قر ۇلتتىق وليمپيادا كوميتەتىنىڭ باس حاتشىسى اندرەي كريۋكوۆ 4-22 اقپان ارالىعىندا بەيجىڭدە وتكەن قىسقى وليمپيادا ويىندارىن قورىتىندىلادى, دەپ حابارلايدى Egemen.kz.
«ەڭ ۇزدىك سپورتتىق ناتيجەگە شورت-ترەك كومانداسى جەتتى. وسى شورت-ترەكتەگى ويىنداردا ەڭ ۇزدىك ناتيجەنى 500 مەتر قاشىقتىقتا ءتورتىنشى ورىن العان ابزال اجعاليەۆ كورسەتتى. سونىمەن قاتار, شورت-ترەك سپورتشىلارى ارالاس ەستافەتادا بەسىنشى ورىنعا يە بولدى. فينالعا قازاقستاندىق جاس شورت-ترەكيست ءادىل عالياحمەتوۆ شىقتى, ول شەبەرلىك دەڭگەيى بويىنشا كوپتەگەن تاجىريبەلى قارسىلاستارىنان باسىم ءتۇستى. ال يۋليا گالىشەۆا موگۋل بويىنشا جارىستا جەتىنشى بولدى, فينالعا 11-ورىن العان اقمارجان قالمىرزاەۆا شىعا الدى», دەدى اندرەي كريۋكوۆ وكق-دا وتكەن ءباسپاسوز كونفەرەنتسياسى بارىسىندا.
22 اقپاندا بەيجىڭ-2022 قىسقى وليمپيادا ويىندارى اياقتالدى. ءدۇبىرلى دوداعا قازاقستان نامىسىن 34 سپورتشى قورعاۋعا اتتانعان بولاتىن. قىسقى وليمپيادا ءۇش كلاستەردە ءوتتى – پەكين, چجانتسزياكوۋ جانە يانتسين.
قازاقستاندىق سپورتشىلار كەلەسى سپورت تۇرلەرىندە ونەر كورسەتتى:
شاڭعى جارىسى; بياتلون; فريستايل-موگۋل; فريستايل-اكروباتيكا; شورت-ترەك; كونكيمەن جۇگىرۋ سپورتى; تاۋ شاڭعىسى; شاڭعى قوسسايىسى; شاڭعىمەن ترامپليننەن سەكىرۋ.