2021 جىلدىڭ قورىتىندىسى بويىنشا 17 540 ەتنيكالىق قازاق تاريحي وتانىنا ورالىپ, قانداس مارتەبەسىن الدى. جالپى 1991 جىلدان بەرى رەسپۋبليكاعا 1 ميلليون 87,8 مىڭ ەتنيكالىق قازاق ورالدى, دەپ جازادى Egemen.kz قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
2021 جىلى قازاقستانعا كەلگەن قانداستاردىڭ جارتىسىنان استامى (76,2%) وزبەكستاننان, 9,7% – قحر-دان, 6% – تۇرىكمەنستاننان, 2,6% – موڭعوليادان جانە 5,7% – باسقا ەلدەردەن كەلگەن.
كەلگەن ەتنيكالىق قازاقتار نەگىزىنەن الماتى (28,5%), ماڭعىستاۋ (19%), تۇركىستان (13%) جانە جامبىل (7,8%) وبلىستارىنا, سونداي-اق شىمكەنت (10,5%) قالاسىنا قونىستاندى.
وسى جىلعى 1 قاڭتارداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 55,2%-دى, ەڭبەككە قابىلەتتى جاستان كىشى 28%-دى جانە زەينەتكەرلەر 16,8%-دى قۇرايدى.
ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 11,1%-ىنىڭ جوعارى ءبىلىمى, 40,1%-ىنىڭ ورتا كاسىبي ءبىلىمى, 45,6%-ىنىڭ جالپى ورتا ءبىلىمى بار جانە 3,1%-ىنىڭ ءبىلىمى جوق.