قازاقستاننىڭ دەنساۋلىق ساقتاۋ ءمينيسترى مىندەتىن اتقارۋشى جاندوس بۇركىتباەۆ ءوزىنىڭ اتالعان قىزمەتكە تاعايىندالۋىنا قاتىستى پىكىر ءبىلدىردى, دەپ جازادى Egemen.kz.
«مەملەكەتتىك قىزمەتتە جۇمىس ىستەۋ - ارقاشان جاۋاپتى بولۋ. بۇل ەڭ الدىمەن وزىڭە, ارىپتەستەرىمىزگە, حالقىمىزعا دەگەن ۇلكەن جاۋاپكەرشىلىك. دەنساۋلىق ساقتاۋ مينيسترلىگىنىڭ نەگىزگى ءرولى - قازاقستان ازاماتتارىنىڭ دەنساۋلىعىن قورعاۋ. تاعايىنداۋ ەشتەڭەنى بىلدىرمەيدى, ءوز مىندەتىمدى اتقارا بەرەمىن», دەدى بۇركىتباەۆ ۇكىمەت وتىرىسىنان كەيىن.
جاندوس بۇركىتباەۆ تسويدىڭ كەتۋىنە قاتىستى مەملەكەتتىك ورگانداردىڭ ءبىرىنشى باسشىسىن تاعايىنداۋ, جۇمىستان بوساتۋ تۋرالى شەشىمدى جوعارى باسشىلىق قابىلدايتىنىن ايتتى.
«تيىسىنشە, بۇعان پىكىر ءبىلدىرۋىم ورىنسىز. مەملەكەتتىك ساياسي قىزمەتكەر رەتىندە مەن تاپسىرمالاردى ورىندايمىن, وكىلەتتىكتەر اياسىندا مىندەتتەردى ورىندايمىن. جۇمىس جوسپارلى, جۇيەلى جۇرگىزىلىپ جاتىر. سول جوسپار بويىنشا جۇيەلى ماسەلەلەرمەن اينالىسىپ جاتىرمىز», دەپ تۇيىندەدى ول.