مەملەكەت باسشىسى قاسىم-جومارت توقاەۆ نازارباەۆ ۋنيۆەرسيتەتىنىڭ پرەزيدەنتى شيگەو كاتسۋدى قابىلدادى, دەپ حابارلايدى Egemen.kz اقورداعا سىلتەمە جاساپ.
قاسىم-جومارت توقاەۆقا نازارباەۆ ۋنيۆەرسيتەتىنىڭ قازىرگى جۇمىستارى مەن الداعى كەزەڭگە ارنالعان جوسپارى تۋرالى باياندالدى.
اڭگىمەلەسۋ بارىسىندا ءبىلىم بەرۋ جانە عىلىمي-زەرتتەۋ جۇمىستارىنىڭ پەرسپەكتيۆالارىنا, ءتۇرلى سالاداعى جاڭا تەحنولوگيالار مەن يننوۆاتسيالاردى ازىرلەۋ ماسەلەسىنە ەرەكشە نازار اۋدارىلدى.
شيگەو كاتسۋدىڭ ايتۋىنشا, ۋنيۆەرسيتەت قازاقستانداعى جوعارى ءبىلىم بەرۋ ءىسىنىڭ باسەكەگە قابىلەتتىلىگىن ارتتىرۋعا ءوز ۇلەسىن قوسۋعا دايىن. وقۋ ورنىنىڭ قىزمەتى ۇلتتىق ەكونوميكا مەن ەلىمىزدەگى الەۋمەتتىك سالانى جاڭعىرتۋعا باعىتتالعان.
مەملەكەت باسشىسى جۋىق ارادا نازارباەۆ ۋنيۆەرسيتەتىنە بارۋعا نيەتتى ەكەنىن ايتتى. پرەزيدەنت قاسىم-جومارت توقاەۆ شيگەو كاتسۋدى 70 جاسقا تولعان مەرەيتويىمەن قۇتتىقتاپ, جوعارى بىلىكتىلىگى مەن قازاقستاننىڭ ءبىلىم بەرۋ سالاسىنداعى كوپجىلعى جەمىستى ەڭبەگى ءۇشىن وعان العىس ءبىلدىردى.