ءالىپ «زەنيتتە» دوپ تەبەدى

«جاتتىقتىرۋشىلارىما قارىزدارمىن»

جالپى, ءنۇرالى ءالىپ الماتىنىڭ «قايرات» اكادەمياسىنان ءتالىم العا­نىمەن, شىن مانىندە ول اقتاۋدا دۇنيەگە كەلگەن. 2015 جىلى «قايراتتىڭ» «سكاۋتتارى» جاس فۋتبولشىنىڭ ويىنىن جوعارى باعالاپ الماتىعا شاقىردى.

– مەن 1999 جىلى اقتاۋدا دۇنيەگە كەلدىم. 2008 جىلدان باستاپ «كاسپيدىڭ» جاسوسپىرىمدەر فۋتبول كلۋبىندا ويناي باستادىم. مەنىڭ العاشقى جات­تىقتىرۋشىم – ەرجان ماقسات ۇلى جامبىروۆ. ول قاتال جانە تالاپشىل تالىمگەر بولدى. جاتتىقتىرۋشىم ماعان سەندى جانە قيىن ۋاقىتتا قولداۋ كورسەتتى. مەن بۇل كىسىگە قارىزدارمىن, – دەگەن ول «قايرات» اكادەمياسىنا قالاي قابىلدانعانىن ايتتى. – 2015 جىلدىڭ شىلدە ايىنىڭ ورتاسى بولاتىن. 1999 جىلعى تۋعان جاستاردىڭ اراسىندا جارىس ءوتتى. سول كەزدە ءبىز الماتىنىڭ «قايراتىن» 2:0 ەسەبىمەن ۇتتىق. ءبىر اپتادان كەيىن مەنى «قايرات» اكادەمياسىنا شاقىردى. سىناقتان ءساتتى ءوتىپ, ءۇش جىل اكادەميا قابىرعاسىندا وقىدىم. الماتى كلۋبىنىڭ جاسوسپىرىمدەر كومانداسىندا, ودان كەيىن ونىڭ قوسالقى قۇرامىندا ونەر كورسەتتىم. تاجىريبەلى ويىنشىلاردىڭ قولداۋىنىڭ ارقاسىندا «قايراتتىڭ» نەگىزگى قۇرامىنا دا تەز بەيىمدەلدىم.

ءنۇرالى «كاسپي» كلۋبىندا شابۋىل­شى بولدى. ال قورعانىس شەبىندە ويناۋدى تەك «قايراتقا» كەلگەننەن كەيىن ۇيرەنە باستادى. مۇنىڭ سەبەبىن سول كەزدەگى «قايرات» اكادەمياسىنىڭ جاستار جانە جاسوسپىرىمدەر فۋتبولىن دامىتۋ باعدارلاماسىنىڭ جەتەكشىسى (2016-2018 ج.ج.) دميتري گاليامين بىلاي تۇسىندىرەدى: «نەلىكتەن ءبىز ونى قور­عاۋشى ەتتىك؟ ويتكەنى ن.ءالىپ باسپەن ءتاۋىر وينايدى, تەحنيكاسى دا بار. الاڭدا ءاربىر دوپقا سوڭىنا دەيىن تالاس جۇرگىزەدى. ۇلكەن فۋتبولدا ورتالىق جارتىلاي قور­عاۋشى بولىپ ويناۋ – قيىننىڭ قيىنى. سوندىقتان فيزيكالىق كورسەتكىشتەرىنە قاراپ, قورعانىسقا اۋىستىردىق. ءبىز قاتە­لەس­پەدىك. بۇگىندە ول قازاقستانداعى ەڭ مىق­تى قورعاۋشىلاردىڭ بىرىنە اينالدى».

قازاق فۋتبولىنىڭ بولاشاعى

ءنۇرالى ءالىپ «قايرات» ساپىندا 2018 جىلى قازاقستان پرەمەر-ليگاسىنىڭ العاشقى تۋرىندا الاڭعا شىقتى. ورتالىق قورعاۋشى ەكى اپتادان كەيىن ۇلتتىق قۇراماعا شاقىرىلىپ, العاش رەت بولگاريامەن ويىندا الاڭعا شىقتى.

– «قايرات» پەن «قىزىلجار» اراسىن­داعى ويىننان كەيىن ۇلتتىق قۇرامانىڭ جاتتىقتىرۋشىلارىنىڭ ءبىرى ماعان قوڭىراۋ شالىپ, قۇراماعا شاقىرعاندا تولقى­عانىم سونشالىق, ماعان حابار­لاسقان ادامنىڭ اتىن سۇراۋدى دا ۇمىتىپ كەتىپپىن. سودان كەيىن ۇلتتىق قۇرامانىڭ ويىنشىلار تىزىمىندە ءوزىمدى كورگەندە, قاتتى قۋاندىم, – دەيدى ن.ءالىپ.

سول كەزدە ۇلتتىق قۇرامانىڭ باس باپكەرى بولعان ستانيمير ستويلوۆ مۇنىڭ فۋتبولشىعا بەرىلگەن «اۆانس» ەكەنىن ايتقان بولاتىن.

– مەن ءنۇرالى ءالىپتىڭ ءبىر عانا ويىنىن كوردىم. بىردەن شاقىرتۋ جىبەردىم. بۇل – وعان بەرىلگەن «اۆانس». ونىڭ بويىندا نەگىزگى قۇرامنىڭ فۋتبولشىسى اتانۋعا قاجەتتى قابىلەتتىڭ ءبارى بار. جالپى ءنۇرالى – قازاق فۋتبولىنىڭ بولاشاعى, – دەگەن ەدى بولگاريالىق باپكەر.

22 جاستاعى قورعاۋشى – ءتورت جىلدان بەرى «قايرات» پەن قازاقستان قۇرا­ماسىنىڭ نەگىزگى ويىنشىسى. ەل بىرىن­شى­لىگىندە توپ جارىپ, ەۋروكۋبوكتا تاجى­ريبە جيناقتاعان. ەندى ءوز كۇشىن رەسەي چەم­پيوناتىندا بايقاپ كورۋگە جاقىن تۇر.

رەسەيلىك فۋتبول ساراپشىسى دەنيس سافرونوۆ بۇقارالىق اقپارات قۇرال­دارىنا بەرگەن سۇحباتىندا ءنۇرالى ءالىپ تۋرالى جىلى پىكىر ءبىلدىردى.

– ءنۇرالى ءالىپتىڭ ويىنىنا باعا بەرۋگە ءالى ەرتەرەك. ونىڭ ۇستىنە رەسەي چەمپيوناتىنىڭ قازاقستانعا قاراعاندا دەڭگەيى جوعارى. سوندىقتان قانداي قورعاۋشىعا دا رەسەي پرەمەر-ليگاسىندا ويناۋ قيىنعا تۇسەدى. تاجىريبەسى مول راكيتسكي, لوۆرەن, جاستاردىڭ اراسىندا چيستياكوۆ جانە كرۋگوۆويمەن باسەكەلەسۋ كەرەك. دەگەنمەن ءنۇرالى وتە سالقىنقاندى. جىلدامدىعى دا بار. العى شەپكە پاس شىعارىپ, شابۋىلشىلاردى قامشىلاي بىلەدى. باسپەن دە جاقسى وينايدى, – دەدى فۋتبول مامانى.

ال فۋتبولدان قازاقستان قۇراما­سىنىڭ بۇرىنعى ويىنشىسى اندرەي كار­پوۆيچتىڭ ايتۋىنشا, قازاقستاندىق قور­عاۋشى قازىرگى كەزدە دەڭگەيى جاعىنان لوۆرەن مەن راكيتسكيدەن جوعارى تۇر­عانىن ايتادى.

– «زەنيتتىڭ» ءنۇرالىنى وقۋ-جاتتىعۋ جيىنىنا شاقىرۋى مەن ءۇشىن توسىن سىي بولعان جوق. ول – ءدال قازىرگى تاڭدا ەلىمىزدىڭ ەڭ ۇزدىك قورعاۋشىلارىنىڭ ءبىرى جانە وتە جىلدام ءارى بولاشاعىنان زور ءۇمىت كۇتتىرەتىن جاس فۋتبولشى. بىراق «زەنيتتەگى» تاجىريبەلى ويىنشىلارمەن باسەكەلەسۋ قيىنداۋ بولۋى مۇمكىن. سوعان قاراماستان, مەن وعان سەنەمىن, – دەيدى ا.كارپوۆيچ.

ونىڭ قۇنى – 5 ملن دوللار

– مىقتى كوماندالاردىڭ ماعان قىزىعۋشىلىق تانىتىپ وتىرعانى قۋانتادى. ەگەر مەن شەتەلدىك چەمپيوناتتاردا سىنعا تۇسەتىن كلۋبتاردىڭ نازارىندا بولسام, وندا مەن دۇرىس باعىتتا كەلە جاتىرمىن. ەڭ باستىسى, قول جەتكەن جەتىستىكتەرمەن توقتاپ قالماي, ءارى قاراي جۇمىستى جالعاستىرا بەرۋىم كەرەك, – دەگەن ءالىپ توپ چەمپيوناتتاردا ويناعىسى كەلەتىنىن دە جاسىرعان جوق. – بارلىق فۋتبولشى سەكىلدى مەن دە رەيتينگى جوعارى توپ-5 چەمپيوناتتا ويناعىم كەلەدى. رەسەيدە جاقسى ونەر كورسەتسەم, ەۋروپانىڭ توپ كلۋبتارىنا جول اشىلاتىنىن بىلەمىن. سول ءۇشىن ەڭبەكتەنە بەرەمىن.

جالپى, «قايراتتىڭ» باسشىسى قايرات بورانباەۆتىڭ ايتۋىنشا, نۇر­الىگە «زەنيت» 2020 جىلدان بەرى قىزىعۋشىلىق تانىتا باستاعان. بىراق بۇگىندە ونىڭ «قايراتپەن» ءۇش جىلعا كەلىسىمشارتى بار. سوندىقتان ول 5 ملن اقش دوللارىنا باعالانىپ وتىر.

«قايرات» پەن «زەنيت» اراسىنداعى ترانسفەر تۋرالى ايتۋ ءالى ەرتە بولسا دا, د.گاليامين ەكى كوماندا ءنۇرالىنى ساتىپ الۋدا ىمىراعا كەلۋى كەرەك دەپ ەسەپتەيدى.

– «قايرات» باسشىسى – جاقسى بيزنەسمەن. ءنۇرالى ءالىپ ءۇشىن باسقا توپ-كلۋبتاردىڭ قىزىعۋشىلىق تانىتىپ جاتقانىن جاقسى بىلەدى. ن.الىپتە قورعاۋشىعا ءتان قاسيەتتىڭ بارلىعى بار. سوندىقتان وعان دەڭگەيى قازاقستاننان جوعارى چەمپيوناتقا اۋىسۋ كەرەك. ەگەر دە ەكى كوماندانىڭ اراسىندا ترانسفەر بولا قالعان جاعدايدا, ولار ءبىر مامىلەگە كەلەدى دەپ ويلايمىن, – دەدى مامان.

ءنۇرالىنىڭ 10 جاسىندا اكەسىنەن, 12 جاسىندا اناسىنان ايىرىلعانىن كوپ وقىرمان بىلە بەرمەيدى. ال ول ءوزىنىڭ ەڭبەكقورلىعى مەن ماقساتكەرلىگىنىڭ ارقاسىندا وسىنداي دەڭگەيگە كوتەرىلىپ وتىر. ن.ءالىپتىڭ الار اسۋى ءالى الدا ەكەنىنە دە ۇلكەن ۇمىتپەن كوز تىگەمىز.