سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ وتىرىسى ءوتتى. وندا 2022 جىلدىڭ 27 قاڭتارىندا وتەتىن سەنات وتىرىسىنىڭ كۇن ءتارتىبى بەكىتىلدى, دەپ حابارلايدى Egemen.kz.
الداعى پالاتا وتىرىسىندا دەپۋتاتتار سەناتور بەيبىت يساباەۆتىڭ انت بەرۋى تۋرالى ماسەلەنى قارايدى.
سونىمەن قاتار بەيسەنبىدە «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» كونستيتۋتسيالىق زاڭ جوباسى جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر ەنگىزۋ تۋرالى» زاڭ جوباسى قارالادى. بۇل زاڭ جوبالارى مۇگەدەك ادامداردىڭ قوعامدىق-ساياسي پروتسەستەرگە قاتىسۋىن ىنتالاندىرۋ ماسەلەلەرىن دە قامتيدى.
سونداي-اق بيۋرو وتىرىسى كەزىندە ماجىلىستەن كەلىپ تۇسكەن بىرقاتار زاڭ جوباسى سالالىق كوميتەتتەرگە ءبولىنىپ بەرىلدى. ولاردىڭ قاتارىندا «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا (ەۋرازيالىق ەكونوميكالىق وداقتىڭ ورتاق ەلەكتر ەنەرگەتيكالىق نارىعىن قالىپتاستىرۋ بولىگىندە) وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى دا بار.