شىعىس قازاقستان وبلىسى گلۋبوكوە اۋدانىنىڭ اكىمى تامارا راحىمجانوۆا قاراماعىنداعى قىزمەتكەردى سىبايلاس جەمقورلىق ءۇشىن سوتتالعاننان كەيىن قىزمەتىنەن كەتتى, دەپ حابارلايدى Egemen.kz.
تامارا راحىمجانوۆا وتستاۆكاعا كەتكەنىن Instagram-داعى پاراقشاسىندا حابارلادى. سەبەبىن دە سول جەردە جازعان.
«ورىنباسارلارىمنىڭ ءبىرى سىبايلاس جەمقورلىق قىلمىسى ءۇشىن سوتتالدى. «قازاقستان رەسپۋبليكاسىنىڭ مەملەكەتتىك قىزمەتى تۋرالى» قر زاڭىنىڭ 60-بابىنا سايكەس, ەگەر تاعايىندالعان كۇننەن باستاپ ءۇش اي وتكەننەن كەيىن تىكەلەي باعىنىستىلارعا سىبايلاس جەمقورلىق قىلمىس جاسالعان جاعدايدا اۋدان اكىمى ورنىنان تۇسۋگە ءوتىنىش بەرەدى», دەيدى تامارا راحىمجانوۆا.
سونىمەن قاتار, 2021 جىلدىڭ 19 قاراشاسىندا اۋدان اكىمىنىڭ ورىنباسارىنا قاتىستى قىلمىستىق ءىس بويىنشا شقو اپەللياتسيالىق سوتىنىڭ ۇكىمى شىققانىن حابارلادى.
«سوتتىڭ ايىپتاۋ ۇكىمى زاڭدى كۇشىنە ەنگەننەن كەيىن قازاقستان رەسپۋبليكاسىنىڭ قولدانىستاعى زاڭناماسىنا سايكەس وتستاۆكاعا جازباشا ءوتىنىش بەردىم», دەدى ول.
ەسكە سالايىق, اۋدان اكىمى لاۋازىمىنا تامارا راحىمجانوۆا 2020 جىلدىڭ 18 قىركۇيەگىندە تاعايىندالدى, بۇعان دەيىن ول وسكەمەن قالاسى اكىمىنىڭ ورىنباسارى بولعان.