ەلدە بولعان جاپپاي تارتىپسىزدىكتەرگە قازاقستانداعى ەتنوس وكىلدەرى قاتىسقان جوق. بۇل تۋرالى قازاقستان حالقى اسسامبلەياسى توراعاسىنىڭ ورىنباسارى مارات ءازىلحانوۆ ءمالىم ەتتى, دەپ حابارلايدى Egemen.kz.
«بىرىنشىدەن, قازاقستان حالقى اسسامبلەياسى كەز كەلگەن زاڭعا قايشى كەلەتىن ارەكەتكە قارسى. بۇزاقىلىق پەن لاڭكەستىككە جول جوق. قازاقستاننىڭ ەتنوس وكىلدەرى ەلدە بولعان زاڭسىز اكتسيالار مەن جاپپاي تارتىپسىزدىكتەرگە قاتىسقان جوق. ارانداتۋشىلىق ارەكەتتەرگە قاراماستان, قازاقستان حالقى اۋىزبىرشىلىگىن جوعالتپادى. ەكىنشىدەن, جاپپاي ەرەۋىل كۇندەرى بايلانىستىڭ بولماۋىنا قاراماستان ءماجىلىس دەپۋتاتتارى, مەملەكەتتىك ورگان وكىلدەرى, قوعام قايراتكەرلەرى, اسسامبلەيا مۇشەلەرى مەن رەسپۋبليكالىق جانە ايماقتىق قوعامدىق قۇرىلىم قىزمەتكەرلەرى حالىق اراسىندا ءتۇسىندىرۋ جۇمىسىن جۇرگىزدى», دەدى مارات ءازىلحانوۆ.
ونىڭ ايتۋىنشا, بۇگىندە قازاقستان حالقى اسسامبلەياسى مۇشەلەرى ەلدى قالپىنا كەلتىرۋ شارالارىنا بەلسەندى قاتىسىپ جاتىر.
«وڭىرلەردە ۆولونتەرلىك اكتسيالار ۇيىمداستىرىلىپ, زارداپ شەككەن جاندارعا كومەك كورسەتىلۋدە. سونداي-اق قايىرىمدىلىق شاراسى دا قولعا الىندى. وسى ورايدا «اسسامبلەيا جاستارى» ۇيىمىنا العىس ايتقىم كەلەدى. ءبىزدىڭ ۆولونتەرلەر جاپپاي تارتىپسىزدىكتەر كەزىندە قىزمەتتەگى قۇقىق قورعاۋ ورگاندارى قىزمەتكەرلەرى مەن كوممۋنالدىق قىزمەت جۇمىسشىلارىنا ىستىق تاماق ۇيىمداستىردى. ودان بولەك, نۇر-سۇلتان, الماتى, تاراز قالالارىندا بەلسەندى ازاماتتار دونور بولىپ قان تاپسىردى. جالپى بارلىق وڭىرلەردە ەل ءومىرىن قايتا قالپىنا كەلتىرۋ جۇمىسى جالعاسۋدا», دەدى ول.