بۇل تۋرالى قر ءبىلىم جانە عىلىم ءبىرىنشى ۆيتسە-ءمينيسترى شولپان كارينوۆا ايتتى, دەپ حابارلايدى Egemen.kz.
«مەكتەپكە دەيىنگى ءبىلىم بەرۋ ۇيىمدارىنىڭ, اسىرەسە جەكەمەنشىك بالاباقشالار قىزمەتىنىڭ ساپاسى جاقسارادى. مەملەكەتتىك تاپسىرىستى ورنالاستىرۋ قاعيدالارىنا وزگەرىستەر ەنگىزەمىز. ونىڭ ىشىندە بىلىكتى پەداگوگتەرمەن قامتاماسىز ەتىپ, قاۋىپسىز جانە قولايلى جاعداي جاساۋ ءۇشىن, مەملەكەتتىك تاپسىرىس قاراجاتىن ماقساتتى جۇمساۋ جانە قىزمەت كورسەتۋ ساپاسىن ارتتىرۋ ماقساتىندا تالاپتاردى كۇشەيتەمىز», دەدى ول مينيسترلىكتىڭ كەڭەيتىلگەن القا وتىرىسىندا.
سونداي-اق ءبىرىنشى ۆيتسە-مينيستر بالاباقشالارعا كەزەككە تۇرۋدىڭ بىرىڭعاي بازاسىن قۇرۋ جوسپارلانعانىن اتاپ ءوتتى.
«بالاباقشالارعا كەزەككە تۇرۋدىڭ بىرىڭعاي بازاسى مەكتەپكە دەيىنگى ءبىلىم بەرۋ ۇيىمدارىنداعى ورىنداردى ءبولۋدىڭ اشىقتىعىن, قارجىنىڭ دۇرىس جۇمسالۋىن جانە كەزەكتىڭ قايتالانباۋىن قامتاماسىز ەتەدى», دەدى شولپان كارينوۆا