ءتىل ساياساتى كوميتەتى ش.شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعىندا «قازاق ءتىلى ۇلتتىق كورپۋسى پۋبليتسيستيكالىق ماتىندەر كىشى كورپۋسىنىڭ» تۇساۋكەسەر ءراسىمى ءوتتى.
ەلىمىزدە قابىلدانعان «ۇلتتىق رۋحاني جاڭعىرۋ» ۇلتتىق جوباسىنىڭ قۇرامىندا ءتىل ساياساتىن ىسكە اسىرۋدى كوزدەيتىن ارناۋلى باعىتتىڭ ءبىرى – قازاق ءتىلى ۇلتتىق كورپۋسىنىڭ پۋبليتسيستيكالىق ماتىندەر كىشى كورپۋسى. لينگۆيستيكالىق كورپۋس – تىلدىك قۇبىلىستاردى (اسىرەسە ءسوز, فرازالاردى) ىزدەۋدى جەڭىلدەتەتىن بەلگىلى ءبىر تىلدەگى جازباشا جانە اۋىزشا ماتىندەردىڭ ەلەكتروندى تۇردە جيناقتالعان اقپاراتتىق-انىقتامالىق بازاسى. ول ىزدەۋ ناتيجەسىن تابيعي كونتەكستە كورسەتەدى.
كورپۋستىڭ تۇساۋكەسەر ءراسىمىن ءتىل ساياساتى كوميتەتىنىڭ توراعاسى ادىلبەك قابا اشتى. ول ءوز سوزىندە «الداعى ۋاقىتتا قازاق ءتىلى ۇلتتىق كورپۋسى ماتىندىك بازاسىنىڭ كولەمىن ارتتىرامىز. كورپۋس – دەگەنىمىز بەلگىلى ءبىر تىلدەگى ماتىندەردىڭ ەلەكتروندى تۇردە جيناقتالۋىنا نەگىزدەلگەن اقپاراتتىق-انىقتامالىق جۇيە. ۇلتتىق كورپۋستار ءتىلدى انا ءتىلى نەمەسە شەت ءتىلى رەتىندە ۇيرەتۋ ءۇشىن دە ماڭىزدى», دەدى ءا.قابا.
تانىستىرىلىم بارىسىندا جوبا جەتەكشىسى فيلولوگيا عىلىمدارىنىڭ كانديداتى, قاۋىمداستىرىلعان پروفەسسور نۇرلىحان ايتوۆا: «الەمدە وقۋلىقتار مەن وقۋ باعدارلامالارى قازىر كورپۋسقا باعىتتالعان. كەز كەلگەن شەتەلدىك, مەكتەپ وقۋشىسى, مۇعالىم, جۋرناليست, رەداكتور جانە جازۋشى كورپۋستى قولدانا وتىرىپ, بەيتانىس ءسوزدى نەمەسە گرامماتيكالىق فورمانىڭ قولدانۋ ەرەكشەلىكتەرىن تەز جانە ءتيىمدى تەكسەرە الادى. ۇلتتىق كورپۋس الدىمەن ءتىلدىڭ لەكسيكاسى مەن گرامماتيكاسىن, ونداعى جۇزدەگەن جىلدار بويى بولعان وزگەرىستەردى عىلىمي زەرتتەۋ ءۇشىن قاجەت. قازىرگى تەحنولوگيالىق دامۋدىڭ ارقاسىندا اقپاراتتى ىزدەۋدى وڭتايلاندىردى», دەپ ءسوزىن تۇيىندەدى.
اتالمىش جوبانى ءتىل ساياساتى كوميتەتىنىڭ مەملەكەتتىك تاپسىرماسىمەن «شايسۇلتان شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعى ازىرلەدى.
جوبا جەتەكشىسى – فيلولوگيا عىلىمدارىنىڭ كانديداتى, قاۋىمداستىرىلعان پروفەسسور نۇرلىحان ايتوۆا, ءىت جابدىقتاۋ بويىنشا جەتەكشىسى – ءمولدىر باقىتقىزى. جوبا جۇمىسىنا ا.بايتۇرسىن ۇلى اتىنداعى ءتىل ءبىلىمى ينستيتۋتى, ءال-فارابي اتىنداعى قازاق ۇلتتىق ۋنيۆەرسيتەتى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, نازارباەۆ ۋنيۆەرسيتەت, قازاق ۇلتتىق قىزدار پەداگوگيكالىق ۋنيۆەرسيتەتى, ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى, ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى, بايىشەۆ ۋنيۆەرسيتەتى, Minialgo جشس, «Qazkitap باسپاسى» جشس-ى ماماندارى قاتىستى.
ۇلتتىق كورپۋس – قازاق ءتىلىنىڭ ءبىر جۇيەگە توعىستىرىلعان بارشا تىلدىك ماتەريالدارىنىڭ بازاسى بولۋىمەن بىرگە مەملەكەتتىك ءتىلدىڭ ۆيرتۋالدى كەڭىستىكتەگى قولدانىسىن, سەمانتيكالىق كەڭىستىگىن كەڭەيتۋدىڭ, اقپاراتتىق تارالىمىن ارتتىرۋدىڭ, تىلدىك رەسۋرستى جاپپاي قولجەتىمدى ەتۋدىڭ تەتىگى.
تسيفرلاندىرىلعان جۇيە تۇرىندەگى قازاق تىلدەگى ماتىندەر بازاسى – ۇلتتىق ءتىلىمىزدىڭ ءومىر ءسۇرۋىنىڭ بەلگىلى ءبىر كەزەڭىندە ادەبي ءتىل ستيلدەرىنىڭ, تىلدىك قولدانىستاردىڭ بارلىق تۇرلەرىن جيناقتاپ, تۇتىنۋشىلارعا جەتكىزۋشى اقپاراتتىق-انىقتامالىق اشىق جۇيە.
«اتالمىش كورپۋستىڭ ورىس, اعىلشىن تىلدەرىندە جۇمىس جاساۋى وزگە ۇلت وكىلدەرىنىڭ قولدانۋىنا ۇلكەن مۇمكىندىك بەرەدى. بۇل ەرەكشە اتاپ وتەتىن جەتىستىك. سونىمەن قاتار ديزاينى ناقتى, تۇسىنىكتى, كورپۋس ستاندارتتارىنا ساي جانە نۇسقاۋلىعى جوعارى دەڭگەيدە جاسالعان. مەنىڭشە ءموبيلدى نۇسقاسى ىسكە قوسىلسا, تۇتىنۋشىلار ءۇشىن ءتيىمدى بولار ەدى», دەدى تاتار ءتىلىنىڭ ۇلتتىق كورپۋسىن ازىرلەۋشى مانسۋر سايحۋنوۆ.
كورپۋس تانىستىرىلىمىنا رەسەي, باشقۇرتستان, تاتارستان, قىرعىزستان عالىمدارى قاتىسىپ, جوباعا ءوز باعا, ۇسىنىستارىن ءبىلدىردى.
ءىس-شارا پىكىر الماسىپ, ۇسىنىستار بىلدىرۋمەن جالعاستى. ماماندار جاڭا جوباعا جوعارى باعا بەرىپ, ساتتىلىك تىلەدى.