دەرت دەندەمەسىن دەسەك...

ەل شەتىنە ىندەت جەتكەن 2020 جىلى 7 247 ادام دەرتكە دۋشار بولسا, 2021 جىلى بۇل كورسەتكىش 6 ەسەگە ءوسىپ, 42 434-كە دەيىن جەتكەن. ال جىل باسىنان بەرى 353 ادام ىندەتتى جۇقتىرىپ ۇلگەرىپتى. ىندەتتىڭ ەتەك الۋ سەبەپتەرىن ال­دەنەشە رەت جازدىق. وڭىردە توي-تومالاق, اس تىيىلمادى. حالىقتىڭ ەتى ۇيرەنىپ كەتكەن بولۋى كەرەك, ساقتىق شارالارى دا ساقتالا بەرمەيدى.

– پاندەميالىق احۋال تۇراق­تى. «جاسىل ايماقتامىز». ءۇمىت ارتقان ۆاكتسينالاۋ ءوز ناتيجە­سىن بەرۋدە. جاپپاي ەكپە ەگۋ­­دىڭ ناتيجەسىندە COVID-19 ىندە­تىن جۇقتىرعاندار سانى 5 ەسەگە ازاي­دى. ماسەلەن, وتكەن جىل­­دىڭ تامىز ايىندا 8 334 ادام دەرت­­كە شالدىعىپ, ناۋقاستاردىڭ 1 425-ءى ستا­تسيونارلارعا جاتقىزىل­سا, جەلتوقسان ايىندا ىندەتتى جۇق­­­­تىر­عان 1 622 تۇرعىن­نىڭ 200-ءى اۋرۋحانادان ەم الدى, – دەيدى وبلىستىق دەنساۋلىق ساق­تاۋ باس­قارماسىنىڭ باسشىسى ناري­مان سىزدىقوۆ.

بۇگىنگى تاڭدا جانساقتاۋ بو­لىمىندە جاتقانداردىڭ سا­نى كەمىدى. بۇل رەتتە ىندەت جۇقتى­رۋشىلاردىڭ قاتارى ازايۋمەن بىرگە اۋرۋحانالارداعى توسەكتىك ورىن­داردىڭ دا قىسقارعانىن ايتا كەتۋ كەرەك. ناقتى دەرەكتەرگە جۇگىنسەك, وڭىردەگى اۋرۋحا­نالاردا 1 مىڭنان استام توسەكتىك ورىن قىسقارتىلدى. جانساقتاۋ بولىمىندە دە 56 ورىن ازايتىلعان. دەگەنمەن ىندەت ۋشىعىپ كەتسە, قوسىمشا 3 مىڭ توسەكتىك ورىن دايىن. وتكەن جىلدىڭ اقپان ايى­نان باستاپ 300 مىڭنان اس­تام اقمولالىق ەكپە سالدىرسا, 25 399 ادام ءۇشىنشى مارتە ەكپە العان. ال Pfizer ۆاكتسيناسىنىڭ ەكى كومپونەنتىن دە 2 143 ادام الىپ ۇلگەرگەن. وبلىستىق دەنساۋلىق ساقتاۋ باسقارماسىنىڭ ءما­لى- ­مە­­تىنە قاراعاندا, وتكەن جى­لى جال­­پى قۇنى 6,2 ملرد تەڭگە كو­­لە­­مىندەگى ءدارى-دارمەك جەتكىزىل­گەن. ونىڭ 99,9 پايىزى پايدالا­نىلعان.

– ەلدە جاريالانعان توتەن­شە جاعداي كەزىندە تەگىن بوسا­تىلاتىن ءدارى-دارمەكتەردى وڭىرگە جەتكىزۋگە ەشقانداي كەدەرگى بولىپ وتىرعان جوق. ناۋقاستار­دىڭ باسىم بولىگى تەگىن دارىلەرمەن قامتاماسىز ەتىلۋدە. قوردا دا تەگىن ءدارى-دارمەكتىڭ كولەمى جەتكىلىكتى, – دەدى ن.سىزدىقوۆ.

بۇدان باسقا, قۇقىق قورعاۋ ورگاندارىنىڭ مالىمەتتەرىنە سۇيەنسەك, وتكەن جىلى ءدارى-دارمەكتەردى جەتكىزۋ, ءتيىستى دەڭگەيدەن باعاسىن اسىرماۋ باعىتىندا تەكسەرىس جۇمىستارى جۇرگىزىلگەن. تەكسەرىس بارىسىندا وبلىس ورتالىعىندا باعانى بەلگىلەنگەن شەكتەن نەگىزسىز وسىرگەن ءبىر ءدارىحانا انىقتالىپ, 1 856 815 تەڭگە كولەمىندە اكىم­شىلىك ايىپپۇل سالىندى. فارماتسەۆتيكالىق نارىققا با­قىلاۋ جۇرگىزۋ جۇمىسى ءالى دە جالعاسا بەرەدى.

اقمولا وبلىسى