ەڭبەك جانە حالىقتى الەۋمەتتىك قورعاۋ مينيسترلىگى 2022 جىلعى 11 قاڭتاردا پارلامەنت ءماجىلىسىنىڭ وتىرىسىندا مەملەكەت باسشىسىنىڭ حالىققا كورسەتىلەتىن جۇمىسپەن قامتۋ شارالارىنىڭ تيىمدىلىگىن ارتتىرۋ بويىنشا بەرگەن تاپسىرمالارىن ورىندادى, دەپ حابارلادى اتالعان ۆەدومستۆونىڭ ءباسپاسوز قىزمەتى.
تاپسىرمالاردى ورىنداۋ شەڭبەرىندە بيىل 7 اقپاندا «حالىقتى جۇمىسپەن قامتۋعا جاردەمدەسۋدىڭ كەيبىر ماسەلەلەرى تۋرالى» قازاقستان رەسپۋبليكاسى دەنساۋلىق ساقتاۋ جانە الەۋمەتتىك دامۋ ءمينيسترىنىڭ 2016 جىلعى 14 ماۋسىمداعى 516 بۇيرىعىنا جانە كاسىپكەرلىك باستاماشىلىققا جاردەمدەسۋ جونىندەگى شارالاردى ۇيىمداستىرۋ جانە قارجىلاندىرۋ قاعيدالارىنا (بۇدان ءارى – قاعيدالار) وزگەرىستەر ەنگىزىلدى.
2016 جىلعى بۇيرىققا ەنگىزىلەتىن وزگەرىستەر اياسىندا جاستارعا جانە حالىقتىڭ الەۋمەتتىك وسال توپتارىنا بەرىلەتىن بيزنەستى دامىتۋعا ارنالعان گرانتتار كولەمىن 400 اەك-كە دەيىن (2022 جىلى – 1,2 ملن تەڭگە) ۇلعايتۋ كوزدەلگەن.
گرانتتار بەرۋ جاستار مەن حالىقتىڭ الەۋمەتتىك وسال توپتارىن ءوز ءىسىن اشۋ ءۇشىن باستاپقى قۇرالدارمەن قامتاماسىز ەتەدى. وسى جىلى بارلىعى 20 مىڭ ادامدى گرانتتارمەن قامتاماسىز ەتۋ جوسپارلانىپ وتىر.
قاعيدالارعا ەنگىزىلگەن وزگەرىستەرمەن جاستار پراكتيكاسىنا جانە «العاشقى جۇمىس ورنى» جوباسىنا قاتىساتىن جاس مامانداردىڭ جالاقى مولشەرىن 30 اەك-كە دەيىن ۇلعايتۋ, سونداي-اق جاستار پراكتيكاسىنا جانە «العاشقى جۇمىس ورنى» جوباسىنا قاتىسۋ مەرزىمدەرىن تيىسىنشە 12 جانە 18 ايعا دەيىن ۇلعايتۋ كوزدەلەدى.
بۇل وزگەرىستەر جاستاردىڭ العان ماماندىعى بويىنشا جۇمىس ورنىنا ءساتتى بەيىمدەلۋىنە جانە بەكىتىلۋىنە ىقپال ەتەدى.
اعىمداعى جىلى جاستار پراكتيكاسىنا كەمىندە 22 مىڭ ادامدى جىبەرۋ, سونداي-اق «العاشقى جۇمىس ورنى» جوباسىنا كەمىندە 3 مىڭ جاستىڭ قاتىسۋىن ۇيىمداستىرۋ جوسپارلانۋدا.