قازاقستان مەن رەسەي اۋسىلعا سەزىمتال جانۋارلار مەن ولاردان الىناتىن ونىمدەر مەن شيكىزاتتى تاسىمالداۋعا ۋاقىتشا شەكتەۋ قويدى, دەپ حابارلايدى Egemen.kz.
قر اۋىل شارۋاشىلىعى مينيسترلىگى رەسەي فەدەراتسياسى ورىنبور وبلىسىنىڭ بەلياەۆ اۋدانىندا اۋسىل اۋرۋىنىڭ تىركەلۋىنىڭ ناتيجەسىنە وراي 31 جەلوقسان 2021 جىلى قر اشم ۆەتەريناريالىق باقىلاۋ جانە قاداعالاۋ كوميتەتى اۋسىلعا سەزىمتال جانۋارلاردى, جانۋارلاردان الىناتىن ونىمدەر مەن شيكىزاتتى قازاقستان رەسپۋبليكاسىنا اكەلۋگە جانە ورىنبور وبلىسىنان ترانزيتكە ۋاقىتشا شەكتەۋلەر ەنگىزگەنىن حابارلايدى.
سونىمەن بىرگە, رەسەي فەدەراتسياسىنىڭ ۆەتەرينارلىق جانە فيتوسانيتارلىق قاداعالاۋ جونىندەگى فەدەرالدىق قىزمەتى 2022 جىلعى 12 قاڭتاردان باستاپ ساقتىق قاعيداتىنا بايلانىستى قازاقستان رەسپۋبليكاسىنىڭ اۋماعىنان تەرميالىق وڭدەۋدەن وتكەن تاۋارلاردى قوسپاعاندا, اۋسىلعا سەزىمتال ءتىرى جانۋارلاردى, جانۋارلاردان الىناتىن ونىمدەردى, شيكىزاتتى جانە ازىقتاردى رەسەي فەدەراتسياسىنا اكەلۋگە ۋاقىتشا شەكتەۋلەر ەنگىزدى.
رەسەي فەدەراتسياسىندا تىركەلگەن اۋسىل وشاعىنىڭ مەملەكەتتىك شەكاراعا تىكەلەي جاقىندىعىن ەسكەرە وتىرىپ, مينيسترلىك شەكارا ماڭىنداعى اۋماقتا ەپيزووتيالىق مونيتورينگ جۇرگىزۋ ءۇشىن جۇمىس توبىن قۇردى.
وڭىرلەردەگى جۇمىس توبى ۆەتەريناريا بويىنشا ۇلتتىق رەفەرەنتتىك ورتالىقتا كەيىنگى زەرتحانالىق زەرتتەۋلەر ءۇشىن سىنامالار ىرىكتەۋدى جۇرگىزەدى.
قر ۆەتەريناريالىق قىزمەتى جۇرگىزگەن جۇمىستىڭ قورىتىندىسى مەن ناتيجەلەرى بويىنشا ءتيىستى شارالار قابىلداناتىن بولادى.