شىعىس قازاقستان وبلىسى كوروناۆيرۋستىق ينفەكتسيانىڭ تارالۋ قارقىنى بويىنشا «قىزىل» ايماققا كوشتى, دەپ حابارلايدى Egemen.kz وبلىس اكىمدىگىنىڭ ءباسپاسوز قىزمەتىنە سىلتەمە جاساپ.
ەپيدەميولوگيالىق جاعدايدى باعالاۋ ماتريتساسىنىڭ دەرەكتەرىنە سايكەس, 16 قاڭتارداعى جاعداي بويىنشا ەلىمىزدىڭ بارلىق وڭىرلەرى «وميكرون» شتامىنىڭ اينالىمى مەن COVID-19 جۇقتىرۋ جاعدايلارىنىڭ كوبەيۋىنە بايلانىستى «قىزىل» ايماقتا تۇر.
دەنساۋلىق ساقتاۋ باسقارماسىنىڭ رەسمي دەرەكتەرى بويىنشا, وسى جىلدىڭ 17 قاڭتارىنداعى جاعداي بويىنشا وڭىردە ءبىر تاۋلىك ىشىندە ينفەكتسيا جۇقتىرۋدىڭ 213 جاڭا جاعدايى تىركەلگەن. ونىڭ ىشىندە 199 سيمپتومدىق جانە 14 سيمپتومسىز ۆيرۋس تاسىمالداۋشىلار بار. دەسە دە, وبلىس اۋماعىندا «وميكرون» شتامى انىقتالعان جوق.
اۋرۋحانالارداعى توسەك-وىرن قامتىلۋىنىڭ جالپى كورسەتكىشى 9,6 پايىزدى قۇرايدى. ءبىر تاۋلىك ىشىندە ءتورت ناۋقاس ساۋىعۋىنا بايلانىستى ستاتسيونارلاردان شىعارىلدى. ستاتسيونار جاعدايىندا بارلىعى 183 ناۋقاسقا ەم كورسەتىلەدى.
شقو سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى عالىمبەك ءالين بريفينگتە وڭىردەگى ەپيدەميولوگيالىق جاعداي تۋرالى باياندادى.
«17 قاڭتاردا وبلىستىڭ باس سانيتارلىق دارىگەرىنىڭ جاڭا قاۋلىسى شىقتى, وعان سايكەس ايماقتا سانيتارلىق-كارانتيندىك شارالاردى قاتاڭداتۋ قايتا ەنگىزىلەدى», دەدى ول.