قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا تۇرعىن ءۇي ساياساتىنداعى جانە تۇرعىن ءۇيدى جالداۋ اقىسىن سۋبسيديالاۋداعى جاڭا تاسىلدەر قارالدى, دەپ حابارلايدى Egemen.kz.
«ازاماتتاردىڭ ءال-اۋقاتىن جاقسارتۋ - مەملەكەتتىك ساياساتتىڭ ەڭ ماڭىزدى مىندەتى. وسى مىندەتكە جەتۋدىڭ باسىم باعىتتارىنىڭ ءبىرى – تۇرعىن ءۇيدىڭ قولجەتىمدىلىگىن قامتاماسىز ەتۋ», دەدى ءاليحان سمايىلوۆ.
ۇكىمەت باسشىسى ەلدەگى جالپى قۇرىلىس سالاسى جىل سايىن وڭ ديناميكا كورسەتىپ, ءوسىپ كەلە جاتقانىن ايتتى. 2021 جىلدىڭ قورىتىندىسى بويىنشا 17,1 ملن شارشى مەتر ءۇي سالىندى. تۇرعىن ءۇي قۇرىلىسىنا شامامەن 2,4 ترلن تەڭگە ينۆەستيتسيا تارتىلدى. بىراق, بۇل كورسەتكىشكە قاراماستان, قاراپايىم ازاماتتاردىڭ باسىم بولىگى باسپانا الا الماي ءجۇر. سول سەبەپتەن ءۇي كەزەگىنە تۇرعانداردىڭ سانى كوبەيىپ جاتىر.
مەملەكەت باسشىسىنىڭ تاپسىرمالارىن ىسكە اسىرۋ اياسىندا تۇرعىن ءۇي ساياساتىنىڭ جاڭا تاسىلدەرى ازىرلەندى. مۇندا «وتباسى بانكىنە» ەرەكشە ورىن بەرىلەدى, ول باسپاناعا مۇقتاج ادامداردىڭ كەزەگىن قالىپتاستىرۋ جانە ولارعا جەڭىلدىكتى تۇرعىن ۇيلەردى ساتۋ بويىنشا بىرىڭعاي وپەراتور قىزمەتىن اتقارادى.
قازىرگى تاڭدا ازاماتتارعا ءۇي ساتىپ الۋ ماقساتىندا وزدەرىنىڭ زەينەتاقى جيناقتارىنىڭ ءبىر بولىگىن «وتباسى بانكىندەگى» دەپوزيتتەرگە سالۋ مۇمكىندىگى بەرىلدى.
زاڭنامانى رەفورمالاۋ اياسىندا تۇرعىن ءۇيدى كىرىسىنە قاراي ساتۋ, ارەندالىق تولەمدەردىڭ ءبىر بولىگىن سۋبسيديالاۋ جانە اۋىلدى جەرلەردە تۇرعىن ءۇي سالۋ مەحانيزمدەرى ەنگىزىلەدى.
مەملەكەت باسشىسىنىڭ تاپسىرماسىنا سايكەس, ارەندالىق تولەمنىڭ ءبىر بولىگىن سۋبسيديالاۋ مەحانيزمىن ەنگىزۋ تۋرالى شەشىم قابىلداندى. باسپاناعا مۇقتاج 70 مىڭعا جۋىق وتباسى اتالعان مەحانيزم اياسىندا جالداۋ اقىسىنان ۇنەمدەلگەن قاراجاتتى ءۇي ساتىپ الۋعا جيناي الادى.
«جالپى, جاڭا تاسىلدەر مەن مەحانيزمدەر 10 جىل ىشىندە تۇرعىن ءۇي كەزەگىندە تۇرعان جارتى ميلليوننان استام ادامنىڭ باسپانا ماسەلەسىن شەشۋگە جانە مەملەكەتتىك قولداۋدىڭ ادىلەتتى, اشىق ءارى قولجەتىمدى جۇيەسىن جاساۋعا مۇمكىندىك بەرەدى», دەدى ۇكىمەت باسشىسى.
پرەمەر-مينيستر يندۋستريا جانە ينفراقۇرىلىمدىق دامۋ مينيسترلىگىنە «بايتەرەك» ۇبح» اق-مەن بىرلەسىپ, ارەندانى سۋبسيديالاۋ مەحانيزمىن ەنگىزۋ بويىنشا بارلىق ۇيىمداستىرۋ ماسەلەلەرى مەن راسىمدەردى اياقتاپ, وسى جىلدىڭ 1 مامىرىنا دەيىن ناقتى ىسكە اسىرۋعا كىرىسۋدى تاپسىردى.
راسىمدەردىڭ اشىقتىعىن قامتاماسىز ەتۋ, ساپاسىن ارتتىرۋ جانە ودان ءارى جەڭىلدەتۋ ءۇشىن قر يدم-گە قۇرىلىس سالاسىن رەتتەۋگە تسيفرلىق تەحنولوگيالاردى ەنگىزۋ بويىنشا زاڭ جوباسىن وسى جىلعى 1 ساۋىرگە دەيىن ۇكىمەتكە ەنگىزۋ تاپسىرىلدى.
«قۇرىلىس ماۋسىمىن ۋاقىتىلى باستاۋدىڭ ماڭىزى زور. ول ءۇشىن ءوڭىر اكىمدەرى كۇن جىلىنعان سوڭ قۇرىلىس جۇمىستارىن بارىنشا تەزدەتۋ ءۇشىن ەرتە باستان جەر تەلىمدەرىن ءبولۋدى, جوبالىق قۇجاتتاردى ازىرلەۋدى, قاجەتتى ينفراقۇرىلىمدى جۇرگىزۋدى قامتاماسىز ەتۋى ءتيىس», دەدى پرەمەر-مينيستر.