الماتىدا ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەر ۇجىمدىق بىتىمگەرشىلىك كۇشتەرىنىڭ اسكەري قىزمەتشىلەرىن شىعارىپ سالدى, دەپ حابارلايدى Egemen.kz.
ۇجىمدىق بىتىمگەرشىلىك كۇشتەرىنىڭ اسكەري قىزمەتشىلەرىن ەلدەرىنە شىعارىپ سالۋ ءراسىمى ءبىر مينۋتتىق ۇنسىزدىكپەن باستالدى. كەڭەس وداعىنىڭ باتىرى, حالىق قاھارمانى, ارميا گەنەرالى ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ ساپتىق الاڭىندا وتكەن بىتىمگەرشىلىك كونتينگەنتتەردى شىعارىپ سالۋ راسىمىنە ۇقشۇ-نىڭ باس حاتشىسى ستانيسلاۆ زاس, قازاقستان رەسپۋبليكاسى قورعانىس ءمينيسترىنىڭ ورىنباسارى گەنەرال-مايور مۇحامەدجان تالاسوۆ, الماتى قالاسىنىڭ اكىمى باقىتجان ساعىنتاەۆ قاتىستى.
ۇقشۇ ۇجىمدىق بىتىمگەرشىلىك كۇشتەرى توبىنىڭ قولباسشىسى گەنەرال-پولكوۆنيك اناتولي سەرديۋكوۆ بارلىق جەكە قۇرامعا باتىل شەشىمدەرى مەن اسكەري بورىشىن ءمىنسىز ورىنداعاندارى ءۇشىن العىس ايتتى.
سونىمەن قاتار, قولباسشى قازاقستان قورعانىس مينيسترلىگىنىڭ باسشىلىعىنا كوپۇلتتى بىتىمگەرشىلىك كونتينگەنتىنىڭ تۇرمىس-تىرشىلىگىن قامتاماسىز ەتۋ ماسەلەلەرىن شەشۋگە كومەكتەسكەنى ءۇشىن ريزاشىلىعىن ءبىلدىردى.
قازاقستان رەسپۋبليكاسى قورعانىس ءمينيسترىنىڭ ورىنباسارى گەنەرال-مايور مۇحامەدجان تالاسوۆ قارۋلى كۇشتەردىڭ جوعارعى باس قولباسشىسى – ەل پرەزيدەنتى قاسىم-جومارت كەمەل ۇلى توقاەۆ ۇيىمعا مۇشە مەملەكەتتەردىڭ باسشىلارىنا ەلدەگى جاعدايدى تۇراقتاندىرۋعا جاردەمدەسۋ ءۇشىن بىرىككەن بىتىمگەرشىلىك كونتينگەنتىن ەنگىزۋ تۋرالى ءوتىنىش جاساعانىن اتاپ ءوتتى.
«سىزدەر ستراتەگيالىق جانە باسقا دا ماڭىزى بار نىسانداردى كۇزەتۋدى قامتاماسىز ەتتىڭىزىدەر. بىتىمگەرشىلىك كونتينگەنت كەلىپ قازاقستاندىق اسكەري قىزمەتشىلەر, ىشكى ىستەر قىزمەتكەرلەرى سودىرلاردى ىزدەستىرۋ جانە ۇستاۋ بويىنشا وزدەرىنىڭ تىكەلەي مىندەتتەرىنە كىرىسە الدى», دەدى مۇحامەدجان تالاسوۆ.
قازاقستان قورعانىس ءمينيسترىنىڭ اتىنان ۇجىمدىق بىتىمگەرشىلىك كۇشتەرى كونتينگەنتىنىڭ اسكەري قىزمەتشىلەرىنە العىس ءبىلدىرىلدى. بىرقاتار بىتىمگەرلەر قر قورعانىس ءمينيسترىنىڭ بۇيرىعىمەن «حالىقارالىق ىنتىماقتاستىققا قوسقان ۇلەسى ءۇشىن» مەدالدارىمەن جانە گراموتالارمەن ماراپاتتالدى. ۇجىمدىق قاۋىپسىزدىك كەڭەسىنىڭ شەشىمىنە سايكەس ۇقشۇ ۇجىمدىق بىتىمگەرشىلىك كۇشتەرى قازاقستان رەسپۋبليكاسىندا مەملەكەتتىك, اسكەري جانە الەۋمەتتىك ماڭىزى بار نىسانداردى كۇزەتۋ جونىندەگى مىندەتتەردى ورىندادى. دوستىق جانە اسكەري ىنتىماقتاستىق قاعيداتتارىن باسشىلىققا الا وتىرىپ, كونستيتۋتسيالىق ءتارتىپتى قالپىنا كەلتىرۋ بويىنشا باۋىرلاستىق كومەك رەتىندە ارمەنيا رەسپۋبليكاسى, بەلارۋس رەسپۋبليكاسى, قىرعىزستان رەسپۋبليكاسى, رەسەي فەدەراتسياسى مەن تاجىكستان رەسپۋبليكاسى ەل اۋماعىنا 2 030 ادام مەن 250 بىرلىك اسكەري تەحنيكاسىن جىبەردى.
ۇيىم بويىنشا وداقتاستار تەرروريستىك شابۋىل كەزىندە قازاقستانعا قولداۋ جانە ۋاقتىلى كومەك كورسەتتى. بىتىمگەرلەردىڭ ماڭىزدى نىسانداردى كۇزەتكە الۋى قارۋلى كۇشتەردىڭ, قۇقىق قورعاۋ ورگاندارىنىڭ كۇشتەرى مەن قۇرالدارىنىڭ ەداۋىر بولىگىن بوساتۋعا جانە ولاردى تەرروريستەرگە قارسى كۇرەسكە جىبەرۋگە مۇمكىندىك بەردى. وسىنداي جاعدايدا ۇجىمدىق قاۋىپسىزدىك تۋرالى شارت ۇيىمىنىڭ تيىمدىلىگى ايقىن كورىندى.