قازاقستان پرەزيدەنتىنىڭ ءماجىلىس وتىرىسىندا سويلەگەن ءسوزى تاريحي ءسوز بولدى دەپ ەسەپتەيمىن. بارلىق ەل ومىرىندەگى وزەكتى ماسەلەلەر ورتاعا سالىندى, اشىق ايتىلدى.
سونىڭ ىشىندە ەلدىڭ دامۋىنا نەگىزگى وزەك بولاتىن ەكونوميكالىق ساياسات, ونىڭ ىشىندە ونەركاسىپتى, وڭدەۋ ونەركاسىبىن, تاۋ-كەن ونەركاسىبىن, اۋىل شارۋاشىلىعىن دامىتۋ, اۋىل شارۋاشىلىعىن سۋبسيديالاۋ ماسەلەلەرى, سونىمەن بىرگە حالىقتىڭ ەڭ قينالعان ماسەلەسىنىڭ ءبىرى – ينفلياتسيانى, ياعني باعانىڭ شارىقتاۋىن اۋىزدىقتاۋ ماسەلەسىنە بايلانىستى, ءبىلىم ساپاسىن ارتتىرۋعا قاتىستى, حالىقتى تولعاندىرىپ وتىرعان دەنساۋلىق ماسەلەسى, الەۋمەتتىك جاعدايى دەگەن ماسەلەلەردىڭ بارلىعى دا ورتاعا ايتىلدى, ساراپقا سالىنعان ساليقالى ءسوز بولدى دەپ باعالاۋعا بولادى.
بۇل ءبىزدىڭ جاڭا كەزەڭگە كوشكەنىمىزدى بىلدىرەتىن مالىمدەمە, حالىقتىڭ جاعدايىن جاقسارتۋ. ءبىرىنشى كەزەكتە – ەلدىڭ تۇتاستىعىن قامتاماسىز ەتۋ, ساقتاۋ, ەگەمەندىكتى ساقتاۋ, وسىعان وراي, اسكەريلەردىڭ كۇشىن ارتتىرۋ, ىشكى حالىقتى, وسى ىشكى جۇمىلدىرۋ ماسەلەسى, كەشەگى قيراندىلاردى تازارتۋ, قالىپقا كەلتىرۋ, جاعدايدى رەتتەۋ, وسىلاردىڭ بارلىعى دا وتە ءبىر وزەكتى, ويلى, سالماقتى جانە وتە قاجەتتى شەشىمدەردى تاپسىردى.
ۇكىمەتكە بىرقاتار ماسەلەنى, قازىر ەكى ايدىڭ ىشىندە وسى ءتيىستى شارالاردى جۇزەگە اسىراتىنىن كەزەڭ-كەزەڭىمەن بەلگىلەپ بەردى. سوندىقتان دا حالىقتىڭ ءۇمىتى مەن سەنىمىن وياتقان, ەرتەڭگى كۇنگە دەگەن وسى سەنىمدى ورنىقتىرۋ ەڭ ءبىر باستى ماسەلە بولدى. پرەزيدەنت سوزىنەن وسىنىڭ ءبارىن اڭعاردىق. ياعني «قازاقستان حالقىنا» دەگەن ارنايى قوردىڭ قۇرىلاتىندىعى بەلگىلى بولدى. دەمەك ءبىزدىڭ بۇرىنعى كوپتەگەن وليگارحيالىق جۇيەنىڭ, جاسالعان بىلىقتاردىڭ سالدارىنان بولعاندىعى بىزگە بايان بولدى. سوندىقتان دا مىنا «سامۇرىق-قازىنا», ازاماتتاردى كوپ تولعاندىرعان «ۋتيلسبور» ماسەلەسى, سونىمەن بىرگە ءبىراز قيىندىقتارعا اپارعان باعانىڭ شەكتەن تىس شەكسىز بەتىمەن كەتۋ ماسەلەسى, ۇلتتىق بانككە 3-4 پايىز ءدالىزىن 2025 جىلعا دەيىن ساقتاۋ ماسەلەسى ايتىلدى.
تاعى ءبىر ماڭىزدى نارسە – ايماقتاردى دامىتۋ ماسەلەسىندەگى تەڭگەرىمدى ساياساتتىڭ بولماعاندىعى دا اشىق ايتىلدى. وسىعان وراي ءبىزدىڭ قازاقتىڭ ءبىلىمدى جاستارىنىڭ قاتارىن, ياعني تەحنيكالىق ءبىلىمدى مامانداردى, ينجەنەرلەردى دايارلاۋ ماسەلەسىنە ەرەكشە نازار اۋدارۋ تاپسىرىلدى. جانە باتىس ايماقتاردا جوعارى جەتەكشى وقۋ ورىندارىنىڭ بەس فيليالىن اشۋ, ونىڭ ىشىندە ەكى تەحنيكالىق باعىتتاعى جوعارى وقۋ ورىندارىنىڭ اشىلاتىندىعى بەلگىلى بولىپ جاتىر. مۇنىڭ بارلىعى دا حالىققا قۋات بەرەتىن سوزدەر دەپ ەسەپتەيمىن.
ەلدىڭ ىشكى قۋاتىنا كوپ نارسە بايلانىستى. ءبىز قيىندىقتان بىرگە شىعامىز. بىرگە ەڭسەرەمىز. ۇرپاقتارىمىزدىڭ باياندى بولاشاعىن ءبارىمىز بىرگە جاسايمىز. قازىر ازاماتتاردىڭ قازاق مەملەكەتى دەگەن ۇعىمنىڭ توڭىرەگىندە بىرلەسۋى, قازاقتىڭ اتىنا كىر كەلتىرمەۋى جونىندەگى ءبىزدىڭ ءىس-ارەكەتىمىزدىڭ سانالى, سىندارلى, سالماقتى بولۋى وتە ماڭىزدى.
نۇرتورە ءجۇسىپ,
سەناتور