اۆستراليالىق ارالاس جەكپە-جەك شەبەرى روبەرت ۋيتتاكەر ورتا سالماقتاعى UFC چەمپيونى يسراەل ادەسانيامەن وكتاگوندا ءۇشىنشى رەت كەزدەسەتىنىنە سەنىمدى, دەپ حابارلايدى Egemen.kz championat.com-عا سىلتەمە جاساپ.
«تۋراسىن ايتساق, ەكەۋمىزدىڭ ارامىزدا ءۇشىنشى جەكپە-جەك وتەتىنىنە بەك سەنىمدىمىن. ويتكەنى الداعى ۋاقىتتا ماعان قارسى شىققان قارسىلاستاردىڭ بارلىعىن قايتادان جەڭەتىن بولامىن. مۇنى ادەسانيا جاقسى بىلەدى. سوندىقتان دا ول: «بولاشاقتا ءالى جولىعامىز» دەدى. ءوز باسىم ونىڭ جاقىن ارادا چەمپيوندىق بەلبەۋدى ۋىسىنان سۋسىتىپ المايتىندىعىنا سەنگىم كەلەدى. سەبەبى ول وتە مىقتى سپورتشى. ادەسانيانى ورتا سالماقتا مەن عانا جەڭە الامىن», دەدى ول.
ەستەرىڭىزگە سالا كەتەيىك, ەكى سپورتشى اراسىندا وتكەن ەكىنشى جەكپە-جەكتە تورەشىلەر جەڭىسكە ادەسانيا لايىقتى دەپ تاپقان بولاتىن. الايدا بەس راۋند بويى شابۋىلداعان اۆستراليالىق سپورتشىنى جەڭدى دەگەن ماماندار دا تابىلدى. ولار تورەشىلەردىڭ شەشىمىن تۇسىنبەگەندەرىن ايتقان ەدى.