بۇعان دەيىن حابارلانعانىنداي, ساناۋلى كۇندەردەن سوڭ قىتاي استاناسى بەيجىڭدە ءتورت جىلدىقتىڭ باستى دوداسى – قىسقى وليمپيا ويىندارىنىڭ جالاۋى جەلبىرەيدى. وسىدان بىرەر كۇن بۇرىن قازاقستاننىڭ ۇلتتىق وليمپيادا كوميتەتى بيىلعى اق وليمپيادادا قازاقستاننىڭ بايراعىن شورت-ترەكتەن قازاقستان كومانداسىنىڭ كوشباسشىسى, الەم كۋبوگى كەزەڭدەرىنىڭ جەڭىمپازى ءارى جۇلدەگەرى ابزال اجىعاليەۆ پەن كونكيمەن جۇگىرۋدەن ءتورت قۇرلىق چەمپيونى ەكاتەرينا ايدوۆا ۇستاپ شىعاتىنىن مالىمدەگەن بولاتىن.
ەكاتەرينا ايدوۆا قازاقستان قۇراماسى ساپىندا ەڭ العاش رەت 2010 جىلعى ۆانكۋۆەر وليمپياداسىندا ونەر كورسەتتى. كەيىننەن سوچي-2014 جانە پحەنچحان-2018 ويىندارىندا ەل نامىسىن قورعادى. 30 جاستاعى ايدوۆا ءۇشىن بەيجىڭ ويىندارى ءوز مانسابىنداعى ءتورتىنشى وليمپيادا بولماق. تاجىريبەلى سپورتشى كونكيمەن جۇگىرۋدەن الەم كۋبوگى كەزەڭىنىڭ, 2017 جىلعى ۋنيۆەرسيادا ويىندارىنىڭ جۇلدەگەرى, 2021 جىلعى ءتورت قۇرلىق چەمپيوناتىنىڭ جەڭىمپازى سانالادى.
«قىسقى وليمپيا ويىندارىنىڭ اشىلۋ سالتاناتىندا ەلىمىزدىڭ بايراعىن كوتەرىپ شىعاتىن العاشقى قازاقستاندىق سپورتشى قىز ەكەنىمدى ماقتان تۇتامىن. كوپتەگەن اتلەت ءۇشىن بۇل – العاشقى وليمپيادا, ال كەيبىرەۋلەرى تورتجىلدىق دوداسىنا بىرنەشە رەت قاتىسقان. الايدا وليمپياداعا قانشا رەت قاتىسساڭ دا, ونداعى سەزىم وزگەرمەيدى. ەلىڭ ءۇشىن ماقتاناسىڭ جانە ۇلكەن جاۋاپكەرشىلىك بارىن تۇسىنەسىڭ. بەيجىڭدە ەل ءۇمىتىن اقتاۋ ءۇشىن بار كۇشىمىزدى سالامىز», دەيدى ەكاتەرينا ايدوۆا.
ابزال اجىعاليەۆتىڭ ەنشىسىندە شورت-ترەكتەن الەم كۋبوگى كەزەڭدەرىنىڭ بارلىق جۇلدەسى بار: 2017 جىلعى ۋنيۆەرسيادا, 2011 جىلعى ازيا ويىندارىنىڭ مەدالى ونىڭ قورجىنىنان تابىلادى. ابزال 2014 جانە 2018 جىلدارداعى وليمپياداعا قاتىسىپ, پحەنچحاندا قازاقستاننىڭ تۋىن كوتەرىپ شىققان بولاتىن. ول مۇنداي قۇرمەتكە وسىمەن ەكىنشى رەت يە بولىپ وتىر.
«وليمپيا ويىندارىندا قازاقستاننىڭ تۋىن الىپ شىعۋ مەن ءۇشىن ۇلكەن ابىروي. ەلىڭنىڭ بايراعىن اشىلۋ سالتاناتىندا كوتەرىپ شىققانداعى سەزىم ءومىر بويى ۇمىتىلمايدى. بىزگە سەنىم ارتقان بارشا جانكۇيەرگە العىسىمىز شەكسىز. بارلىق وليمپياداشىلار اتىنان بۇل باسەكەنى اسىعا كۇتكەنىمىزدى ايتقىم كەلەدى. سپورتشىلارعا دايىندالۋ ءۇشىن بار جاعداي جاسالدى. ەلدە دە, شەتەلدە دە دايىندالدىق. ەندى وليمپيادا ايدىنىندا ەل نامىسىن ابىرويمەن قورعاۋ ءۇشىن بارىمىزدى سالامىز», دەيدى ابزال اجىعاليەۆ.
وسى ورايدا وتكەنگە شەگىنىس جاساپ, بۇعان دەيىنگى اق قار, كوك مۇز ۇستىندەگى ويىنداردا ەلىمىزدىڭ كوك تۋىن ۇستاپ شىققان سپورتشىلار مەن ولاردىڭ وليمپيادادا قول جەتكىزگەن ناتيجەلەرىنە توقتالىپ وتكەندى ءجون كورىپ وتىرمىز.
قازاقستاندىق سپورتشىلار تۇڭعىش رەت نورۆەگيانىڭ ليللەحاممەر قالاسىندا (1994) وتكەن قىسقى وليمپيا ويىندارىنا قاتىستى. وندا قازاقستان تۋىن ترامپليننەن سەكىرۋشى, ەلىمىزدىڭ ءتورت دۇركىن چەمپيونى, تمد ەلدەرى كۋبوگىنىڭ يەگەرى قايرات بيەكەنوۆ ۇستاپ شىقتى. وليمپيادادا ول 90 مەترلىك ترامپليننەن سەكىرۋدە 49-ورىن السا (157,5 ۇپاي), 120 مەتردەن سەكىرۋدە 58-ءشى (35,2 ۇپاي) ورىننان كورىندى. قايرات 2001 جىلى سپورتتىق كارەراسىن اياقتاپ, ءبىرجولا باپكەرلىككە بەت بۇردى. بۇگىندە ترامپليننەن سەكىرۋدەن قازاقستان ۇلتتىق قۇراماسىنىڭ باپكەرى.
1998 جىلى جاپونيانىڭ ناگانو قالاسىندا الاۋى تۇتانعان اق وليمپيادادا كوك تۋدى ۇستاۋ مارتەبەسى ليللەحاممەردە قازاقستان قورجىنىنا ءۇش جۇلدە سالعان شاڭعىشى ۆلاديمير سميرنوۆقا بۇيىردى. ۆلاديمير سميرنوۆ ناگانودا دا جۇلدەگەرلەر قاتارىنان كورىنىپ, وليمپيادانىڭ قولا جۇلدەسىن يەلەندى. 1999 جىلى سپورتتىق مانسابىن اياقتاپ, 2000 جىلى حالىقارالىق وليمپيادا كوميتەتىنىڭ اتقارۋ كوميتەتىنىڭ مۇشەسى بولىپ سايلاندى. ال 2002 جىلدان 2010 جىلعا دەيىن قازاقستان بياتلون فەدەراتسياسىنىڭ پرەزيدەنتى قىزمەتىن اتقاردى. سونداي-اق سميرنوۆ 2014-2015 جىلدارى «استانا» پرەزيدەنتتىك كاسىبي سپورت كلۋبىنىڭ باس ديرەكتورى بولدى.
اقش-تىڭ سولت-لەيك-سيتي قالاسىندا وتكەن XIX قىسقى وليمپيا ويىندارىندا قازاقستان بايراعىن كونكيمەن جۇگىرۋشى راديك بيكچەنتاەۆ ۇستاپ شىقتى. راديك بيكچەنتاەۆ سول كەزدەگى قۇراماداعى ءۇش وليمپياداعا قاتىسقان (1994, 1998 جانە 2002 جىلدارى) تاجىريبەلى سپورتشىنىڭ ءبىرى ەدى. ونىڭ وليمپياداداعى ەڭ ۇزدىك كورسەتكىشى 16-ورىن بولدى. بۇل ناتيجەگە ول 1994 جىلى ليللەحاممەردە 5 000 مەتر قاشىقتىققا جۇگىرۋدە قول جەتكىزگەن ەدى. ر.بيكچەنتاەۆ كونكيمەن جۇگىرۋدەن قازاقستاننىڭ ءۇش دۇركىن چەمپيونى جانە ءتورت رەت ەل بىرىنشىلىگىنىڭ قولا جۇلدەسىن يەلەندى. سونداي-اق 1999 جىلعى قىسقى ازيا ويىندارىندا التىن مەدال العان. ول بۇگىندە قازاقستاننىڭ كونكيمەن جۇگىرۋ فەدەراتسياسىنىڭ اتقارۋشى ديرەكتورى.
2006 جىلى يتاليانىڭ تۋرين قالاسىندا وتكەن وليمپيادادا ەلىمىزدىڭ كوك تۋىن حوككەيشى الەكساندر كورەشكوۆ ۇستادى. تۋريندەگى حوككەي باسەكەسىندە قازاقستان قۇراماسى ىرىكتەۋ كەزەڭىندە «ۆ» توبىندا سىنعا ءتۇسىپ, ەكى ۇپايمەن التى قۇرامانىڭ ىشىندە بەسىنشى ورىن الدى. ءسويتىپ ىرىكتەۋدەن ىركىلگەن قۇرامامىز وليمپيادانى ەرتە اياقتاۋعا ءماجبۇر بولدى.
2010 جىلى كانادانىڭ ۆانكۋۆەر قالاسىندا جالاۋى جەلبىرەگەن قىسقى وليمپيا ويىندارىندا قازاقستاننىڭ تۋىن بياتلونشى دياس كەنەشەۆ الىپ شىقتى. تۋ ۇستاۋشى بۇل ءدۇبىرلى دودادا كوڭىل كونشىتەرلىكتەي ناتيجە كورسەتە المادى.
سوچي وليمپياداسىندا (2014) كوك تۋدى ۇستاپ شىعۋ شاڭعىشى ەردوس احماديەۆكە سەنىپ تاپسىرىلدى. تۋ ۇستاعان سپورتشىمىز شاڭعىدان 15 شاقىرىمدىق كلاسسيكالىق ستيلدە جۇگىرۋدەن سىنعا ءتۇسىپ, مارەگە 54-ءشى بولىپ كەلدى.
ازىرشە قازاقستان قۇراماسى قاتىسقان سوڭعى پحەنچحان وليمپياداسىندا قازاقستاننىڭ كوك تۋىن, جوعارىدا ايتىپ وتكەنىمىزدەي, شورت-ترەكشى ابزال اجىعاليەۆ ۇستاپ شىقتى. اجىعاليەۆ وڭتۇستىك كورەياداعى ويىنداردا 500 مەتر جانە كوماندالىق ەستافەتا جارىسىندا باق سىنادى. 500 مەترگە جۇگىرۋدە 9-ورىنعا تابان تىرەسە, ەستافەتادا ۇزدىك التاۋدىڭ قاتارىنان كورىندى.
بۇل جولى قالاي بولار ەكەن؟..