اقمولا وبلىسىندا جۇمىسسىزدىق دەڭگەيىن تومەندەتۋ جانە حالىقتىڭ تابىسىن ارتتىرۋ ءۇشىن 2022-2025 جىلدارعا ارنالعان جۇمىس ورىندارىن قۇرۋدىڭ وڭىرلىك كارتاسى بەكىتىلدى, دەپ حابارلايدى Egemen.kz.
جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ اقپاراتى بويىنشا, ۇلتتىق جوبالار مەن ءوڭىردى دامىتۋ جوسپارى اياسىندا 10 مىڭنان استام, ونىڭ ىشىندە 2,4 مىڭعا جۋىق تۇراقتى جۇمىس ورنىن قۇرۋ جوسپارلانۋدا.
«قۇجاتتىڭ باستى مىندەتتەرىنىڭ ءبىرى جۇمىس ورىندارىن قۇرۋ عانا ەمەس, سونىمەن قاتار مەملەكەتتىك باقىلاۋدىڭ تيىمدىلىگىن ارتتىرۋدى ساقتاۋ بولىپ تابىلادى. بۇگىندە قىزمەتكەرلەردىڭ ءومىرى مەن دەنساۋلىعىن ساقتاۋ, قاۋىپسىز ەڭبەك جاعدايلارىن قامتاماسىز ەتۋ باسىم باعىت بولىپ تابىلادى. بيىل اقمولا وبلىسىندا جەكە باستامالاردى ەسكەرە وتىرىپ, 17649 ورىن قۇرۋ قاجەت», دەپ اتاپ ءوتتى ۆەدومستۆونىڭ ءباسپاسوز قىزمەتى.
ەڭبەك نارىعىنىڭ ناقتى كورىنىسىن كورسەتۋگە مۇمكىندىك بەرەتىن جاڭا جوبا بويىنشا بارلىق دەرەكتەر «جۇمىس ورىندارىن قۇرۋدىڭ ينتەگراتسيالىق كارتاسى» اقپاراتتىق جۇيەسىندە جيناقتالعان.
اتالعان اقپاراتتىق جۇيە جيىنتىق نىساندار مەن ەسەپتىلىكتى ازىرلەۋ مۇمكىندىگىمەن وڭىرلەر بولىنىسىندە اۋىلدىق ەلدى مەكەندەرگە, مەملەكەتتىك باعدارلامالارعا, شاعىن جانە ورتا بيزنەسكە, جوبالارعا, كاسىپورىندارعا, ەكونوميكا سالالارىنا مونيتورينگ جۇرگىزۋدى جۇزەگە اسىرادى.
سونداي-اق, وڭىرلىك كارتا تىلەك بىلدىرۋشىلەرگە قايتا ماماندانۋعا جانە ەڭبەك قىزمەتىنىڭ جاڭا سالالارىن يگەرۋگە دە مۇمكىندىك بەرەدى. ول ءۇشىن «2021-2025 جىلدارعا ارنالعان كاسىپكەرلىكتى دامىتۋ» ۇلتتىق جوباسى شەڭبەرىندە «باستاۋ بيزنەس» جوباسى بويىنشا قىسقا مەرزىمدى كاسىپتىك وقىتۋمەن جانە كاسىپكەرلىك نەگىزدەرىنە وقىتۋمەن 1844 ادامدى قامتۋ جوسپارلانۋدا.
جالپى, ءوڭىر بويىنشا 596,7 ملن تەڭگەگە 487 مەملەكەتتىك گرانت ءبولىندى. جۇمىسپەن قامتۋدىڭ بەلسەندى شارالارىمەن 2101 ادام قامتىلاتىن بولادى.