سەناتور ءابدالى نۇراليەۆ ەلىمىزدىڭ پرەمەر-ءمينيسترى اتىنا جولداعان دەپۋتاتتىق ساۋالىندا شارۋالاردىڭ ناقتى ماسەلەلەرىن شەشۋگە باعىتتالعان ناقتى شارالاردى اتاپ ءوتتى, دەپ حابارلايدى Egemen.kz.
دەپۋتاتتىڭ ايتۋىنشا, وتكەن جىلى قالىپتاسقان جاعداي اۋىل شارۋاشىلىعى سالاسىنىڭ تەحنولوگيالىق تۇرعىدان ارتتا قالۋىن, تەحنيكالىق جاراقتاندىرۋدىڭ تومەن دەڭگەيىن, شارۋاشىلىق جۇرگىزۋدىڭ ەكستەنسيۆتى ادىستەرىنىڭ باسىمدىلىعىن كورسەتتى, سونىڭ ناتيجەسىندە اۋىل شارۋاشىلىعى سالاسى قازىرگى زامانعى سىن-تەگەۋرىندەرگە توتەپ بەرە المايتىندىعىن بايقاتتى.
سونداي-اق, سەناتور ەلىمىزدە مال ازىعى زووتەحنيكالىق نورمالاردان 2 ەسە از وندىرىلەتىنىن, ال قوسالقى جانە ۇساق شارۋا قوجالىقتارى مەملەكەتتىك قولداۋدان ايىرىلعانىن اتاپ ءوتتى.
«قازىرگى تاڭدا ەلىمىزدەگى 1,6 مىڭنان استام قوسالقى شارۋاشىلىقتاردا 3,5 ميلليوننان استام تابىس دەڭگەيى تومەن ازاماتتار جۇمىس ىستەيدى. ولار جىلىنا ورتا ەسەپپەن 2,5 ترلن تەڭگەنىڭ اۋىل شارۋاشىلىعى ونىمدەرىن ءوندىرىپ, ەلىمىزدىڭ ازىق-ت ۇلىك قورىن تولىقتىرۋدا ەلەۋلى ۇلەستەرىن قوسىپ كەلەدى. وكىنىشكە وراي, قوسالقى شارۋاشىلىقتار وندىرگەن ونىمدەردىڭ پايداسىن ورتادا جۇرگەن دەلدالدار كورىپ كەلەدى. ال مايدا قوجالىقتاردى مەملەكەتتىك قولداۋ مۇلدەم جوق دەپ ايتۋعا بولادى», دەدى سەناتور.
وسى ماسەلەلەردى شەشۋ ءۇشىن سەناتور ەگىس القاپتارىنىڭ قۇرىلىمىن ارتاراپتاندىرۋمەن جانە جەمشوپ, جارما, بۇرشاق جانە مايلى داقىلدار القاپتارىن كەڭەيتۋمەن اينالىساتىن شارۋاشىلىقتاردى بەلسەندى قولداۋدى ۇسىندى. كووپەراتسيانى, ونىڭ ىشىندە قوسالقى جانە ۇساق شارۋاشىلىقتاردى ىنتالاندىرۋ دا ماڭىزدى.
«اگروسەكتور سۋبەكتىلەرىنە بولىنەتىن نەسيەلەر بويىنشا پايىزدىق مولشەرلەمەلەردى 2-3% - عا دەيىن تومەندەتۋ, قوسالقى شارۋاشىلىقتار ءۇشىن كولەمى 1-2 ملن تەڭگە بولاتىن ميكروكرەديتتەر سپەكترىن كەڭەيتۋ, شارۋاشىلىق ناۋقانى كەزىندە مەملەكەتتىك قاراجاتتى جىلدام الۋ مۇمكىندىگىن قاراستىرۋ, ناقتى الىنعان ونىمگە نەمەسە قايتا وڭدەۋگە وتكىزىلگەن كولەمگە بايلانىستى سۋبسيديالاردى ءبولۋ بويىنشا ناقتى شارالار كوزدەلۋى ءتيىس», دەپ اتاپ ءوتتى سەناتور ءابدالى نۇراليەۆ.