الەۋمەتتىك جەلىلەردە شىمكەنت قالاسىندا اعاشتاردىڭ قارىن سىلكىپ, تۇسىرۋگە بيۋدجەتتەن 600 ميلليون تەڭگە قارجى بولىنگەندىگى تۋرالى اقپارات تاراپ ءجۇر. وسىعان بايلانىستى قالا اكىمىنىڭ ورىنباسارى ە. بىلىسبەكوۆ اقپاراتتىق-كوممۋنيكاتسيالار ورتالىعىندا بريفينگ وتكىزدى, دەپ حابارلايدى Egemen.kz.
اكىم ورىنباسارى شىمكەنت قالاسىنىڭ 2022-2024 جىلدارعا ارنالعان بيۋدجەتى قازاقستان رەسپۋبليكاسىنىڭ ءتيىستى زاڭدارىندا كورسەتىلگەن تالاپتارعا سايكەس قالىپتاستىرىلاتىنىن جانە قالانىڭ جاسىل جەلەكتەرىن كۇتىپ ۇستاۋ, جاڭا اعاشتار وتىرعىزۋ, مەرزىمدىك دارىلەۋ, سۋارۋ, بۇتاۋ, اقتاۋ جانە قاردان تازارتۋ سەكىلدى بىرنەشە جۇمىستاردى قامتيتىنىن ايتتى.
سونداي-اق, وسى جۇمىستاردى اتقاراتىن ازاماتتاردىڭ ەڭبەكاقىسى, سول جۇمىسقا پايدالانىلاتىن كولىك پەن ارنايى تەحنيكانىڭ جانار-جاعار مايى مەن وزگە دە شىعىندارى كىرەتىنىن ناقتىلادى.
«شىمكەنت قالاسىنىڭ اۋماعى 116 مىڭ گەكتاردى الىپ جاتىر. قازىرگى ۋاقىتتا قالا اۋماعىندا 6 ميلليوننان استام ءتۇپ اعاش بار. بۇدان بولەك, قالا اۋماعىندا 8 ساياباق پەن 39 گۇلزار بار. ال, الەۋمەتتىك جەلىلەردە كورسەتىلگەن قاردى سىلكىپ ءتۇسىرۋ جۇمىستارى جالپى جاسىل جەلەكتى كۇتىپ ۇستاۋ جۇمىستارىنىڭ كوپتەگەن باعىتتارىنىڭ ءبىر تارماعى عانا. ياعني, مۇنداي جۇمىستار قاۋىپسىزدىك ماقساتىندا ادامدار ءجيى جۇرەتىن كوپشىلىك ورىندارداعى 66 220 ءتۇپ اعاشتا جۇرگىزىلەدى دەپ جوسپارلانىپ, قارجىلىق سمەتالىق شىعىندارى 600 ميلليون ەمەس 891,4 مىڭ تەڭگەنى قۇرايدى دەپ بەكىتىلگەن», دەدى ە. بىلىسبەكوۆ.
ونىڭ ايتۋىنشا, قىس مەزگىلىندە قار جاۋماعان جاعدايدا بۇل قارجى تولىقتاي بيۋدجەتكە كەرى قايتارىلادى.
ءسوز سوڭىندا قالا اكىمىنىڭ ورىنباسارى جەلىدە تارالعان اقپارات شىندىققا جاناسپايتىنىن ايتىپ, باق وكىلدەرىنەن رەسمي جانە شىنايى اقپاراتتى عانا تاراتۋعا شاقىردى.