بارشامىزعا ءمالىم, 1989 جىلعى 15 اقپاندا كەڭەس اسكەرىن اۋعانستان اۋماعىنان تولىق شىعارۋ ءىسى اياقتالدى. ون جىلعا سوزىلعان قيان-كەسكى سوعىسقا كەڭەس وداعىنان 620 مىڭعا جۋىق سارباز, ونىڭ ىشىندە قازاقستاندىق 22 269 جاۋىنگەر قاتىستى. سودان بەرى بۇل كۇن اۋعان سوعىسىنىڭ ءار جاۋىنگەرى مەن وفيتسەرىن ەسكە الۋ كۇنى بولىپ كەلەدى.
وسىعان بايلانىستى, كوكشەتاۋ قالاسىنىڭ اسكەري-تەحنيكالىق مەكتەبىندە اۋعانستانداعى سوعىس ارداگەرلەرىمەن كەزدەسۋ ءوتتى. ءىس-شارانى اقمولا وبلىستىق جاستار-رەسۋرستىق ورتالىعى ۇيىمداستىردى. كەزدەسۋ جاستاردىڭ وتانعا دەگەن پاتريوتتىق سەزىمىن ارتتىرۋ جانە ارداگەرلەرگە دەگەن قۇرمەت سەزىمىن قالىپتاستىرۋ ماقساتىندا وتكىزىلدى. سونداي-اق كەزدەسۋ بارىسىندا اسكەري-تەحنيكالىق مەكتەپ بويىنشا ەكسكۋرسيا وتكىزىلدى.
ءىس-شارا كەڭەس اسكەرلەرىنىڭ اۋعانستاننان تولىق شىعارىلعان كۇنىنىڭ قارساڭىندا ۇيىمداستىرىلدى. اقمولا وبلىسى «اۋعان سوعىسىنىڭ مۇگەدەكتەرى مەن ارداگەرلەرى» قب توراعاسى دۋانباي قازىباي ۇلى كىرىسپە ءسوز سويلەدى. كەزدەسۋگە ارنايى شاقىرىلعاندار جاقسىلىق نۇرماحامبەت ۇلى مەن دۋانباي قازىباي ۇلى ءوز ومىرلەرىندە وتكەن سۇراپىل سوعىس تۋرالى ايتىپ بەردى.
باسقوسۋ اشىق فورماتتا ءوتىپ, ءاربىر قاتىسۋشى سوعىس تۋرالى سۇراقتار قويدى. ستۋدەنتتەر اسكەري بورىشىن وتەگەن جاۋىنگەرلەردىڭ ەرلىگى مەن باتىلدىعى تۋرالى كوپتەگەن ماعلۇماتتى بويىنا ءسىڭىرىپ, وسىنداي باتىر اعالارىمىزدىڭ ءوز اۋزىنان ايتقان اڭگىمەلەرىن تىڭداعاندارىنا ريزاشىلىقتارىن ءبىلدىردى.
جيىندا اسكەري حرونيكا كادرلارى كورسەتىلىپ, ساحنادان اۋعان سوعىسىنا بايلانىستى تۋعان اندەر شىرقالدى. سونداي-اق قاتىسۋشىلار اۋعانستاندا بولعان بارلىق جەرگىلىكتى سوعىستار مەن قاقتىعىستاردا قازا تاپقانداردى ءبىر مينۋت ۇنسىزدىكپەن ەسكە الدى.
«اۋعان سوعىسىنىڭ باتىرلارىن ۇمىتۋعا قۇقىعىمىز جوق. ولار – بارلىعىمىزعا, اسىرەسە جاستارىمىزعا ۇلگى, وتانعا دەگەن بورىشىن وتەۋ اسا ماڭىزدى ەكەنىن كورسەتە ءبىلدى. ولاردى وتاندى شىن ءسۇيۋدىڭ ۇلگىسى دەپ تانيمىز», دەدى وبلىستىق جرو باسشىسى ءمانسيا ەسەكەەۆا.
ءىس-شارا سوڭىندا «اۋعان سوعىسىنىڭ مۇگەدەكتەرى مەن ارداگەرلەرى» قب توراعاسى وبلىستىڭ بارلىق جاستارى اتىنان العىس حاتپەن ماراپاتتالدى.