«قازاقستان تەمىر جولى» قازاقستاندىقتارعا تەمىرجول كولىگى نىساندارىندا مۇقيات بولۋ كەرەكتىگىن ەسكەرتەدى, دەپ حابارلايدى Egemen.kz.
تەمىرجولدا بالالاردىڭ قاتىسۋىمەن بولاتىن قايعىلى جاعدايلار جيىلەپ كەتتى: سوڭعى ءۇش كۇندە ەكى ءجاسوسپىرىم قايتىس بولدى. ماسەلەن, 25 جەلتوقساندا تاراز ستانتسياسىندا پويىز ۆاگونىندا سەلفي جاساۋ ارەكەتى كەزىندە 15 جاسار ءجاسوسپىرىم تۇيىسپەلى سىمداعى توقتان قازا تاپتى.
وسىعان ۇقساس وقيعا 27 جەلتوقساندا الماتى ستانتسياسىنداعى قابىلداۋ-جونەلتۋ پاركىندە ورىن الدى. سەلفي جاساعان ەكى ءجاسوسپىرىم جوعارى كەرنەۋلى توق رازريادىن الدى. ولاردىڭ ءبىرى سول جەردە قايتىس بولدى.
اتالعان فاكتىلەر بويىنشا تەرگەۋ امالدارى ءجۇرىپ جاتىر. «قتج» ۇك» اق قازاقستاندىقتارعا تەمىرجول كولىگى نىساندارىندا مۇقيات بولۋدى جانە ءوز ومىرلەرىنە قاۋىپ توندىرمەۋدى سۇرايدى.
تەمىرجول كولىگى – جەكە قاۋىپسىزدىك ەرەجەلەرىن قاتاڭ ساقتاۋدى قاجەت ەتەتىن قاۋىپتى ايماق.
«جاياۋ جۇرگىنشىلەر كوپىرىن, توسەمدەردى پايدالانا وتىرىپ, جاقىنداپ كەلە جاتقان پويىزدىڭ جوقتىعىنا كوز جەتكىزىپ بارىپ, بەلگىلەنگەن ورىنداردان تەمىر جولدى كەسىپ ءوتۋ قاجەت. تەمىرجولدا, پويىز ۆاگوندارىندا فوتو جانە بەينە تۇسىرمەڭىز. جوعارى كەرنەۋلى سىمداردىڭ جانىندا, پەررونداردا, ءسۇرىنۋ وڭاي قاۋىپتى جەرلەردە سۋرەتكە تۇسۋگە قاتاڭ تىيىم سالىنادى. ەشقانداي دا كەرەمەت كادر دەنساۋلىعىڭىزعا نەمەسە ومىرىڭىزگە تاتىمايدى», دەپ ەسكەرتەدى ۇلتتىق تاسىمالداۋشى.