بۇعان دەيىن ايماقتىڭ كومەندانتى قارۋ مەن وق-ءدارىنى ءوز ەركىمەن تاپسىرعاندار جازاعا تارتىلمايتىنىن ايتقان, دەپ حابارلايدى Egemen.kz «حابار 24» اراناسىنا سىلتەمە جاساپ.
سودان بەرى 102 نومەرىنە تاراز قالاسى مەن اۋدانداردان تولاسسىز قوڭىراۋ ءتۇسىپ جاتقان كورىنەدى. ءبىر تاۋلىكتە ءتارتىپ ساقشىلارى 40-تان اسا قارۋ مەن وق-ءدارى قابىلداعان. اراسىندا ءانونيمدى اقپارات بەرۋمەن شەكتەلەتىندەرى دە بار. ماسەلەن, قوڭىراۋ شالعان قالا تۇرعىنى قارۋدىڭ جاتقان جەرىن عانا ايتقان. مەكەنجايعا شۇعىل جەتكەن قۇزىرلى مەكەمە وكىلدەرى ءۇش كالاشنيكوۆ اۆتوماتى مەن گراناتومەت تاپقان. قازىر قاۋىپتى زاتتار ساراپتاماعا جىبەرىلگەن.
- قارۋدىڭ, وق-دارىلەردىڭ, ارنايى قۇرالداردىڭ ورنى تۋرالى حابارلاعان نەمەسە ونى ەرىكتى تۇردە پوليتسياعا تاپسىرعان ازاماتتار قىلمىستىق جانە اكىمشىلىك جاۋاپقا تارتىلمايدى. قۇپيالىلىققا كەپىل بەرىلەدى, - دەدى وبلىس كومەندانتى باقىت راتاەۆ.