بەيجىڭ قالاسىندا ءوتىپ جاتقان قىسقى وليمپيادا ويىندارىندا كونكيمەن جۇگىرۋدەن ەل نامىسىن قورعاعان دەنيس كۋزين سپورتپەن ءبىرجولا قوشتاساتىندىعىن ايتتى, دەپ حابارلايدى Egemen.kz.
ول بۇگىن بەيجىڭ وليمپياداسىندا 1000 مەترگە جۇگىرۋدەن سىنعا تۇسكەن بولاتىن. الايدا جۇلدەلى ورىندارعا قول جەتكىزە المادى. جارىستان كەيىن تىلشىلەرگە سۇحبات بەرگەن ول:
«جارىسقا قاتىستى ەشقانداي پىكىر ايتا المايمىن. تەك قازاقستان حالقىنان دوستارىم مەن تانىستارىمنان, بۇگىن ماعان جانكۇيەر بولعان جانداردان كەشىرىم سۇرايمىن. بۇگىنگى جارىستا نە بولعانىن, نەلىكتەن مۇنداي ناتيجە كورسەتكەنىمدى بىلمەيمىن. ەشتەڭەمەن اقتالا المايمىن. تەك وتە ناشار ونەر كورسەتكەنىمدى بىلەمىن. اسىرەسە, ءوز مانسابىمداعى ەڭ سوڭعى باسەكەدە. نەگىزى, قىسقا قاشىقتىقتار بويىنشا وتەتىن الەم بىرىنشىلىگىندە اياقتاسام دەپ ويلاعانمىن. بىراق ءوزىمنىڭ بۇگىنگى ناتيجەمنەن سوڭ سپورتتاعى عۇمىرىما نۇكتە قويامىن دەپ شەشتىم», دەدى كۋزين باق وكىلدەرىنە.
ايتا كەتەيىك, كۋزين 2013 جىلى وسى سپورت تۇرىنەن الەم چەمپيونى اتانعان بولاتىن. بۇل ونىڭ سپورتتىق مانسابىنداعى قاتىسىپ وتىرعان ءتورتىنشى وليمپيادا ويىندارى.