جىل باسىنان بەرى الەۋمەتتىك قىزمەتتەر پورتالى ارقىلى شامامەن 15,5 مىڭ مۇگەدەك ادام وڭالتۋدىڭ تەحنيكالىق قۇرالدارىن, 1,3 مىڭى – ىمداۋ ءتىلى قىزمەتىن, 2,8 مىڭى – جەكە كومەكشىنىڭ قىزمەتىن الدى, دەپ حابارلايدى Egemen.kz.
سونداي-اق, پورتال ارقىلى كەپىلدەندىرىلگەن الەۋمەتتىك توپتامالارعا 234 تاپسىرىس راسىمدەلدى.
ەڭبەك جانە حالىقتى الەۋمەتتىك قورعاۋ مينيسترلىگىندە حابارلاعانداي, پورتال ەرەكشە قاجەتتىلىكتەرى بار ادامدارعا وڭالتۋدىڭ تەحنيكالىق قۇرالدارى مەن قىزمەتتەرىن ءوندىرۋشى مەن جەتكىزۋشىنى ءوز بەتىنشە تاڭداۋعا مۇمكىندىك بەرەدى.
«كومەك تۇرىنە تاپسىرىس بەرۋ ءوتىنىش بەرۋشىنىڭ ەلەكتروندىق تسيفرلىق قولتاڭباسىمەن راستاۋ ارقىلى جۇزەگە اسىرىلادى. تاپسىرىس بەرىلگەن وتق-نى جەتكىزۋ نەمەسە وزدىگىنەن الىپ كەتۋ ارقىلى الۋعا بولادى. مۇگەدەك ادامداردى وڭالتۋ قۇرالدارىمەن قامتاماسىز ەتۋ پروتەزدىك-ورتوپەديالىق, سۋردوتەحنيكالىق, تيفلوتەحنيكالىق جانە گيگيەنالىق قۇرالداردى, سونداي-اق كرەسلو-اربالار بەرۋدى قامتيدى», دەلىنگەن ۆەدومستۆو حابارلاماسىندا.
ۆەدومستۆونىڭ مالىمەتىنشە, پورتالدا ارناۋلى الەۋمەتتىك قىزمەت كورسەتەتىن 799 مەديتسينالىق-الەۋمەتتىك مەكەمە بار, 157 وتق جەتكىزۋشىسى, 16 مىڭنان استام جەكە كومەكشى قىزمەتىن, 289 ىمداۋ ءتىلىن, 83 ساناتوري-كۋرورتتىق ەمدەۋدى جەتكىزۋشى جانە 135 شوك جەتكىزۋشىسى تىركەلگەن.
«الەۋمەتتىك قىزمەتتەر پورتالى» اۆتوماتتاندىرىلعان اقپاراتتىق جۇيەسىن ەنگىزۋ مۇگەدەك ادامداردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى ۇلتتىق جوسپار شەڭبەرىندە كوزدەلگەن.