اتىراۋدا 74 جىلدان بەرى كىشى بۋىن مامانداردى دايارلايتىن جوعارى مەديتسينالىق كوللەدج بار. قازىر كوللەدجدە 1 365 ستۋدەنت ءبىلىم الادى. ونىڭ ىشىندە 800-دەن استامى – اۋىلدان كەلگەن جاستار.
– كوللەدجدە ءبىلىم الاتىن ستۋدەنتتەر ءۇشىن تۇڭعىش پرەزيدەنت – ەلباسى نۇرسۇلتان نازارباەۆتىڭ «بەس الەۋمەتتىك باستاما» اتتى حالىققا ۇندەۋى مەن مەملەكەت باسشىسى ق.توقاەۆتىڭ «جاستار جىلى» شەڭبەرىندە جاستاردى قولداۋ ءىس-شارالارىن جۇزەگە اسىرۋ تۋرالى ۇكىمەتكە بەرگەن تاپسىرماسى اياسىندا جاڭا جاتاقحانا سالىندى. مەملەكەت باسشىسى بيىلعى جولداۋىندا «ۆيرۋسپەن كۇرەس كەزىندە ءدال وسى سالا ەلىمىزدىڭ باسەكەگە قابىلەتى مەن قاۋىپسىزدىگى ءۇشىن ماڭىزدى ەكەنىنە كوزىمىز جەتتى» دەپ اتاپ كورسەتكەن ەدى. قازىرگى باستى مىندەت – حالىق ساۋلىعىن قورعاۋ جانە ساپالى مەديتسينالىق قىزمەت كورسەتۋ. وسىعان وراي ءوڭىر مەديتسيناسىن دامىتۋ ماقساتىندا جۇيەلى جۇمىستار جۇرگىزىلىپ جاتىر. تاۋەلسىزدىكتىڭ 30 جىلىندا 65 دەنساۋلىق ساقتاۋ نىسانى قولدانىسقا بەرىلدى. قازىر وبلىستا مەديتسينالىق تەحنيكامەن جابدىقتالۋ كورسەتكىشى 91 پايىزدى قۇرايدى, – دەيدى وبلىس اكىمى ماحامبەت دوسمۇحامبەتوۆ.
كوپبەيىندى جوعارى كوللەدجدىڭ جاڭا جاتاقحاناسى زاماناۋي قۇرال-جابدىقتارمەن قامتىلدى. مۇندا ەم قابىلداۋ, وقشاۋلاۋ, العاشقى مەديتسينالىق كومەك كورسەتۋ, ءوزىن-ءوزى دايىنداۋ بولمەلەرى, سونداي-اق باسسەين, فيتنەس, وقۋ, ءماجىلىس زالدارى, اسحانا بار. جاتاقحانانىڭ ءار قاباتىندا دەمالۋ, كىر جۋ بولمەلەرى قاراستىرىلعان.
اتىراۋ وبلىسى