گەرمانيا فەدەراتيۆتى رەسپۋبليكاسىنىڭ پرەزيدەنتى بولىپ فرانك-ۆالتەر شتاينمايەر بەس جىلعا قايتا سايلاندى.
فەدەرالدى جينالىس مۇشەلەرىنىڭ باسىم بولىگى ونىڭ كانديداتۋراسىن قولداپ داۋىس بەردى. بەرىلگەن جانە جارامدى دەپ تانىلعان 1 425 داۋىستىڭ ىشىندە 1 045 ادام قازىرگى پرەزيدەنتتى قولداعان. فەدەرالدى جينالىس تەك قانا پرەزيدەنتتى سايلاۋ ءۇشىن بەس جىلدا ءبىر مارتە جينالادى. ونىڭ جارتىسى – بۋندەستاگ دەپۋتاتتارى بولسا, قالعان جارتىسى 16 لاندتاگ – جەر پارلامەنتىنەن جولدانعان سايلاۋشىلاردان تۇرادى. ولار جەرگىلىكتى دەپۋتاتتار, ساياساتكەرلەر, قوعام قايراتكەرلەرى, سونداي-اق سپورت, ونەر سالاسىنداعى تانىمال ادامدار دا بولۋى مۇمكىن.
جينالىستىڭ 86 مۇشەسى داۋىس بەرۋدەن قالىس قالعان, 294 ادام باسقا ۇمىتكەرلەردى تاڭداعان. 66 جاستاعى ف-ۆ.شتاينمايەر سايلاۋدىڭ ءبىرىنشى كەزەڭىندە جەڭىسكە جەتتى. ونى ەلدەگى بۇكىل بەدەلدى, ساياسي سالماعى بار ءىرى پارتيالار قولدادى. بيىل فەدەرالدى جينالىستىڭ جۇمىسىنا 1 472 ادام قاتىستى.
فرانك-ۆالتەر شتاينمايەردەن بولەك بۇل سايلاۋدا تاعى ءۇش كانديدات باق سىنادى: مايندتىق دارىگەر گەرحارد ترابەرت, ول 96 داۋىس جينادى, 140 داۋىس جيناعان ەكونوميست ماكس وتتە جانە استروفيزيك شتەفاني گەباۋەر (Stefanie Gebauer), وعان 58 داۋىس بەرىلدى.
2017 جىلى ناۋرىزدا فرگ پرەزيدەنتى بولىپ سايلانعان فرانك-ۆالتەر شتاينمايەر ەكىنشى مەرزىم ەل باسقارادى.