از عانا ۋاقىت «جاسىل ايماقتا» بولىپ, ارقاسىن كەڭگە سالعان اعايىندى ىندەتتىڭ ەتەك الۋى, قاتەرلى قاۋىپتىڭ كوبەيۋى قايتادان قۋسىرا باستادى. ءوڭىر – «قىزىل ايماق» ساناتىندا. دەرتتىڭ باس كوتەرۋى – جۇرتتىڭ سانيتارلىق تالاپتى ساقتاماۋىنان. قاتەرلى دەلىنگەنىمەن, تىعىلىپ توي جاساپ, جاسىرىنىپ اس ۇيىمداستىرىپ, ءتارتىپ بۇزۋ تىيىلمادى.
جۇقپالى دەرتپەن جاعالاسۋعا ۇيرەنگەن, ازدى-كوپتى تاجىريبەسى قالىپتاسقان دەنساۋلىق ساقتاۋ سالاسى دەرتكە شالدىققاندارعا كومەك كورسەتۋگە ءازىر. بۇگىنگى تاڭدا وبلىستا كوروناۆيرۋستىڭ قارماعىنا ىلىككەندەردى ەمدەۋ ءۇشىن 870 توسەكتىك ورىن دايىندالعان. بۇعان قوسا 105 رەانيماتسيالىق ورىن دا بار. قازىرگى كۇنى جۇقپالى اۋرۋلار اۋرۋحانالارىندا 432 ناۋقاس ەم قابىلداۋدا. بۇل – بارلىق ورىننىڭ 50 پايىزى. 30 ادام – جانساقتاۋ بولىمىندە. بۇل جەردەگى توسەكتىك ورىننىڭ قامتىلۋ كورسەتكىشى – 28 پايىز. ەگەر «جامان ايتپاي, جاقسى جوق» دەگەندەي, ىندەت ءورشىپ كەتسە, ەم قابىلداۋ قولجەتىمدى بولۋى ءۇشىن بارلىعى 3 مىڭنان اسا توسەكتىك ورىن دايىندالعان. دەمەك بۇل ورايداعى قامدانۋ قاپىسىز دەپ ايتۋعا بولادى.
جۇقپالى اۋرۋمەن كۇرەس شاراسىنا بارلىعى 930 مەديتسينا قىزمەتكەرى تارتىلىپ وتىر. ونىڭ 176-سى – دارىگەر. ىندەت العاش پايدا بولعان كەزدە مەديتسينا قىزمەتكەرلەرىنىڭ تاپشىلىعى بايقالعان ەدى. ءوز باسىن قاتەرگە تىككەن سالا قىزمەتكەرلەرىنىڭ وزدەرى دە كوپ اۋىردى. وسى جايدى ەسكەرگەندىكتەن, قاجەت بولا قالسا, حالىققا قىزمەت كورسەتۋگە 332 مەديتسينا قىزمەتكەرى دايىندالعان. ونىڭ 102-ءسى – دارىگەر. قولدانىستاعى توسەك-ورىنمەن قامتاماسىز ەتۋ 100 پايىزدى قۇرايدى. شۇعىل شاقىرتۋلارعا وبلىستىق جەدەل جاردەم ستانساسىنىڭ 59 فەلدشەرلىك بريگاداسى قىزمەت كورسەتەدى.
كوروناۆيرۋس ينفەكتسياسىمەن كۇرەس اياسىندا وبلىستىق مەديتسينا ۇيىمدارىندا 802 ملن تەڭگە قاراجات كولەمىندەگى ءدارى-دارمەك پەن مەديتسينالىق ماقساتتاعى بۇيىمداردىڭ ەكى ايلىق قورى جاساقتالعان. كۇندىزگى ستانتسيوناردا جالپى قۇنى 105 ملن تەڭگە بولاتىن ءدارى-دارمەك قورى بار. ناۋقاستارعا تەگىن بوساتىلاتىن ءدارىنىڭ قولداعى قورىنىڭ جالپى قۇنى – 79 ملن تەڭگە.
وڭىردە 133 ەگۋ پۋنكتى مەن 135 ءموبيلدى بريگادا جۇمىس ىستەيدى. ۆاكتسينا ەگۋگە 564 مەديتسينا قىزمەتكەرى تارتىلعان. سونىمەن قاتار اقكول, ارشالى, استراحان ءتارىزدى 11 اۋداندا ەكپە ەگەتىن جىلجىمالى مەديتسينالىق كەشەن بار.
– دەرتتىڭ الدىن الۋ تەك قانا ەكپەگە بايلانىستى. بۇل – مەنشىك تۇرىنە قاراماستان ۇيىم جۇمىسىن توقتاتپاۋدىڭ بىردەن ءبىر جولى. ماسەلەن, 100 پايىز ۆاكتسينا العان ۇجىمنىڭ ءبىر قىزمەتكەرى اۋىرا قالسا, ۇجىم جۇمىسى شتاتتىق رەجىمدە جالعاسا بەرەدى, – دەيدى وبلىستىق دەنساۋلىق ساقتاۋ باسقارماسىنىڭ باسشىسى ناريمان سىزدىقوۆ.
باس دارىگەردىڭ ايتۋىنا قاراعاندا, ۆاكتسينا الماعان جاعدايدا ءبىر قىزمەتكەرى اۋىرا قالسا, ۇجىمنىڭ بارلىعى پتر-تەست تاپسىرىپ, كارانتينگە جىبەرىلەدى.
وتكەننەن ساباق العان دۇرىس. دەرتتىڭ دەڭگەيى نەگە وسكەندىگىن ەلدىڭ ءبارى كورىپ, ءبىلىپ وتىر. سوندىقتان الداعى ۋاقىتتا بەيساۋات ءجۇرىستى تىيىپ, ۋاقتىلى ەكپە الىپ, ساقتاندىرۋ شارالارىن بۇلجىتپاي ورىنداعان ءجون.
اقمولا وبلىسى