مۇنايلى وڭىرگە دە مەتالل قۇيمالارى قاجەت. سول سەبەپتەن, قازاق مۇنايىنىڭ العاشقى تامشىسى الىنعان جىلىوي اۋدانىنىڭ ورتالىعى – قۇلسارى قالاسىندا ورنالاسقان «مەتاللپرودۋكت» جشس-ءنىڭ وسىنداي ءونىم دايىندايتىن زاۋىتى قايتا جاڭعىرتىلدى.
سەرىكتەستىك ديرەكتورى قادىرجان قۇلتەكەنوۆتىڭ ايتۋىنشا, جاڭعىرتۋدان وتكەن زاۋىتتىڭ قۋاتى ەكى ەسە ارتىپ, جىلىنا 57 مىڭ توننا مەتالل قۇيمالارى وندىرەدى. قازىر مۇندا 130 ادام جۇمىس ىستەيدى. بولاشاقتا جۇمىسشىلار سانى 240-قا دەيىن كوبەيىپ, ەكى اۋىسىممەن مەتالل قۇيمالارىن دايىنداۋ كوزدەلىپ وتىر. زاۋىتتى جاڭعىرتۋ ءۇشىن قاجەتتى قۇرال-جابدىقتار شەتەلدەن جەتكىزىلگەن. ءوندىرىس ورنى 90 پايىز اۆتوماتتاندىرىلعان. قازىردىڭ وزىندە كورشىلەس ەلدەردەن سۇرانىس ءتۇسىپ جاتىر. الدىمەن وزبەكستان رەسپۋبليكاسىنا مەتالل قۇيمالارى جىبەرىلە باستاماق.
– الداعى ماقساتىمىز – مەتالدى تەرەڭ وڭدەۋ. ويتكەنى مۇنى وتاندىق نارىقتى عانا ەمەس, ەكسپورتقا دايىن ءونىم شىعارۋ ءۇشىن قاجەتتى جوبا دەپ ەسەپتەيمىز. ءبىزدىڭ بۇل جوبامىز قۇلسارى اتالاتىن مونوقالا ەكونوميكاسىن ارتاراپتاندىرۋعا ىقپال ەتكەنىن قالايمىز, – دەيدى ق.قۇلتەكەنوۆ.
«مەتاللپرودۋكت» جشس-ءنىڭ زاۋىتىندا ۇزىندىعى 6 مەتر, سالماعى 1 070 كيلوگرامم بولاتىن مەتالل قۇيمالارى شىعارىلىپ جاتىر. تاپسىرىس بەرۋشىنىڭ قالاۋىنا ساي قۇيمالاردىڭ ءپىشىنى وزگەرەدى.
– مەتالل قۇيمالارىن شىعاراتىن زاۋىتتىڭ قۇرىلىسى 2008 جىلعى 15 قازاندا باستالعان ەدى. مەتالل بالقىتۋ, قىزدىرۋ پەشىنەن العاشقى ءونىم 2012 جىلى الىندى. باستاپقىدا زاۋىتقا ءۇندىستاننان 7 توننا مەتالدى ەلەكترمەن بالقىتاتىن ەكى پەش ساتىپ الدى. سودان بەرى قۇرىلىس يندۋسترياسىنا قاجەتتى مەتالل قۇيمالارى تۇراقتى شىعارىلدى. ال 2018 جىلى زاۋىتتىڭ قۋاتىن ارتتىرۋ ءۇشىن قايتا جاڭعىرتۋ جۇمىستارىن جۇرگىزۋگە شەشىم قابىلدادىق. وسىلايشا, تۇركيادان 10 توننا مەتالدى بالقىتاتىن ەلەكتر پەشى مەن الەمدىك ستاندارتپەن بولات قۇيمالارىن دايىندايتىن قوندىرعى اكەلىپ ورناتتىق. قازىر ءبىزدىڭ ءونىمىمىزدى وزبەكستان رەسپۋبليكاسىنىڭ ەكى زاۋىتى الۋعا كەلىسىم بەرىپ وتىر. زاۋىتتى قايتا جاڭعىرتۋعا 2 ملرد 800 ملن تەڭگە ينۆەستيتسيا سالىندى, – دەيدى ق.قۇلتەكەنوۆ.
اتىراۋ وبلىسى