Air Astana اۋە كومپانياسى ءباسپاسوز قىزمەتى قازاقستان رەسپۋبليكاسىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ شەشىمىنە سايكەس, 2022 جىلدىڭ 15 قاڭتارىنان باستاپ قازاقستانعا كىرۋدىڭ جاڭا ەرەجەلەرى ەنگىزىلەتىنىن مالىمدەدى, دەپ حابارلايدى Egemen.kz.
قۇجاتقا سايكەس, قازاقستانعا شەتەلدەن ۇشىپ كەلەتىن بارلىق جولاۋشىلار (سونىڭ ىشىندە ۆاكتسينا العاندار) COVID-19-عا تەرىس ناتيجەسىن كورسەتەتىن پتر انىقتاماسىن ۇسىنۋى ءتيىس.
انىقتاما ماتەريال سىناماسى الىنعان كۇننەن باستاپ قازاقستان رەسپۋبليكاسىنىڭ شەكاراسىنان وتكەن ساتكە دەيىن 72 ساعات بويى جارامدى بولىپ سانالادى جانە اعىلشىن, ورىس نەمەسە قازاق تىلىندە جازىلعان بەرىلۋى ءتيىس.
اتالعان انىقتاما بەس جاسقا تولماعان بالالارعا عانا بەرىلمەيدى. COVID-19-عا پتر سىناماسىنىڭ تەرىس ناتيجەسى بولماعان جاعدايدا جولاۋشىلار, سونىڭ ىشىندە قازاقستان ازاماتتارى جانە قازاقستان اۋماعىندا تۇرۋعا ىقتيارحاتى بار ادامدار ۇشۋ اۋەجايىنان بورتقا جىبەرىلمەيدى.