قازاقستاننىڭ 1-ءشى, الەمنىڭ 37-راكەتكاسى الەكساندر بۋبليك اۋستراليا اشىق چەمپيوناتىنىڭ ءۇشىنشى اينالىمىنا شىعا المادى, دەپ حابارلايدى Egemen.kz.
ا.بۋبليك ەكىنشى اينالىمدا الەمنىڭ 20-راكەتكاسى, فرانتسيالىق گاەل مونفيسپەن كەزدەستى. قازاقستاندىق تەننيسشى قارسىلاسىن 2020 جىلعى فرانتسيا اشىق چەمپيوناتىندا ۇتقان بولاتىن.
بۇل جولى العاشقى ەكى پارتيادا بۋبليكتىڭ ويىنى جۇرمەي, ءجيى قاتەلەستى - 1:6, 0:6. ءۇشىنشى سەتتە قارسىلاسىپ باققانمەن, جەڭىس ءمونفيستىڭ ەنشىسىندە كەتتى - 6:4. فرانتسيالىق سپورتشى ءۇشىنشى اينالىمدا الەمنىڭ 19-راكەتكاسى, چيليلىك كريستيان گارينمەن شەبەرلىك بايقاسادى. گ.مونفيس 1 ساعات 29 مينۋتقا سوزىلعان كەزدەسۋدە 11 ەيس جاساپ, 15 برەيك-پوينتتىڭ بەسەۋىن پايدالانا ءبىلدى.
ا.بۋبليك 4 ەيسپەن عانا شەكتەلىپ, 4 برەيك-پوينتتان ەش ناتيجە شىعارا المادى. ول وتكەن جىلى دا اۋستراليا اشىق چەمپيوناتىندا ەكىنشى اينالىمنان اسا الماعان ەدى.
وسىلايشا اتالمىش بىرىنشىلىكتە جەكەلەي سىندا قازاقستاننان ەلەنا رىباكينا عانا قالدى.