2021 جىلدىڭ قورىتىندىسى بويىنشا وقۋشىلارعا قوسىمشا ءبىلىم بەرۋ تۋرالى مەملەكەتتىك تاپسىرىس اياسىندا 33 737 بالا ءتۇرلى ۇيىرمە جانە سپورتتىق سەكتسياعا بارۋعا مۇمكىندىك الدى, دەپ حابارلايدى Egemen.kz.
اتالعان مالىمەتتى قر ءبىلىم جانە عىلىم مينيسترلىگىنىڭ ءباسپاسوز قىزمەتى راستاپ وتىر.
«بۇگىندە وقۋشىلاردىڭ ۇيىرمە, سپورت سەكتسياسىنا جازىلۋى مەملەكەتتىك قىزمەت رەتىندە جۇزەگە اسىرىلادى. ياعني وقۋشى مەملەكەتتىك قىزمەتتەر پورتالى ارقىلى قالاعان ۇيىرمە نەمەسە سپورتتىق سەكتسياعا جازىلا الادى.
اتالعان شارانى باسقاشا ايتقاندا وقۋشىلارعا قوسىمشا ءبىلىم بەرۋ دەۋگە بولادى. قوسىمشا ءبىلىم بەرۋ بويىنشا وقۋشىلاردى قابىلداۋ قر ءبىلىم جانە عىلىم ءمينيسترىنىڭ 2020 جىلعى 22 مامىرداعى №219 بۇيرىعىنا سايكەس جۇزەگە اسىرىلادى. وسىلايشا اتالعان بۇيرىققا سۇيەنە وتىرىپ جەرگىلىكتى اتقارۋشى ورگاندار جىل سايىن بەكىتىلگەن بيۋدجەت قاراجات كولەمىندە مەملەكەتتىك تاپسىرىستى ورىندايدى», دەلىنگەن اتالعان ۆەدومستۆونىڭ ءباسپاسوز قىزمەتى ۇسىنعان حابارلامادا.
مينيسترلىك ۇسىنعان اقپاراتقا سۇيەنسەك, قوسىمشا بىلىممەن قامتىلعان وقۋشىلاردىڭ 80,7%-ى ۇيىرمەلەر مەن سپورتتىق سەكتسيالارعا تەگىن قاتىسىپ جاتىر.
«بيىل مەملەكەتتىك ءبىلىم بەرۋ تاپسىرىسى اياسىندا 33 737-دەن استام مەكتەپ وقۋشىسى ۇيىرمە جانە سەكتسياسىمەن قامتىلدى. بۇل ماقساتقا قاراجات جەرگىلىكتى بيۋدجەتتەن بولىنەدى. بۇگىندە قوسىمشا ءبىلىم بەرۋ كونتينگەنتىنىڭ 80,7%-ى ۇيىرمەلەر مەن سپورتتىق سەكتسيالارعا تەگىن بارادى. ول دەگەنىمىز شامامەن 803 027 بالا. اۋىلداعى وقۋشىلاردا نازاردان تىس قالعان ەمەس, قازىر اۋىلدىق جەرلەردە 2 942 سەكتسيا جۇمىس ىستەپ تۇر. جوعارى اتالعان 800 مىڭنان استام وقۋشىنىڭ ىشىندە 468 401 بالا قوسىمشا ءبىلىمدى مينيسترلىككە باعانىستى ۇيىمداردان الىپ جاتىر, ال قالعانى مەملەكەتتىك تاپسىرىس اياسىندا جەكە ۇيىمداردان ءبىلىمىن سۋسىنداتۋدا», دەلىندى مينيسترلىكتەن.