اقتوبە وبلىستىق دراما تەاترىندا اقىن سۆەتقالي نۇرجاننىڭ اۆتورلىعىمەن جازىلعان «ەر ەدىگە» تاريحي دراماسىنىڭ العاشقى قويىلىمى بولدى. رەجيسسەرى – دانيار بازارقۇلوۆ. كۇللى دەشتى قىپشاق دالاسىنا ورتاق باتىرعا ارنالعان ەتنو-فولكلورلىق تاريحي دراما التىن وردانىڭ 750 جىلدىعىنا ارنالعان.
سپەكتاكلدە ەدىگە باتىر زامانىنىڭ تۇتاس ءداۋىرى ەمەس, توقتامىس حاننىڭ ورداسىنداعى تاق تالاسىنداعى شيەلەنىستى وقيعالار كەيىپكەرلەردىڭ باستى ءىس-ارەكەتى ارقىلى قامتىلعان. وقيعا توقتامىستىڭ حان ورداسىندا ءوربيدى.
«توعايبەك حانىم, توقتامىستىڭ ايەلى دالانىڭ ەكى كوكجالى توقتامىس حان مەن ەدىگەنىڭ اراسىن شيەلەنىستىرىپ, ولاردى ءبىر-بىرىنە دۇشپانعا اينالدىرادى. سونداي-اق سپەكتاكلدە ءامىر تەمىر مەن ەدىگەنىڭ قارىم-قاتىناسىنا قاتىستى ەپيزودتار بار», دەدى رەجيسسەر دانيار بازارقۇلوۆ. قويىلىمداعى تاريحي وقيعالار ەدىگە باتىردىڭ قاھارماندىق ەرلىگى جىرلارىمەن اسەمدەلە تۇسكەن.
پرەمەراعا «ەر ەدىگە» تاريحي دراماسىنىڭ اۆتورى سۆەتقالي نۇرجان باستاعان ماڭعىستاۋ, باتىس قازاقستان وبلىستارىنان ءبىراز قوناق كەلدى. ءبىر جارىم ساعاتقا سوزىلعان سپەكتاكلدەن سوڭ وبلىس اكىمى وڭداسىن ورازالين كورەرمەندەرگە «ايتۋلى وقيعانىڭ كۋاسى بولعان كورەرمەندەرگە قويىلىمنىڭ وقيعا جەلىسى ۇرپاقتارىنىڭ تاريحي جادىمىزدى وياتاتىنىن» ايتا كەلىپ, ەدىگەنىڭ تاريحتاعى ورنى مەن ماڭىزى ءالى كۇنگە دەيىن تولىق زەرتتەلمەگەنىنە نازار اۋداردى. «سوڭعى جىلدارى اقتوبە وبلىسىندا ۇلى باتىردىڭ ەسىمىن جاڭعىرتۋ جانە ەستە ساقتاۋ باعىتىندا اۋقىمدى جۇمىستار اتقارىلدى, ياعني حالىقارالىق عىلىمي-تاجىريبەلىك كونفەرەنتسيالار وتكىزىلىپ, ەسكەرتكىش ورناتىلدى, «ەر ەدىگە – نوعايلى ءداۋىرىنىڭ جىرى» اتتى البوم جيناعى تانىستىرىلدى. الداعى ۋاقىتتا دا ەل ىشىندە جينالماي جاتقان باي مادەني مۇرامىزدى جيناقتاۋ جانە بىرىزدەندىرۋ بويىنشا اۋقىمدى جۇمىستار جالعاسا بەرەدى», دەپ اتاپ ءوتتى.
اقتوبە وبلىسى