وبلىس اكىمى ماحامبەت دوسمۇحامبەتوۆتىڭ ايتۋىنشا, پرەزيدەنتتىڭ تاپسىرماسىنا سايكەس, ەكونوميكالىق ءارى ستراتەگيالىق ماڭىزى بار ءىرى ونەركاسىپ ورىندارىنا اسكەري كۇزەت قويىلعان. ونىڭ قاتارىندا ح.دوسپانوۆا اتىنداعى حالىقارالىق اۋەجاي مەن تەمىر جول ۆوكزالى, جىلىوي اۋدانىندا ورنالاسقان «تەڭىز» كەن ورنى مەن وزگە دە نىساندار بار.
«تەڭىزشەۆرويل» جشس يگەرىپ جاتقان بۇل كەن ورنىنىڭ الەمدە بالاماسى جوق. قازىر كەن ورنىندا ەكى جوبانى ىسكە اسىرۋ اياقتالۋعا تايالدى. ونىڭ ءبىرى – كەلەشەك كەڭەيۋ, ەكىنشىسى – ۇڭعى ەرنەۋىندەگى قىسىمدى باسقارۋ جوباسى. بۇل جوبالار ىسكە قوسىلعاندا «تەڭىزدەن» الىناتىن «قارا التىن» كولەمى 12 ملن تونناعا ارتىپ, جىلىنا 39 ملن تونناعا جەتەدى.
«مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس, اتىراۋ وڭىرىندەگى ەكونوميكالىق ءارى ستراتەگيالىق ماڭىزدى ءىرى ونەركاسىپ ورىندارىنا اسكەري كۇزەت قويىلدى. ونىڭ ىشىندە «تەڭىز» كەن ورنى دا بار. بۇل كەنىشتەگى ءوندىرىس ورىندارىن قازاقستاننىڭ قارۋلى كۇشتەرىنىڭ اسكەريلەرى مەن وبلىستىق پوليتسيا دەپارتامەنتىنىڭ قىزمەتكەرلەرى «تەڭىزشەۆرويل» كومپانياسىنىڭ كۇزەت قىزمەتى وكىلدەرىمەن بىرلەسە كۇزەتىپ تۇر. ولاردىڭ اراسىندا ۇجىمدىق قاۋىپسىزدىك تۋرالى شارت ۇيىمىنىڭ (ۇقشۇ) اسكەرلەرى جوق» دەپ حابارلادى وبلىس اكىمىنىڭ ءباسپاسوز قىزمەتى.
مۇنايلى شاھارعا ءتورت باعىتتان كىرەتىن اۆتوكولىك جولىنا قويىلعان بلوك-بەكەتتەردە جۇرگىزۋشىلەر مەن جولاۋشىلار, كولىكتىڭ جۇك سالعىشى ءجىتى تەكسەرىلىپ جاتىر. توتەنشە جاعداي ەنگىزىلگەننەن بەرى كومەندانتتىق ساعات تالابى 78 رەت بۇزىلعانى بەلگىلى بولدى. ماسەلەن, 9 قاڭتارعا قاراعان ءتۇنى اتىراۋ قالاسىندا تۇنگى مەزگىلدە جۇمىس ىستەپ تۇرعان ءۇش ازىق-ت ۇلىك دۇكەنىنىڭ جۇمىسى توقتاتىلدى.
وبلىستىق اۋرۋحانانىڭ باس دارىگەرى ەربول يمانعاليەۆتىڭ مالىمەتىنە سۇيەنسەك, جاپپاي تارتىپسىزدىكتەن كەيىن دارىگەرلەرگە ءتۇرلى جاراقات العان 62 ادام جۇگىنگەن. قازىر 7 ادام اۋرۋحانادا جاتىر. ونىڭ ىشىندە 5 ناۋقاستىڭ جاعدايى تۇراقتى, ال قۇقىق قورعاۋ ورگانىندا جۇمىس ىستەيتىن 2 قىزمەتكەردىڭ ءحالى ورتاشا اۋىر دەپ باعالانىپ وتىر.
ال اتىراۋ ماگيسترالدىق جەلى بولىمشەسىنىڭ ديرەكتورى ەلۋباي ساپاروۆتىڭ مالىمەتىنە سۇيەنسەك, جەرگىلىكتى تەمىرجولشىلار قان قورىن مولايتۋدى ۇيعاردى. «ەلىمىزدە بولعان جاپپاي تارتىپسىزدىكتەن قۇقىق قورعاۋ ورگاندارى مەن اسكەريلەردىڭ قازا تاپقانى جانىمىزعا باتىپ وتىر. زارداپ شەككەندەر دە از ەمەس. وڭىردەگى تەمىر جول سالاسىندا جۇمىس ىستەيتىن 2 مىڭعا جۋىق تەمىرجولشى جاراقات العانداردى قولداۋ ءۇشىن قان تاپسىرۋعا ۇيعارىم جاسادى. الدىمەن 70-كە جۋىق تەمىرجولشى جاپپاي تارتىپسىزدىكتەن زارداپ شەككەندەر ءۇشىن قان تاپسىردى», دەپ ءمالىم ەتتى ول.
اتىراۋ وبلىسى