الماتىداعى پەريناتولوگيا جانە بالالار كارديوحيرۋرگياسى ورتالىعىنىڭ دارىگەرلەرى 52 جاستاعى جۇكتى ايەلدى بوساندىرىپ, ەگىز بالاسىمەن امان الىپ قالدى, دەپ حابارلايدى Egemen.kz.
پەريناتولوگيا جانە بالالار كارديوحيرۋرگياسى ورتالىعىنا جۇكتىلىكتىڭ 31 اپتاسىندا باسى اينالىپ, ءىشى اۋىرىپ, قان قىسىمى جوعارىلاپ كەتكەن 52 جاستاعى ايەل ءتۇستى.
دارىگەرلەر جۇكتى ايەلگە – اۋىر پرەەكلامپسيا, جاتىر تىرتىعى دياگنوزىن قويدى. ناۋقاستا 2007 جىلى دا اۋىر پرەەكلامپسيا بولعان. ايتا كەتۋ كەرەك, ايەل ەگىزدەردى ەكو ارقىلى كوتەرگەن.
«ۋلترادىبىستىق زەرتتەۋ كەزىندە ەكىنشى ۇرىقتا جۇرەك اقاۋى انىقتالدى. سول سەبەپتى ايەل شۇعىل وپەراتسياعا الىندى. پرەەكلامپسيا اناعا دا, ۇرىققا دا قاۋىپ ءتوندىرۋى مۇمكىن ەدى. سوندىقتان, كەسار تىلىگى ارقىلى بوساندى. ناتيجەسىندە سالماعى 1,644 گرامم جانە 990 گرامم ەكى ۇل بالا دۇنيەگە كەلدى. نارەستەلەر شالا تۋعاندىقتان جانساقتاۋ بولىمىنە اۋىستىرىلىپ, ارنايى ينكۋباتوردا 10 كۇن جاتتى. وتادان كەيىن انالارىنىڭ دا جاعدايى اۋىر بولدى, ول دا بىرنەشە كۇن جانساقتاۋ بولىمىندە جاتتى. 5 كۇننەن كەيىن جاڭا بوسانعان ايەل بولىمگە اۋىستىرىلدى, سودان كەيىن بالالارىن اكەلدىك. بۇگىنگى كۇنى انا مەن بالالاردىڭ جاعدايى جاقسى. پاتولوگيا بولىمىندە جاتىر. جاڭا تۋعان نارەستەلەر سالماق قوسىپ جاتىر, قاۋىپ جوق. جاقىندا ولار ۇيىنە شىعادى», دەيدى دارىگەر بالزيا ءابىلماجىنوۆا.
ءوز كەزەگىندە ەگىزدەردىڭ اناسى دارىگەرلەرگە العىسىن ايتتى.
«اۆتوبۋستان ءتۇسىپ كەلە جاتىپ قۇلاپ قالدىم, ۇيگە كەلگەندە بۇكىل دەنەم ءىسىپ كەتتى. جاعدايىم كۇرت ناشارلادى, ءىشىم اۋىردى, قان قىسىمىم كوتەرىلىپ, باسىم اينالدى. جەدەل جاردەم شاقىردىم, ولار مەنى پەريناتولوگيا جانە بالالار كارديوحيرۋرگياسى ورتالىعىنا الىپ كەلدى. بارلىق تەكسەرۋدەن كەيىن ماعان بىردەن وتا جاسالدى. ويانسام, بالالارىمىنىڭ جانساقتاۋ بولىمىندە جاتقانىن ايتتى. ارينە, مەن ولار ءۇشىن قاتتى ۋايىمدادىم, ويتكەنى ولاردىڭ بىرەۋى وتە ءالسىز بولدى. بىراق وسى ورتالىقتىڭ رەانيماتولوگتارى, نەوناتولوگتارى جانە باسقا دا ماماندارىنىڭ كاسىبيلىگىنىڭ ارقاسىندا بالالارىم تەز ساۋىعىپ كەتتى. 10 كۇننەن كەيىن جانساقتاۋ بولىمىنەن شىقتى. قازىر بالالار سالماق قوسىپ ۇلگەردى, بىرەۋى قازىردىڭ وزىندە 2 كەلىدەن, ەكىنشىسى 1600 گراممنان اسادى. رەانيماتولوگتارعا, نەوناتولوگتارعا جانە بارلىق مەديتسينالىق قىزمەتكەرلەرگە ەرەكشە راحمەت ايتامىن», دەيدى ەگىزدەردىڭ اناسى.