وڭىردە جىل باسىنان بەرى 10 مىڭنان استام ادام قاتەرلى دەرتتىڭ قارماعىنا ءىلىنىپ, بۇل ورايداعى كورسەتكىش 6,9 پايىزعا وسكەن. وبلىستىڭ باس سانيتارلىق دارىگەرى ايناگۇل مۋسينانىڭ ايتۋىنا قاراعاندا, سىرقاتتاردىڭ دەنى – ەكپە الماعاندار.
سوڭعى ءبىر تاۋلىكتە 976 ادامنىڭ بويىنان قاتەرلى ىندەت بەلگىلەرى انىقتالعان. جۇقپالى اۋرۋلار ستاتسيونارلارىندا 642 ناۋقاس ەم قابىلداۋدا. ءۇش ادامنىڭ جاعدايى وتە اۋىر.
– بۇگىندە وبلىس ورتالىعى مەن بۋراباي اۋدانىندا ەپيدەميالىق احۋال وتە كۇردەلى, – دەيدى وبلىستىق باس سانيتارلىق دارىگەرى, – ءبىر تاۋلىكتە وبلىس ورتالىعىندا 480, بۋراباي اۋدانىندا 80 دەرەك تىركەلىپ وتىر, وزگە اۋداندارداعى احۋال دا الاڭداتارلىق.
ءبىلىم وشاقتارىنداعى قازىرگى جاعداي وتە كۇردەلى. وبلىستاعى 75 مەكتەپتىڭ 109 سىنىبى قاشىقتان وقۋ فورماتىنا اۋىسقان. دەرەكتەرگە قاراعاندا, كوروناۆيرۋستىڭ سوڭعى شتامى ءبىلىم وردالارىندا جايىلىپ بارا جاتقانىن بايقاۋعا بولادى. وقۋشىلاردىڭ سانى كوپ مەكتەپتەردە قاتاڭ سانيتارلىق تالاپتار ساقتالۋعا ءتيىستى. ازىرگە كارانتينگە تولىعىمەن جابىلعان مەكتەپتەر جوق. سوڭعى تاۋلىكتە مەكتەپ وقۋشىلارى اراسىندا 127 جاعداي تىركەلگەن. وقۋ جىلىنىڭ باسىنان بەرى ءبىلىم وشاقتارى قىزمەتكەرلەرى اراسىندا 744 وقيعا انىقتالدى. دەمەك مەكتەپتەگى سانيتارلىق ساقتىق شارالارى ءالى دە تالاپقا ساي ەمەس.
دەرت قاۋپى وتە كۇشتى ەكەنىن تاعى ءبىر ەسكە سالۋعا تۋرا كەلەدى. جاڭا جىلدان بەرى ىندەتتەن وبلىستىڭ 17 تۇرعىنى كوز جۇمدى. وتكەن اپتانىڭ وزىندە عانا 6 404 ادامنىڭ كوروناۆيرۋس ىندەتىنىڭ قارماعىنا ىلىككەنى بەلگىلى بولىپ وتىر. كۇن سايىنعى دەنەڭدى تۇرشىكتىرەتىن دەرەكتەردى سارالايتىن بولساڭىز, قاۋىپتىڭ كۇننەن كۇنگە كۇشەيىپ كەلە جاتقانىن بايقاۋعا بولادى. وسى سالا ماماندارىنىڭ پىكىرىنە سۇيەنسەك, پاندەميا باستالعالى ىندەتتىڭ مۇنشالىقتى ءوسۋ كورسەتكىشى بولماعان.
– جاعداي وتە كۇردەلى, – دەيدى وبلىستىق دەنساۋلىق ساقتاۋ باسقارماسىنىڭ باسشىسى ناريمان سىزدىقوۆ, – اۋرۋحانالاردا توسەكتىك ورىندار جەتكىلىكتى بولعانىمەن, ىندەتتىڭ تەز تارايتىنى سونشالىق, قاۋىپ كۇشەيە تۇسكەن. بۇرىن دايىندالعان توسەكتىك ورىنداردىڭ 50 پايىزى تولىپ قالعان.
باسقارما باسشىسىنىڭ ايتۋىنا قاراعاندا, باستى سەبەپ – ەكپە الۋدان جالتارۋ. ال ادامدارعا ەكپە جاساپ, قاۋىپتىڭ بەتىن قايتارۋعا تولىق مۇمكىندىك بار. وتكەن جىلدان بەرى وڭىرگە 1 ملن-نان استام ۆاكتسينا دوزاسى جەتكىزىلگەن. جىل باسىنان بەرى «سپۋتنيك Lite» ۆاكتسيناسىنىڭ 4 مىڭ دوزاسى الىنعان. سولاي بولا تۇرا, جاپپاي ەكپە الىپ, تۇتاس قاۋىپسىزدىكتى قامتاماسىز ەتۋ جاعى ءالى دە كەمشىن. ءسوز اراسىندا 226 مىڭنان استام وبلىس تۇرعىنى مۇلدە ەكپە الماعانىن ايتا كەتۋ كەرەك. ولاردىڭ 3,7 پايىزى, ياعني 8 747 ادام ىندەت جۇقتىرىپ وتىر. ال ەكپە العاندار اراسىندا بيىل 343 ادام سىرقاتقا شالدىققان. ەكپە العان ادامداردىڭ ەشقايسىسى جان ساقتاۋ بولىمىنە تۇسپەگەنىن ەسكەرسەك, قاۋىپسىزدىك شاراسىنىڭ تيىمدىلىگى كوزگە كورىنىپ تۇر.
«قىزىل» ايماقتىڭ قۇرساۋىنداعى ىندەت دەمىگىپ تۇر. سوڭعى دەرەكتەرگە قاراعاندا, 40-قا جۋىق ناۋقاس جان ساقتاۋ بولىمىندە جاتىر. ەكپە ەلدى امان الىپ قالاتىن بىردەن ءبىر جول ەكەنىن ەستەن شىعارماعان ءجون.
اقمولا وبلىسى