزىندە حيرۋرگتاردى, اكۋشەر-گينەكولوگتاردى, تەراپەۆتەردى, جالپى تاجىريبە دارىگەرلەرى مەن پەدياترلاردى ماقساتتى دايارلاۋ بويىنشا ۋنيۆەرسيتەتتىڭ جوسپارلى جۇمىسىنىڭ ناتيجەسى. قازاقستان دارىگەر كادرلارمەن قامتاماسىز ەتۋ دەڭگەيى بويىنشا الەمدە 10-ورىن الادى. الايدا, بۇل رەتتە ەلىمىزدە باستاپقى بۋىنداعى جانە تار بەيىندەگى كاسىبي ماماندار تاپشىلىعى ءالى دە ساقتالۋدا. قاراعاندى مەملەكەتتىك مەديتسينالىق ۋنيۆەرسيتەتىندە جوعارى بىلىكتى كادرلار دايارلاۋدىڭ ستراتەگيالىق مىندەتتەرىنىڭ ءبىرى – تۇلەكتەردى مىندەتتى تۇردە جۇمىسقا ورنالاستىرۋ.
ۋنيۆەرسيتەتتىڭ كلينيكالىق دايارلىق جانە تۇلەكتەردى جۇمىسقا ورنالاستىرۋ ءبولىمى جاس ماماندارعا دەگەن سۇرانىستى تالداۋدى جۇزەگە اسىرادى, ولاردى ءبولۋدى ۇيىمداستىرىپ, جۇمىسقا ورنالاسۋلارىنا, سول سياقتى كاسىبي تۇرعىدان وسۋلەرىنە مونيتورينگ جۇرگىزەدى. مۇنداي جۇمىس جۇيەلى تۇردە ىسكە اسىرىلادى. ۋنيۆەرسيتەت سايتىندا تۇلەكتەر سانىن جانە ولاردىڭ ماماندىقتارىن كورسەتۋ جونىندەگى مالىمەتتەر بانكى تۇراقتى تولىقتىرىلىپ تۇرادى.
ەكىنشى جاعىنان, سايتتا بوس ورىندار تۋرالى اقپارات بەرىلەدى, ول ەڭبەك نارىعىن كۇن سايىن مونيتورينگتەۋ نەگىزىندە جۇزەگە اسادى. مىسالى, جۇمىس بەرۋشى ماماندىقتار بويىنشا تۇلەكتەر سانى تۋرالى مالىمەتتەردى عانا ەمەس, سونىمەن بىرگە, ولاردىڭ قايدا تۇراتىنى, قانشاسى اۋىلدىق كۆوتا بويىنشا وقيتىنى تۋرالى دا مالىمەت الادى. ال تۇلەكتەر ءوز كەزەگىندە وزدەرىنىڭ ديپلومدى مامان رەتىندە قاي جەرگە كەرەك ەكەندەرىن ناقتىلايدى. ناتيجەسىندە مۇنىڭ بارلىعى جۇمىس بەرۋشىگە بولاشاق ماماننىڭ وقۋ مەرزىمىن ەسكەرە وتىرىپ, ينتەرناتۋرانىڭ, رەزيدەنتۋرانىڭ قىزىقتىراتىن باعىتتارى بويىنشا وتىنىمدەر جاساقتاۋعا مۇمكىندىك بەرەدى. تۇلەكتەرمەن جانە جۇمىس بەرۋشىلەرمەن مۇنداي جۇمىس قۇرىلىمى مەديتسينالىق ۇيىمداردىڭ جۇمىسى مەن تۇتاستاي رەسپۋبليكا بويىنشا دەنساۋلىق ساقتاۋ سالاسىن دامىتۋدى ستراتەگيالىق جوسپارلاۋدى قامتاماسىز ەتەدى.
ماقساتتى جۇمىسقا ورنالاستىرۋ باعدارلاماسىن ىسكە اسىرۋدا جۇمىس بەرۋشىلەر مەن تۇلەكتەردىڭ اراسىنداعى تىكەلەي بايلانىس ەڭ ماڭىزدى بۋىن جانە سولاي بولىپ قالا بەرەدى. سول سەبەپتەن دە ۋنيۆەرسيتەتتىڭ جىل سايىن وتكىزىپ تۇراتىن «بوس ورىندار جارمەڭكەسى» – وتە ماڭىزدى ءىس-شارانىڭ ءبىرى. بيىلعى جىلى وعان وبلىستىق جانە قالالىق دەنساۋلىق ساقتاۋ باسقارمالارىنىڭ, قالالىق, اۋداندىق اكىمدىكتەردىڭ, مەديتسينالىق ۇيىمدار مەن بيزنەس-قۇرىلىمداردىڭ 130-دان استام وكىلى قاتىستى. جۇمىس بەرۋشىلەردىڭ گەوگرافياسى ەلىمىزدىڭ بارلىق وبلىستارىن قامتيدى. بيىلعى جىلى ءبىزدىڭ ماماندارىمىزعا مۇقتاج ۇيىمدار 2243 ءوتىنىم بەردى. سولاي بولعانىمەن 2014 جىلى ماماندىقتار بويىنشا تۇلەكتەر سانى مىناداي: «جالپى مەديتسينا» – 335, «ستوماتولوگيا» – 39. ەگەر بۇرىن 1 تۇلەككە 6 بوس ورىننان كەلسە, بۇگىندە بۇل كورسەتكىش قىسقاردى جانە 4 بوس ورىندى قۇرايدى. بۇل مەملەكەت دامۋىنىڭ وڭ ديناميكاسىن كورسەتەدى, سەبەبى, دارىگەر كادرلارعا دەگەن تاپشىلىق ازايىپ كەلەدى.
جۇمىس بەرۋشىلەر ستۋدەنتتەرگە وزدەرىنىڭ بولاشاق جۇمىس ورىندارى مەن جاسالاتىن جاعدايلار تۋرالى تولىق اقپارات بەرەدى. مىسالى, بولاشاق مامان-مەديكتەر وزدەرىن كۇتىپ تۇرعان جۇمىس ورنى تۋرالى دەرەكتەرمەن قاتار قانداي الەۋمەتتىك كەپىلدىكتەر بەرىلەتىنىن, تۇرعىن ءۇي الۋ, كوتەرمە سىياقى كولەمى, بالالارىن بالاباقشاعا, جارلارىن جۇمىسقا ورنالاستىرۋ جايىندا دا جان-جاقتى مالىمەتتەر الا الادى. سول سياقتى ينتەرناتۋرا مەن رەزيدەنتۋرادا ماماندانۋدىڭ بەلگىلى ءبىر باعىتتارى بويىنشا وقۋدى قارجىلاندىرۋ مۇمكىندىگى دە تىكەلەي تالقىلانادى. بىلايشا ايتقاندا, مۇددەلى تاراپتاردىڭ بولاشاق كەلىسىمشارت پەن جۇمىس جاعدايىنىڭ بارلىق قىر-سىرىن تالقىلاۋلارىنا مۇمكىندىكتەرى بار. جۇمىس بەرۋشىلەرگە دە جوعارى وقۋ ورنىنداعى ءبىلىم بەرۋ ۇدەرىسى, تۇلەكتەردىڭ تاڭداعان ماماندىقتارى تۋرالى تولىق اقپارات بەرىلەدى. ارىپتەستىكتى وسىلاي ۇيىمداستىرۋ جۇمىس بەرۋشىلەر ءۇشىن دە وتە تارتىمدى ەكەندىگى انىق.
ۋنيۆەرسيتەتىمىزدىڭ بيىلعى تۇلەگى ۆاديم سۋۆوروۆ اۋىلدىق جەردە جۇمىس ىستەمەكشى. ۆاديم سولتۇستىك قازاقستان وبلىسىنداعى قىزىلجار اۋدانىنىڭ بەسكول اۋىلىندا حيرۋرگ بولىپ قىزمەت اتقارماق. جۇمىس بەرۋشىلەردىڭ جاس مامانعا جاسايتىن جاعدايلارى ونى تولىق قاناعاتتاندىرادى. وعان تۇرعىن ۇيگە پايىزسىز نەسيە, سول سياقتى 70 ايلىق ەسەپتى كورسەتكىش كولەمىندە كوتەرمە سىياقى بەرىلەدى. بيىل وقۋ بىتىرەتىندەردىڭ اراسىنان 210 تۇلەك اۋىلدىق جەرلەردە جۇمىس ىستەۋگە ىنتا ءبىلدىرىپ وتىر.
الايدا, قالادا دا ماماندار جەتىسپەۋى بايقالادى. ءتىپتى, بۇل جاعىنان اۋىلدىق جەرلەرمەن سالىستىرعاندا كورسەتكىش ءۇش ەسە جوعارى. مىسالى, جەزقازعان قالالىق ورتالىق اۋرۋحاناسى ديرەكتورىنىڭ ورىنباسارى عابيدەن احانوۆ قازىرگى ۋاقىتتا وزدەرىنىڭ كلينيكاسىنا التى مامان جەتىسپەيتىنىن ايتادى. اۋرۋحانا باسشىلىعى كادرلار تاپشىلىعىن قاراعاندى مەملەكەتتىك مەديتسينالىق ۋنيۆەرسيتەتىنىڭ تۇلەكتەرى ەسەبىنەن شەشۋگە ۇيعارىپ وتىر. ەلىمىزدە بولاشاق بىلىكتى مامان دارىگەرلەر دايارلاپ شىعارۋدا بۇل وقۋ ورداسىنىڭ بەدەلى جوعارى ەكەنى بارشاعا بەلگىلى. ع. احانوۆ جاس ماماندارعا اۋرۋحانا باسشىلىعى قالا اكىمدىگىمەن بىرلەسە كومەك كورسەتەتىنىن جەتكىزدى. اتاپ ايتقاندا, جەرگىلىكتى بيلىك كوتەرمە سىياقى تولەيدى, ال كلينيكا جالدايتىن نەمەسە قىزمەتتىك پاتەر بەرەدى.
جالپى العاندا, رەسپۋبليكادا دارىگەر كارلاردىڭ تاپشىلىعىن بىرتىندەپ تولتىرۋدىڭ ناقتى وڭ ديناميكاسى بايقالادى. تۇلەكتەردىڭ 60 پايىزعا جۋىعى باستاپقى مەديتسينالىق-سانيتارلىق كومەك ۇيىمدارىنا, اۋىلدىق ەمحانالار مەن اۋرۋحانالارعا جۇمىسقا بارادى.
جۇمىسقا ورنالاسۋدىڭ كەپىلدىگى – جاستار ءۇشىن ماڭىزدى الەۋمەتتىك باسىمدىقتاردىڭ ءبىرى. ەلىمىزدىڭ اۋىلدارى مەن قالالارىنا ادال دا ارلى ينتەرندەر قىزمەت اتقارۋعا بارا جاتىر. ولار وزدەرى ۋنيۆەرسيتەت قابىرعاسىندا بەرگەن گيپپوكرات انتىنا ادال كاسىبي ماماندارعا اينالادى. ءبىزدىڭ بۇعان سەنىمىمىز مول.
باقىت كوشەروۆا,
قاراعاندى مەملەكەتتىك ۋنيۆەرسيتەتىنىڭ پرورەكتورى,
مەديتسينا عىلىمدارىنىڭ دوكتورى.