ونەر سۇيەر قاۋىم ءجاميلا تاكەندى شىعارماشىلىق كەڭىستىكتە ءوز ءۇنى, ءوز بوياۋى بار, ء«داستۇرلى كەسكىندەمە» اياسىندا شەبەر جۇمىس ىستەي الاتىن ءارى ونەردىڭ وسى تۇرىنە دەگەن ادالدىعى انىق بايقالاتىن كونتسەپتۋالدى زاماناۋي سۋرەتشى دەپ باعالايدى. قىلقالام يەسىنىڭ ءا.قاستەەۆ مۋزەيىندە اشىلعان «كورۋ ءۇشىن كوزىمدى جۇمدىم» دەپ اتالعان كورمەسىنە تاڭداۋلى 100 تۋىندىسى قويىلعان.
ۇلكەن فورماتتاعى كەنەپتەر سيۋجەتتىك-تاقىرىپتىق, كولوريستىك, يدەيالىق پرينتسيپ بويىنشا ءوزارا تۇتاسادى. ۇيانىڭ, قاڭباقتىڭ, دالانىڭ, اعاشتىڭ, تاستىڭ بەينەلەرى وزىندىك لەيتموتيۆكە اينالعان. وبراز قانداي بولسا دا, ءجاميلانىڭ تراكتوۆكاسىندا ول ەرەكشە سيمۆوليكالىق تۇسىنىكتەمەگە, فيلوسوفيالىق وقىلىمعا يە. دومالانعان سەلدىر قاڭباقتار – ۋاقىت پەن كەڭىستىكتى ەڭسەرە الاتىن ماڭگىلىك ساياحاتشىلار. ادام وبرازىنا اينالعان تاستار – وتكەننىڭ ءۇنسىز باقىلاۋشىلارى ءارى بولاشاق تۋرالى ويلاۋشىلار. ۇيا – قارا شاڭىراقتىڭ نازىك تە وسال بەينەسى, ءومىردىڭ باستالۋى مەن جالعاسۋىنىڭ سيمۆولى. شەتسىز-شەكسىز دالا – ەجەلگى تاريحتىڭ شىنايى ءارى ويدان شىعارىلعان سيۋجەتتەرى اشىلاتىن شەكسىز عالامات كەڭىستىك.
ءيا, كورمەنىڭ «كورۋ ءۇشىن كوزىمدى جۇمدىم» دەپ اتالۋى تەگىن ەمەس. ءتۇرلى جاعدايلارعا بايلانىستى سۋرەتشى شىعارماشىلىقتىڭ ءوز ومىرىندەگى باعا جەتپەس ماڭىزدىلىعىن ناق پايىمداعان بەتبۇرىس كەزەڭىن باستان وتكەردى. ول ءۇشىن ءومىردىڭ ماڭىزدى وقيعالارىن, ءوز اسەرلەرىن, ەستەلىكتەرىن, رەفلەكسيالارىن پايىمداۋ كەزىندە «ىشكى كوزقاراسقا» جۇگىنۋ كوركەمدىك ءوزىن ءوزى انىقتاۋدىڭ ماڭىزدى فاكتورىنا اينالدى. دەسە دە شىعارماشىلىقتاعى 15 جىلدىق ءۇزىلىس ونىڭ قىلقالامىن ودان سايىن قۋاتتاندىرىپ, جاڭا تىنىسىن اشقانداي. بۇگىنگى تاڭدا ول كەرەمەت ەڭبەكقورلىعىن كورسەتىپ, شىعارماشىلىق الەۋەتىن اشۋعا, ءسويتىپ ۇيلەسىم مەن جاسامپازدىق قۋانىشىن تاۋىپ, شاراسىز توقتاپ قالعان كەزەڭنىڭ ەسەسىن قايتارۋعا تىرىساتىن سەكىلدى. كورمەگە قويىلعان تۋىندىلاردىڭ باسىم بولىگى سوڭعى ەكى جىلدا كەنەپكە تۇسكەن.
– ونىڭ كارتينالارىندا درامالىق سيۋجەتتەر دەيسىز بە, ءتىپتى اپوكاليپسيستىككە دەيىنگى كورىنىستەرگە دەيىن پايدا بولادى. اۆتوردىڭ ارال قاسىرەتىن ءتۇسىندىرۋى نەمەسە قۇرباندىققا بارا جاتقان وتاردىڭ الداعى قايعىلى شاراسىزدىق كۇيى ءدال وسىنداي تراكتوۆكاعا يە. بىرقاتار جۇمىستار پاندەميانىڭ جاڭا جاعدايىندا سالىنعانىنا بايلانىستى ىشكى الاڭداۋشىلىققا تولى. ءتۇسى – شىمىر, كەيدە شامادان تىس, ول ءوزىنىڭ تانىمال «اۆتورلىق» پاليتراسىن تاپقان. جارقىراعان قىزىل ءتۇستىڭ ەكپىندى رەڭكتەرى بار كۇردەلى گامما كومپوزيتسياعا درامالىق دىبىس نەمەسە اۆتوردىڭ الدىنا قويعان مىندەتتەرىنە بايلانىستى ساندىك مازمۇن بەرەدى. اۆتوردىڭ ءوزى قىزىلدى ەنەرگيانى كوپ قاجەت ەتەتىن ءتۇس دەپ سانايدى. قازىرگى زامانعى وقىلىمعا يە بولعان كونە تاڭبالار – جارتاستاعى بەينەلەر بار كوللاج ەلەمەنتتەرى مەن ويۋ-ورنەك ەلەمەنتتەرى ەنگىزىلگەن ساندىك كەنەپتەرى ءبىر توبە. بىرقاتار كارتينالار سۋرەتشىنىڭ باستى كەيىپكەرىنە – كوپتەگەن فۋنكتسياسى بار ايەل ادامعا – اناسىنا, سۇيىكتىسىنە, جاس قىزعا نەمەسە ءومىر جولىنىڭ باسىندا تۇرعان كىشكەنە قىز بالاعا ارنالعان. كوبىنەسە ناقتى پروتوتيپتەرگە يە بولعان بۇل بەينەلەر ءمىنسىز ءارى مەيىربان ايەلدىڭ ۇجىمدىق بەينەسىن جاساۋعا باعىتتالعان, – دەيدى كورمە جەتەكشىسى, ونەرتانۋشى ەكاتەرينا رەزنيكوۆا.
ءجاميلا تاكەن – كەسكىندەمەنىڭ كولوريستىك مۇمكىندىكتەرىن ىزدەۋدە, شىعارماشىلىق ءتىلدىڭ وزگەرمەلىلىگىندە, قازىرگى زاماننىڭ وتكىر الەۋمەتتىك ماسەلەلەرىن كوركەمدىك قۇرالدارمەن بىلدىرۋگە دەگەن ۇمتىلىستا كورىنەتىن ەكسپەريمەنتتىڭ شەبەرى. زامانا زاپىرانىن ءدال باسىپ, بۇگىنگى كۇننىڭ وقيعالارىنا بەي-جاي قاراماۋى ونىڭ قالام قۋاتىنىڭ ازاماتتىق ءۇنىن سەزدىرەدى.
ءجاميلا تاكەننىڭ وقيعاعا تولى ءومىربايانى ونىڭ جەكە باسىنىڭ سان قىرىن اشادى. اۆتور ءومىرىنىڭ كوپ بولىگىن وقىتۋشىلىق قىزمەتكە ارنادى. بۇگىنگى تاڭدا ول جاقىندا عانا حالىقارالىق مارتەبەگە يە بولىپ, قىزمەتى سوڭعى ۋاقىتتا ايتارلىقتاي جاندانا باستاعان «تاڭ شولپان» ايەلدەر كوركەمدىك قاۋىمداستىعىنىڭ جەتەكشىسى.
الماتى