پارلامەنت ءماجىلىسىنىڭ جالپى وتىرىسىندا دەپۋتاتتار قازاقستان رەسپۋبليكاسى پارلامەنت ءماجىلىسىنىڭ توراعاسى نۇرلان نىعماتۋليندى قىزمەتىنەن ءوز ەركىمەن بوساتۋ تۋرالى ماسەلەنى قارادى, دەپ حابارلايدى Egemen.kz.
وسىعان بايلانىستى ءماجىلىس توراعاسى مەملەكەت باسشىسى قاسىم-جومارت كەمەل ۇلى توقاەۆ اسا ماڭىزدى مىندەتتەر جۇكتەگەنىن العا تارتا كەلىپ, ول ماقساتتارعا جەتۋ ءۇشىن كادر سالاسىن جاڭارتۋ كەرەك ەكەنىنە توقتالدى.
وتىرىس بارىسىندا قر كونستيتۋتسياسىنىڭ 58-بابىنىڭ 2-تارماعىنا سايكەس, نۇرلان زايروللا ۇلى نىعماتۋلين قازاقستان رەسپۋبليكاسىنىڭ پارلامەنت ءماجىلىسى توراعاسىنىڭ قىزمەتىنەن ءوز ەركىمەن بوساتۋ تۋرالى قاۋلىنىڭ جوباسىن داۋىسقا سالىپ, ول ءبىراۋىزدان قابىلداندى.
«بيىل ءماجىلىس سپيكەرى بولعانىما 10 جىل تولىپ وتىر. ءۇش شاقىرىلىم توراعا بولدىم. بۇل, ارينە, از ۋاقىت ەمەس. وسى ۋاقىتتىڭ ىشىندە ەلىمىزدىڭ ساياسي جانە الەۋمەتتىك-ەكونوميكالىق ومىرىنە بەلسەنە ارالاسىپ, ەلىمىزگە, حالقىمىزعا قاجەتتى, ساپالى زاڭدار قابىلداۋ جولىندا بىرلەسىپ, ايانباي ەڭبەك ەتتىك. بۇل جولدا, ەڭ الدىمەن, ەلباسىمىز, Nur Otan پارتياسىنىڭ نەگىزىن قالاۋشى نۇرسۇلتان ءابىش ۇلى نازارباەۆقا, قازىرگى مەملەكەت باسشىسى, پارتيامىزدىڭ توراعاسى قاسىم-جومارت كەمەل ۇلى توقاەۆقا ماعان وسى جىلداردا بىرنەشە لاۋازىمدى قىزمەتتى سەنىممەن تاپسىرىپ, ارقاشاندا قولداۋ كورسەتكەنى ءۇشىن شىن جۇرەكتەن العىسىمدى بىلدىرەمىن», دەدى.
ودان ءارى نۇرلان نىعماتۋلين ءۇش شاقىرىلىم بىرگە جۇمىس ىستەگەن بارلىق دەپۋتاتتارعا وسى جىلدار ىشىندە قولداپ, سەنىم بىلدىرگەن سايلاۋشىلارعا, ءماجىلىستىڭ زاڭ شىعارۋ جۇمىسىن جوعارى دەڭگەيدە قامتاماسىز ەتكەن اپپارات قىزمەتكەرلەرىنە, بارلىق قوعامدىق ۇيىم وكىلدەرىنە, ماجىلىسكە كىرمەگەن ساياسي پارتيالارعا, ءماجىلىس جۇمىسىن ناسيحاتتاعان جۋرناليستەرگە, ساراپشىلارعا العىس ءبىلدىردى.