نۇر-سۇلتان قالاسى اكىمىنىڭ ەكس-ورىنباسارى قانات سۇلتانبەكوۆ پەن «استانا LRT» جشس-نىڭ بۇرىنعى باسشىسى تالعات اردان جاۋاپ الۋعا شاقىرىلدى, دەپ حابارلايدى Egemen.kz باس پروكۋراتۋرانىڭ ءباسپاسوز قىزمەتىنە سىلتەمە جاساپ.
ۆەدومستۆو مالىمەتىنشە, نۇر-سۇلتان قالاسى اكىمىنىڭ بۇرىنعى ورىنباسارى قانات سۇلتانبەكوۆكە, «استانا LRT» جشس باسقارما توراعاسى تالعات اردانعا جانە باسقا دا تۇلعالارعا قاتىستى «استانانىڭ جاڭا كولىك جۇيەسى» LRT, BRT/ITS جوباسىن ىسكە اسىرۋعا بولىنگەن بيۋدجەت قاراجاتىن جىمقىرۋ دەرەگى بويىنشا قىلمىستىق ءىس تەرگەلىپ جاتىر.
«تەرگەۋ جيناعان ايعاقتار كۇدىكتى سۇلتانبەكوۆتىڭ ءىس-ارەكەتىن قىلمىستىق كودەكستىڭ 1997 جىلعى رەداكتسياسىنداعى 176 («ۇيىمداسقان توپ قۇرامىندا قىزمەت بابىن پايدالانا وتىرىپ, اسا ءىرى مولشەردە بيۋدجەت قاراجاتىن بىرنەشە رەت ۇرلاۋ»), 235 («بىرنەشە قىلمىس جاساۋ ماقساتىندا ۇيىمداسقان توپ قۇرۋ جانە ونى باسقارۋ») باپتارى جانە قولدانىستاعى قك-ءنىڭ 189-بابى («ۇيىمداسقان توپ قۇرامىندا قىزمەت بابىن پايدالانا وتىرىپ, اسا ءىرى مولشەردە بيۋدجەت قاراجاتىن بىرنەشە رەت ۇرلاۋ») بويىنشا سارالاۋعا مۇمكىندىك بەردى.
ارداننىڭ زاڭسىز ارەكەتتەرى 1997 جىلعى قك-ءنىڭ 176-بابى, 262-بابى («قىزمەت بابىن پايدالانا وتىرىپ ۇيىمداسقان قىلمىستىق توپقا قاتىسۋ») جانە قولدانىستاعى قك-ءنىڭ 189-بابى بويىنشا سارالاندى», دەلىنگەن باس پروكۋراتۋرا حابارلاماسىندا.
تەرگەۋ ارەكەتتەرىنە قاتىسۋ ءۇشىن كۇدىكتىلەر قورعاۋشىنى ءوز بەتىنشە شاقىرۋعا نە قىلمىستىق پروتسەستى جۇرگىزەتىن ورگاننىڭ قورعاۋشىنىڭ قاتىسۋىن قامتاماسىز ەتۋى تۋرالى ءوتىنىش جاساۋعا قۇقىلى.
«ەگەر قورعاۋشىنى كۇدىكتىلەر نەمەسە ولاردىڭ زاڭدى وكىلدەرى, سونداي-اق ولاردىڭ تاپسىرمالارى بويىنشا باسقا دا ادامدار شاقىرماسا, قورعاۋشىنىڭ قاتىسۋىن قىلمىستىق پروتسەستى جۇرگىزەتىن ورگان قامتاماسىز ەتەدى», دەپ ءتۇسىندىردى باس پروكۋراتۋرا.