وتباسىلىق جاعدايىنا بايلانىستى مەكتەپتە ساباق بەرۋگە مۇمكىندىگى بولماعان الماتى وبلىسىنىڭ تۇرعىنى گۇلبانۋ جاسىباەۆا اۋىلدىق باستامالارعا ارنالعان شاعىن گرانت ەسەبىنەن اتەلە اشىپ, ەكى اۋىل تۇرعىنىن جۇمىسپەن قامتىپ وتىر, دەپ جازادى Egemen.kz.
«بەرەكەلى ايەل» جوباسى تۋرالى ەستىگەن گۇلبانۋ جاسىباەۆا كاسىپكەرلىك سالاسىنداعى قىر-سىردى مەڭگەرىپ, دامۋعا بەل بايلاعان.
ناتيجەسىندە جوبا اياسىندا بيزنەس-جوسپار قۇرۋدى ۇيرەنىپ, كاسىپكەرلەرگە بولىنەتىن شاعىن گرانتتاردان حاباردار بولادى.
جاستايىنان قولونەر بۇيىمدارىن جاساۋعا بەيىم گۇلبانۋ وسى قابىلەتىن كاسىپكە اينالدىرىپ, اۋىلداستارىمەن بىرگە كورپە جابدىقتارىن, سۇلگى سەكىلدى بۇيىمداردى تىگىپ كاسىبىن باستاعان.
ازاماتتىق باستامالاردى قولداۋ ورتالىعى ۇسىناتىن شاعىن گرانتتار كونكۋرسىندا دا جەڭىمپاز اتانىپ, ءۇي جانىنان اتەلە اشىپ, ەكى شەبەر قىز-كەلىنشەكتى جۇمىسپەن قامتىپ وتقان ول اۋىلداستارىنان كەڭەسىن ايامايدى.
«دوستىق اۋىلى تۇرعىندارىنىڭ WhatsApp-تا ورتاق چاتى بار. مەن اۋىلداستارىما ۇنەمى بايقاۋلارعا قاتىسۋعا, كوپتەگەن مەملەكەتتىك گرانتتارعا يە بولۋعا كەڭەس بەرەمىن. قىزىعۋشىلىق تانىتقانداردىڭ بارلىعىنا ءوتىنىمدى قالاي دۇرىس تولتىرۋ كەرەكتىگىن, نەگە نازار اۋدارۋ كەرەكتىگىن ايتامىن. دامۋ جولدارىن ىزدەۋ كەرەك, قولدى قۋسىرىپ وتىرۋدىڭ ءجونى جوق», دەيدى گۇلبانۋ جاسىباەۆا.