قارجى ورتالىعىنىڭ قادامى نىق

احقو-نىڭ رەسمي سايتىنداعى مالىمەتكە سۇيەنسەك, بىلتىر قار­جى ورتالىعىنداعى كومپانيا­لار 7 ملرد تەڭگە سالىق تولەگەن. بۇل 2020 جىلعى كورسەتكىشتەن 32 پايىزعا كوپ. ال ورتالىقتىڭ بيۋد­جەتتىك ءوتىنىمى 2021 جىلعى 11,8 ملرد تەڭگەدەن وسى جىلى 9,9 ملرد تەڭگەگە ازايدى. دەمەك, احقو مەملەكەت باسشىسىنىڭ ءوزىن ءوزى اقتاۋ دەڭگەيىنە شىعۋ تۋرالى تاپسىرماسىن ورىنداپ جاتىر.

احقو كوروناۆيرۋس پاندەمياسى كەزىندە ەل ەكونوميكاسىنا ينۆەس­تيتسيا تارتۋدىڭ بىردەن-ءبىر ءتيىمدى قۇرالى بولعانىن جاق­سى بىلەمىز. بۇل رەتتە احقو قۇ­رىل­عاننان بەرى ورتالىق ارقى­لى 6 ملرد دوللار ينۆەستيتسيا تارتىلعان. ونىڭ 4,3 ملرد دوللارى – تىكەلەي ينۆەستيتسيا, 1,7 ملرد دوللارى – پورتفەلدى ينۆەس­تيتسيا.

AIX بيرجاسى ارقىلى تار­تىلعان ۇلەسكەرلىك كاپيتال كولەمى 321 ملن دوللارعا, قارىز كاپيتالى 1,4 ملرد دوللارعا تەڭ. AIX بير­جاسىنداعى ساۋدا كولەمى 298,5 ملن دوللاردى قۇرادى. 2020 جىلمەن سالىستىرعاندا كورسەتكىش 5 ەسە جوعارى. قازاقستانمەن بايلانىسى بار كومپانيالاردىڭ نارىقتىق كاپيتالداندىرىلۋى ءۇشىن AIX Qazaq Index (AIXQI) اشىلعانىن اتاپ وتكەن ءجون.

احقو كوممەرتسيالىق جانە ازاماتتىق داۋلاردى شەشۋگە ارنالعان بەدەلدى ءھام ءتيىمدى الاڭ تۇرعىسىنان دا تانىلىپ ۇل­گەردى. شەشىلگەن داۋلاردىڭ جال­پى سانى – 898. ونىڭ ىشىندە 20 ءىس احقو سوتى ارقىلى, 878 ءىس حالىقارالىق تورەلىك ورتالىعى ارقىلى شەشىلگەن.

قارجى ورتالىعى اكتيۆتەردى باسقارۋ تۇرعىسىنان الەمدىك ءىرى كوم­پانيالاردى تارتۋدا. ما­سەلەن, بۇگىندە مۇندا 24 ينۆەس­تيتسيالىق كومپانيا مەن 6 ينۆەس­تي­تسيالىق قور تىركەلگەن. باس­قا­رۋداعى اكتيۆتەردىڭ (AUM) جال­پى قۇنى 736 ملن دوللارعا, كون­­سۋلتاتسياداعى اكتيۆتەردىڭ (AUA) كو­لەمى 1,26 ملرد دوللارعا تەڭ.

ورتالىق بولشەك ينۆەستيتسيالاۋدى دامىتۋعا دا ايتارلىقتاي ۇلەس قوسىپ جاتىر. ايتالىق, Tabys قوسىمشاسى ارقىلى بير­جا­لىق نوتالارعا سالىنعان ينۆەس­تيتسيا كولەمى 2,5 ملن دوللارعا جەتتى. قوسىمشادا 15 مىڭنان استام ەسەپشوت تىركەلگەن.

احقو ەلىمىزدىڭ مەملەكەتتىك ورگاندارىمەن بىرلەسىپ, جەمىستى ارەكەت ەتۋدە. بۇل رەتتە قارجى قىز­مەتتەرىن رەتتەۋ جونىندەگى كوميتەت, ۇلتتىق بانك جانە قارجى نا­رىعىن رەتتەۋ جانە دامىتۋ اگەنت­تىگى بىرلەسىپ دايىنداعان احقو-دا ۆاليۋتالىق رەتتەۋ جانە اق­پارات الماسۋ ەرەجەلەرىنىڭ قابىل­دانۋىن اتاپ وتۋگە بولادى.

ينۆەستورلارمەن جۇمىس ساپاسىن ارتتىرۋ ءۇشىن KAZAKH INVEST ۇلتتىق كومپانياسى مەن احقو قىزمەتكەرلەرىنەن Task Force ارنايى ورگانى قۇرىل­عانى ءمالىم. ونىڭ مىندەتى – ينۆەس­تيتسيالىق جوبالارمەن جۇ­مىس ىستەۋ, قۇرىلىمداۋدان باس­تاپ جوبانى ىسكە اسىرعانعا دەيىن قاجەتتى كومەكتى كورسەتۋ.

احقو ESG جوبالاردى ىسكە اسىرۋدا ەل ىشىندەگى جانە وڭىردەگى كوشباسشىلاردىڭ بىرىنە اينال­دى. وسى ورايدا تۇراقتى قار­جىلاندىرۋ قۇرالدارىنىڭ نا­رىعى 200 ملن دوللاردان استى.

AIX بيرجاسىندا شىعارىلعان «جاسىل» جانە الەۋمەتتىك وبلي­گا­­تسيالار كولەمى 38,4 ملرد تەڭ­گەگە تەڭ بولدى. احقو-نىڭ «جا­سىل» قار­جى ورتالىعى ار­قى­لى تار­­­تىلعان ين­ۆەس­تيتسيا كو­لەمى 67,9 ملرد تەڭگەنى قۇرادى. 2021 جىل­دىڭ قىر­­كۇيەك ايىن­دا ال­عاشقى «جاسىل» نەسيە (Halyk Bank) ماقۇلداندى. بۇدان بولەك, ۇشجىلدىق الەۋمەتتىك وب­ليگا­تسيا­لار («ەۋرازيا دامۋ بانكى») ليستينگى ءوتتى.

احقو – ستارتاپتار مەن جاڭا تەحنولوگيالاردى دامىتۋدىڭ وڭىر­­لىك ورتالىعى. بىلتىر احقو Fintech Hub دۇنيەجۇزىلىك ەكونو­ميكالىق فورۋمى ءتورتىنشى وندى­رىستىك رەۆوليۋتسياسىنىڭ اففيليرلەنگەن ورتالىعىنىڭ بەلسەندى ارالاسۋىمەن احقو Tech Hub بولىپ وزگەردى. 2021 جىل باسىنان بەرى احقو الاڭىندا اتالعان سا­لا بويىنشا قول قويىلعان ينۆەس­تيتسيالىق كەلىسىمشارتتار كولەمى 4,5 ملن دوللاردان, ۆەنچۋرلىك ينۆەستيتسيا كولەمى 7,5 ملن دوللاردان اسادى. Venture Rocket Eurasia اتتى كراۋدفاندينگ پلاتفور­ماسى اشىلدى. قازىرگى تاڭدا Okoo (قازاقستان) مەن BILLZ (وزبەكستان) ستارتاپتارى وندا فان­­درايزينگ كامپانيالارىن قۇ­رىپ جاتىر. سونىمەن قاتار احقو قاتىسۋشىسى Namba Group (قىر­­عىزستان) MOST Ventures Fund جەكە ۆەنچۋرلىك قورى­­نىڭ كومە­گىمەن 1 ملن دوللار ينۆەستيتسيا تارتقانىن اتاپ وتكەن ابزال. Mastercard پەن ينتەرنەت باس­تاما­­لاردى دامىتۋ قورى (رە­سەي) بىر­لەسىپ ەكىنشى دەڭگەيلى بانك­تەر­گە ارنالعان قارجى تەحنولو­گيا­سى اك­سەلەراتورىن اشتى. ونىڭ ال­عاشقى قاتىسۋشىلارى قا­تا­رىندا ەۋرازيالىق بانك, Altyn Bank جانە Freedom Finance Bank بار.

احقو قازاقستاندا جۇمىس ىستەپ, ءومىر سۇرەتىن شەتەلدىكتەرگە دە قىزمەت كورسەتەتىنى بەلگىلى. 2021 جىلى احقو ەكسپات ورتا­لىعى شەتەلدىك ساراپشىلار مەن ينۆەستورلارعا 15 مىڭ قىزمەت كورسەتكەن. ەكسپاتتار ءۇشىن جەكە مەنەدجەر قىزمەتى اشىلعانىن دا ايتا كەتەلىك.