وسىدان ون-جيىرما جىل بۇرىن ۇيىرمە تاپپاي سابىلعان ءجاسوسپىرىم كوپ-تۇعىن. اسىرەسە اۋىلدىق جەردە. ال بۇگىندە ءار بالانىڭ ىڭعايىنا قاراي ۇيىرمەنىڭ ءتۇرى كوپ.
ولاردىڭ 86 ءتۇرى ءبىلىم بەرۋ جۇيەسىندە بولسا, 27 ۇيىرمە مادەنيەت پەن سپورتقا باعىتتالعان. ۇيىرمەگە, سەكتسيالارعا 176 660 بالا قاتىسادى. مامانداردىڭ ايتۋىنشا, قوسىمشا ءبىلىم بەرۋ ۇيىمدارىندا جانە جالپى ءبىلىم بەرەتىن مەكتەپتەردە شىعارماشىلىق ۇيىرمەلەردىڭ, سپورت سەكتسيالاردىڭ سانى ارتىپ كەلەدى.
ەسەپ-قيساپقا جۇگىنسەك, شىعىس قازاقستان وبلىسىندا 4-17 جاس ارالىعىنداعى 250 117 بالا بار. 2021 جىلدىڭ باسىنان مادەنيەت سالاسى بويىنشا تەگىن نەگىزدە 11 623 بالانى قامتيتىن 739 ۇيىرمە جۇمىس ىستەيدى. 2021 جىلعى 1 مامىردان باستاپ كەيبىر زاڭنامالىق اكتىلەردە مادەنيەت, دەنە شىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ كۇشىنە ەندى. سونىمەن قاتار مەملەكەتتىك سپورتتىق جانە شىعارماشىلىق تاپسىرىستاردى ىسكە اسىرۋعا باعىتتالعان ءتيىستى نورماتيۆتىك-قۇقىقتىق اكتىلەر قابىلداندى.
مەملەكەتتىك سپورتتىق جانە شىعارماشىلىق تاپسىرىس بويىنشا قارجىلاندىرۋ جوباسى 4 جاستان 18 جاسقا دەيىنگى بالالار مەن جاسوسپىرىمدەردىڭ شىعارماشىلىق الەۋەتىن دامىتۋ جانە سالاماتتى ءومىر سالتىن قالىپتاستىرۋ ءۇشىن جاعداي جاساۋعا باعىتتالعانى بەلگىلى. بيىل شىعىس قازاقستان وبلىسىنىڭ مادەنيەت باسقارماسىنا مەملەكەتتىك شىعارماشىلىق تاپسىرىستى ىسكە اسىرۋعا 125,2 ملن تەڭگە قاراجات ءبولىندى.
بيىلدىڭ سوڭعى مالىمەتىنە سۇيەنسەك, artsport.edu.kz پلاتفورماسىندا جەكە ۇيىمداردان 551 ءوتىنىم تىركەلىپ, وپەراتورلار شىعارماشىلىق ۇيىرمەلەردىڭ 33 ءتۇرى بويىنشا 146 ءوتىنىمدى ماقۇلدادى. ىسكە قوسىلعان ۆاۋچەرلەردىڭ سانى – 5 552. ولار ءوز جۇمىستارىن جوسپار بويىنشا دوڭگەلەتىپ وتىر. كورسەتىلگەن قىزمەت اكتىلەرىنە, ساباققا قاتىسۋدى ەسەپكە الۋ تابەلىنە, ەلەكتروندىق ەسەپشوت دەرەكتەرىنە سايكەس ۇيىرمەلەرگە قاتىساتىندار سانى 4 563 بالانى قۇرايدى. جالپى العاندا, مەملەكەتتىك سپورتتىق جانە شىعارماشىلىق تاپسىرىستىڭ جان باسىنا شاققانداعى قارجىلاندىرۋ جوباسى ىسكە قوسىلعالى وبلىس بويىنشا مادەنيەت سالاسىندا 16 186 ادامدى قامتيتىن 885 ۇيىرمە تەگىن جۇمىس ىستەپ كەلەدى. اتاپ ايتساق, ۇلتتىق, زاماناۋي بيلەر, حورەوگرافيالىق انسامبل, ۆيزاج, گريم, بالەت, شەشەندىك ونەر, اكتەرلىك ونەر, سۋرەت سالۋ, قاعازبەن مودەلدەۋ-وريگامي, دومبىرا, كوركەم وقۋ, ەسترادالىق ۆوكال, كلاۆيشالىق اسپاپتار, گيتارامەن ءان ايتۋ, حالىق ءانى, سوقپالى اسپاپتار, بال بيلەرى, اعاش ويۋ, كەراميكا جانە ءمۇسىن, پوەزيا-پروزا, ءپىشۋ جانە تىگۋ, حالىق اسپاپتارى, ساحنالىق سويلەۋ سىندى ۇيىرمەلەر جۇزەگە اسىپ جاتىر.
– بۇل ءبىر ءتيىمدى جوبا بولدى. ۇيىرمەنىڭ ۇيرەتەرى كوپ. ونەرگە, سپورتقا يكەمى بار بالالار ءۇشىن عانا ەمەس, جالپى جاسوسپىرىمدەر ءۇشىن وتە ءتيىمدى. «بۇلاق كورىپ كوزىن اشاتىن» بىزدەي ۇستازدارعا دا شابىت سىيلاعانداي كورىنەدى. ەڭ باستىسى, اتا-انانىڭ قالتاسىنا سالماق تۇسپەيدى, – دەيدى وسكەمەندە بەينەلەۋ ونەرىنەن ۇيىرمە اشىپ وتىرعان كاسىبي سۋرەتشى قۇداش نۇرسادىقوۆ.
سونىمەن قاتار جالپى ءبىلىم بەرەتىن مەكتەپتەردە 4 386 ۇيىرمە جۇمىس ىستەسە, قوسىمشا ءبىلىم بەرۋ ۇيىمدارىنداعى ۇيىرمەلەر سانى – 717. بۇعان قوسا 2021 جىلى مەملەكەتتىك سپورتتىق تاپسىرىستىڭ نورماتيۆتىك قارجىلاندىرۋ باعدارلاماسىن ىسكە اسىرۋ ءۇشىن وبلىستىق بيۋدجەتتەن 287,9 ملن تەڭگە ءبولىندى. وسى كەزەڭدە جەتكىزۋشىلەر سپورتتىڭ 23 ءتۇرى بويىنشا 136 ءوتىنىم بەردى. تىزەر بولساق, پاۋەرليفتينگ, سپورتتىق گيمناستيكا, سپورتتىق بي, مانەرلەپ سىرعاناۋ, كلاسسيكالىق ۆولەيبول, دزيۋدو, شاڭعى جارىسى, كوركەم گيمناستيكا, ءجۇزۋ, تاەكۆوندو, شاحمات, فۋتبول, بوكس, شاعىن-فۋتبول, ۇستەل تەننيسى, كاراتە, ەركىن كۇرەس, قازاق كۇرەسى, باسكەتبول سىندى سپورت تۇرلەرى. ونىڭ ىشىندە 85 ءوتىنىمدى كوميسسيا ماقۇلداپ, بارلىعى 5 376 ۆاۋچەرگە بەرىلدى. ونىڭ 5 261-ءى ىسكە قوسىلىپ, 292 سەكتسيا اشىلدى. ال وبلىستىڭ جالپى ءبىلىم بەرەتىن مەكتەپتەرىندە بۇقارالىق سپورت تۇرلەرى بويىنشا قوسىمشا 1 268 تەگىن سپورت سەكتسيالارى اشىلدى. قازىرگى ۋاقىتتا وبلىستا سپورتتىڭ ءارتۇرى بويىنشا 6 669 تەگىن سپورت سەكتسياسى جۇمىس ىستەيدى, ونىڭ ىشىندە جالپى ءبىلىم بەرۋ مەكەمەلەرىندە 4 190 سپورت سەكتسياسى, سپورت مەكتەپتەرىندە 2 479 سپورت بولىمشەسى بار. سوعان قاراي سپورتقا قىزىعۋشىلىق تانىتقان جاستاردىڭ سانى دا ارتتى. قوسىمشا سپورت سەكتسيالارىن اشۋعا 2021 جىلى جەرگىلىكتى بيۋدجەتتەن 200 ملن تەڭگە بولىنسە, دەنە شىنىقتىرۋ مۇعالىمدەرىنە رەسپۋبليكالىق بيۋدجەتتەن 552 ملن تەڭگە ءبولىنىپ, سپورت سەكتسيالارىن جۇرگىزگەنى ءۇشىن قوسىمشا ەڭبەكاقى تولەۋ كوزدەلگەن. مۇنداي اۋقىمدى جوبانىڭ جۇزەگە اسىپ جاتقانىنا اتا-انالار دا قۋانىشتى.
– پرەزيدەنت جولداۋىندا بالالاردىڭ ۇيىرمەسىنە ءمان بەرۋ كەرەكتىگى جونىندە ايتقانى جاقسى ەستە قالىپتى. مىنە, جۇزەگە اسىپ جاتىر. ۇلىم كۇرەسكە بارىپ ءجۇر. تەگىن. از ۋاقىتتىڭ ىشىندە شيراپ, شىنىعىپ قالدى, – دەيدى اينۇر مۇقىشەۆا ەسىمدى اتا-انا.
جوعارىدا اتاپ وتكەندەي, قوسىمشا ءبىلىم بەرۋ ۇيىمدارى دا كەڭەيىپ, وقۋشىلار ءۇشىن جاڭا ءبىلىم كوكجيەگى اشىلىپ جاتىر. ماسەلەن, وسكەمەندەگى «جاس تەحنيكتەر ستانساسى» بازاسىندا 2020 جىلى 785 وقۋشىنى قامتيتىن «زەرەك» كرەاتيۆتى ءبىلىم بەرۋ ورتالىعى اشىلدى. قازىرگى ۋاقىتتا ورتالىقتا 3D پرينتەرلەرمەن جابدىقتالعان 3D زەرتحانا, STEAM زەرتحانا, كومپيۋتەرلىك گرافيكا, نانو جانە نەيروتەحنولوگيالاردى قولدانا وتىرىپ, ARDUINO روبوتتارىمەن روبوتتەحنيكا كابينەتى جۇمىس ىستەيدى. ودان بولەك, قالاداعى «سەمەي: عىلىمي-پراكتيكالىق ءبىلىم جانە تۋريزم ورتالىعى» كمم جالپى سانى 402 وقۋشىعا قوسىمشا ءبىلىم بەرەدى.
ەڭبەك نارىعىنىڭ قاجەتتىلىكتەرىن ەسكەرە وتىرىپ, تەحنيكالىق جانە كاسىپتىك, ورتا بىلىمنەن كەيىنگى, جوعارى جانە جوعارى وقۋ ورنىنان كەيىنگى ءبىلىمى بار كادرلاردى دايارلاۋعا, جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ دايىندىق بولىمشەلەرىنە, سونداي-اق مەكتەپكە دەيىنگى تاربيە مەن وقىتۋعا ورنالاستىرۋ قاعيدالارىن بەكىتۋ تۋرالى ءبىلىم جانە عىلىم ءمينيسترىنىڭ 2016 جىلعى 29 قاڭتارداعى №122 بۇيرىعىن ىسكە اسىرۋ ماقساتىندا, شىعىس قازاقستان وبلىسىنىڭ ءبىلىم باسقارماسى بالالاردى قوسىمشا بىلىممەن قامتۋدى ۇلعايتۋ ءۇشىن ءبىلىم بەرۋ جۇيەسىندە 5 200 ورىنعا مەملەكەتتىك ءبىلىم بەرۋ تاپسىرىسىن ورنالاستىرۋدى جوسپارلاپ وتىر. بارلىعى ۇيىرمەنىڭ 24 ءتۇرى بويىنشا 348 جاڭا ۇيىرمە اشىلادى. ول كوركەم-ەستەتيكالىق, ساندىك-قولدانبالى, عىلىمي-تەحنيكالىق, تۋريستىك-ولكەتانۋ, ەكولوگيا-بيولوگيالىق جانە سپورتتىق باعىتتارعا بولىنەدى. ءار ۇيىرمەگە جۇمسالاتىن شىعىندى ەسكەرە وتىرىپ, 2022 جىلى 650 ملن تەڭگە ءبولۋ جوسپارلانعان.
ساراپتاپ, سارالاپ قاراساق, مەملەكەت حالىقتىڭ بولاشاعى ءۇشىن از شارۋا اتقارىپ جاتقان جوق. تەك جەرگىلىكتى جەردە سوڭىن جىڭىشكەرتىپ الماي جۇزەگە اسىرسا بولعانى. ۇيرەتەرى كوپ ۇيىرمەلەر كوپتەپ اشىلىپ جاتسا دا, ارتىقتىق ەتپەيدى. «بىلسەم, كورسەم, ۇيرەنسەم» دەپ جۇرگەن جاس كوپ.