ءۇشىنشى سىنىپتىڭ وقۋشىلارى 3D مودەل جاساپ وتىرعانىن كورىپ, تاڭعالدىق. كومپيۋتەرمەن مۇنداي انيماتسيانى وقىعان, توقىعان ماماندار جاسار ەدى. ەلىمىزدە كەنجە قالعان بۇل سالا وسى قارقىنمەن داميتىن بولسا, ءالى-اق شەتەلدىك انيماتورلارمەن ۇزەڭگى قاعىستىرامىز دەپ ءتۇيدىم ىشتەي.
وسكەمەندەگى «زەرەك» ورتالىعىندا سان ءتۇرلى ۇيىرمەلەر بار. سولاردىڭ ىشىنەن كوزگە ەرەكشە تۇسكەنى وسى, 3D مودەلدەۋ. بۇرىن-سوڭدى قولعا الىنباعان تىڭ جوبانىڭ جەتەكشىسى – جاننۇر باقىتقىزى. ەرەكشەلىگى سول, ەكراندا جاساعان دەتالدى 3D پرينتەرمەن كادىمگى ءمۇسىن ەتىپ شىعارۋعا بولادى. ءتىپتى كولىكتىڭ دۇكەندەردەن تابىلا بەرمەيتىن پلاستماسس تەتىگىن دە دالدەپ تۇرىپ جاساپ العان ەكەن.
– و باستا كيىمنىڭ 3D مودەلىن جاساي باستاعانمىن. كەيىن «زەرەك» ورتالىعىنا جۇمىسقا ورنالاسىپ, «شەبەر قول» ۇيىرمەسىن وتكىزىپ ءجۇردىم. كوپ ۋاقىت وتپەي 3D مودەلدەۋ ۇيىرمەسى اشىلاتىن بولىپ, مەن ارنايى كۋرستان ءوتتىم. ارنايى كابينەت اشىلىپ, زاماناۋي قۇرال-جابدىقتار ورناتىلدى. قازىر وقۋشىلار قىزىعا قاتىسىپ ءجۇر. ەگەر نيەت بولسا, انيماتسيا جاساۋدى ۇيرەنۋ قيىن ەمەس. قازىر بالالارمەن جەكە-جەكە جوبالار جاساپ جاتىرمىز. الداعى ۋاقىتتاردا مۋلتفيلم كەيىپكەرلەرىن جاساۋدى قولعا الامىز , – دەيدى 3D مودەل جاساۋدىڭ مامانى جاننۇر باقىتقىزى.
قازىرگى ۋاقىتتا اتالعان ۇيىرمەدە قازاقتىڭ سالت-داستۇرلەرىنە نەگىزدەلگەن ويىن قۇراستىرىپ جاتىر. ال ەكىنشى جوبا, عيماراتتىڭ ىشكى كورىنىسىن 3D فورماتتا جاساۋدى باستاعان. ياعني «زەرەك» ورتالىعىن ونلاين تۇردە ارالاپ شىعۋعا بولادى. جاننۇر باقىتقىزىنىڭ ايتۋىنشا, وقۋشىلار ابدەن داعدىلانعان سوڭ قالا ءىشىن دە جاساۋعا بولادى. ءيا, قازىرگى بالالاردىڭ قابىلداۋى تەز, ويلارى ۇشقىر. بالالاردىڭ گادجەت, پلانشەتكە اۋەستىگىنىڭ ءبىر پايداسى وسى, تەحنيكا جاعىنا يكەمىن ارتتىرادى.
– مەن كومپيۋتەرمەن ءارتۇرلى اڭداردى جاساۋدى ۇيرەنىپ ءجۇرمىن. ولاردى جۇگىرتەمىن, سەكىرتەمىن. ماعان ۇنايدى. وسكەندە مۋلتفيلم جاسايمىن, – دەيدى بەكزات تىلەۋحان ەسىمدى وقۋشى.
قانداي قۋانىش دەسەڭىزشى. ەلدىڭ ەرتەڭى وسىلار ەمەس پە؟! وسىلارعا قاراپ, تەحنيكالىق ماماندارى دامىعان ەلگە اينالارىمىز انىق ەكەنىن ۇقتىم.
وسكەمەن