فۋتزالدان قازاقستان ۇلتتىق قۇراماسىنىڭ ويىنشىلارى البەرت اقبالىقوۆ پەن شىڭعىس ەسەنامانوۆ نيدەرلاندتا ءوتىپ جاتقان ەۋروپا چەمپيوناتىنىڭ توپتىق كەزەڭىندەگى شەشۋشى ماتچقا قاتىسا المايدى.
قازاقستان فۋتبول فەدەراتسياسىنىڭ مالىمەتى بويىنشا, ولار ءۇشىنشى تۋر اياسىنداعى يتاليامەن وتەتىن ويىندا الاڭعا شىقپايدى. ۋەفا تارتىپتىك-باقىلاۋ كوميتەتىنىڭ شەشىمىمەن قازاقستان قۇراماسىنىڭ ويىنشىسى البەرت اقبالىقوۆ سلوۆەنيامەن وتكەن كەزدەسۋدە «قىزىل قاعاز» العانى ءۇشىن ەكى ويىنعا شەتتەتىلدى. شابۋىلشى فينليانديامەن وتكەن ويىنعا قاتىسقان جوق. ەندى يتاليامەن وتەتىن كەزدەسۋدە دە الاڭعا شىعا المايدى.
سونىمەن قاتار شەشۋشى ويىندا ۇلتتىق قۇراماعا شىڭعىس ەسەنامانوۆ تا كومەكتەسە المايدى. ويىنشىنىڭ كوروناۆيرۋسقا قايتا تاپسىرعان سىناعى وڭ ناتيجە كورسەتتى. جارىس ەرەجەسىنە سايكەس, ويىنشى ءبىر اپتا (31 قاڭتارعا دەيىن) كارانتيندە بولادى. ايتا كەتەيىك, فۋتزالدان قازاقستان قۇراماسى ەرتەڭ يتاليا فۋتزالشىلارىمەن كەزدەسەدى. ەگەر ءبىزدىڭ قۇراما جەڭىسكە جەتسە, جارىستىڭ پلەي-وفف كەزەڭىنە جولداما الادى.