داۋرەن ادىلبەكوۆ سەنات وتىرىسىندا ۇكىمەت باسشىسى ءاليحان سمايىلوۆتىڭ اتىنا دەپۋتاتتىق ساۋال جولداي وتىرىپ, وندا شاعىن جانە ورتا بيزنەستى مەملەكەتتىك قولداۋ تەتىكتەرىنىڭ تيىمدىلىگىن ارتتىرۋ شارالارىن ۇسىندى, دەپ حابارلايدى Egemen.kz قر پارلامەنتى سەناتىنىڭ ءباسپاسوز قىزمەتىنە سىلتەمە جاساپ.
سەناتور ءتۇرلى اكىمشىلەر كاسىپكەرلەرگە مەملەكەتتىك قولداۋ كورسەتەتىنىن اتاپ ءوتتى. سونىڭ ناتيجەسىندە بيزنەسمەندەر ءارتۇرلى وپەراتورلاردىڭ الۋان ءتۇرلى دەرەككوزدەرىنەن مەملەكەت ولارعا قانداي قولداۋ باعدارلامالارىن ۇسىناتىنى تۋرالى اقپارات الۋعا ءماجبۇر. بۇل دەپۋتاتتىڭ پىكىرىنشە, بيزنەس ءۇشىن اقپاراتتىڭ قولجەتىمدىلىگىن تومەندەتەدى, سوندىقتان كاسىپكەرلەر تاراپىنان نارازىلىق تۋدىرادى.
«شوب وكىلدەرى مەملەكەتتىك قولداۋ شارالارى مەن ونى كورسەتۋدىڭ شارتتارى تۋرالى ءارتۇرلى باعدارلاما وپەراتورلارىنان اقپارات الادى. وسىلايشا, بيزنەستى مەملەكەتتىك قولداۋدىڭ كوپقۇرىلىمدى تەتىكتەرى كاسىپكەرلەر تاراپىنان نارازىلىق تۋدىرىپ وتىر. كاسىپكەرلىك سۋبەكتىلەرىنە مەملەكەتتىك قولداۋ شارالارىنىڭ تيىمدىلىگىن ارتتىرۋ ماقساتىندا ۇكىمەتكە مەملەكەتتىك قولداۋ شارالارى وپەراتورلارىنىڭ سانىن قىسقارتۋ جانە بىرىكتىرۋ ارقىلى وڭتايلاندىرۋ مۇمكىندىگىن قاراستىرۋدى ۇسىنامىز», دەدى داۋرەن ادىلبەكوۆ.
سەناتور وسىعان بايلانىستى شوب-تى مەملەكەتتىك قولداۋدىڭ بىرىڭعاي اقپاراتتىق پورتالىن قۇرۋ قاجەت دەپ سانايدى, وندا كاسىپكەرلەرگە قاجەتتى بارلىق اقپارات جيناقتالاتىن بولادى.
داۋرەن ادىلبەكوۆ سونىمەن بىرگە مەملەكەتتىك قولداۋدىڭ كەيبىر باعدارلامالارى ءبىر-ءبىرىن قايتالايتىنىن اتاپ ءوتتى. دەپۋتاتتىڭ ۇسىنىسى – ۇكىمەت تالداۋ جۇرگىزىپ, بيزنەستى قولداۋدىڭ ءتيىمدى شارالارىن انىقتاۋى كەرەك.
«قازىرگى ۋاقىتتا ءار مينيسترلىك: ۇەم, اشم, يدم, ەحاقم جانە باسقالار شوب-تى مەملەكەتتىك قولداۋ شارالارىن ءار جاقتان باسقارىپ وتىر. بارلىق سالالاردا كورسەتىلەتىن مەملەكەتتىك قولداۋدىڭ بارلىق شارالارى بويىنشا بىردە-ءبىر مەملەكەتتىك ورگان تولىق اقپارات بەرە المادى, ءاربىر مەملەكەتتىك ورگان تەك ءوز سالاسىندا عانا اقپاراتقا يە. مەملەكەتتىك قولداۋ شارالارىن ۇسىنۋدىڭ قاراپايىم, تۇسىنىكتى تەتىكتەرى بار بىرىڭعاي قاعيدالارى قاجەت», دەدى سەناتور.