وسكەمەن وندىرىستىك قالا. زاۋىت كوپ. زاۋىت كوپ بولعان سوڭ دا قالانى بىردە تۇمان, بىردە ءتۇتىن باسادى. ونداي كۇندەرى تۇرعىنداردى جوتەل قىسىپ, تاماقتارىن ۇستايدى. بۇگىن دە قالانىڭ ىرگەسىندەگى تيتان ماگني كومبيناتىنان شىققان قىزعىلت ءتۇتىن تۇرعىنداردى الاڭداتىپ قويدى, دەپ جازادى Egemen.kz.
تمك ماڭىنان بۋداقتاي شىققان قىزعىلت ءتۇتىننىڭ بەينەجازباسى الەۋمەتتىك جەلىلەردە تارادى. جەلى قولدانۋشىلارى «تمك تسەحىندا جارىلىس بولدى, تەرەزەنى اشپاڭىزدار, دالاعا بەتپەردەمەن شىعىڭىزدار» دەگەندەي جاناشىرلىق جازبالاردى قوسىمشا تاراتتى.
وسكەمەندە قولايسىز مەتەوجاعداي ءجيى ورىن الىپ تۇرادى. وندايدا توتەنشە جاعدايلار دەپارتامەنتى ماماندارى تۇرعىندارعا حابارلاما جىبەرىپ, ەسكەرتە-تۇعىن. بۇل جولى ەسكەرتۋى بىلاي تۇرسىن, قۇزىرلى ورگانداردان باق وكىلدەرى رەسمي جاۋاپ الا الماي ۇزاق كۇتتى. حالىقتىڭ پىكىرى سان-ساققا جۇگىردى. تاۋەلسىز ەكولوگ داۋلەت اسانوۆتىڭ ايتۋىنشا, اپات بولعان كورىنەدى.
«بەينەجازباداعى قىزعىلت تۇتىنگە قاراسام, كاسىپورىندا اپات بولعانعا ۇقسايدى. ال اۋعا تارالىپ جاتقان حلور ما دەپ بولجادىم. بىراق, رەسمي مالەمەتتى ەكولوگيا دەپارتامەنتىنەن الۋ كەرەك», دەپ ءوز بولجامىن ايتتى داۋلەت اسان ۇلى.
ءسوز سوڭىندا ەكولوگيا وسكەمەندەگى وتكىر ماسەلە ەكەنىن جانە قوستى. ءيا, وتە وزەكتى پروبلەما. وتكەن ايدا ەلىمىزدىڭ باس ونكولوگى ديليارا قايداروۆامەن سويلەسكەنىمىزدە, ءوندىرىس وشاقتارى كوپ جەردە قاتەرلى ىسىك اۋرۋى ءجيى كەزدەسەتىنىن ايتقان. شىعىستا سوڭعى ون ايدا عانا 3274 ادامنان قاتەرلى ىسىك انىقتالعان ەكەن. سونىڭ ءبارى اينالىپ كەلگەندە ەكولوگيانىڭ اسەرىنەن ەمەس پە؟!
قىزعىلت ءتۇتىننىڭ قايدان شىعىپ جاتقاندىعىن سۇراپ, وبلىستىق ەكولوگيا دەپارتامەنتىنە دە حابارلاستىق. دەپارتامەنت باسشىسىنىڭ ورىنباسارى راۋان تۇراروۆ ازىرگە ءدوپ باسىپ قانداي دا اقپارات بەرە المايتىندارىن جەتكىزدى. تيتان ماگني كومبيناتىنىڭ ءباسپاسوز قىزمەتى بولسا, رەسمي جاۋاپ ازىرلەپ جاتىرمىز دەپ قايىردى.
ەكولوگيا, گەولوگيا جانە تابيعي رەسۋرستار مينيسترلىگى ايماقتاعى اۋا قۇرامىنان الىنعان سىناما قورىتىندىسى بويىنشا حلوردىڭ مولشەرى بەكىتىلگەن نورما شەگىنەن اسقانىن ايتۋدا. سونداي-اق كەلگەن ارىز بويىنشا جوسپاردان تىس تەكسەرۋ باستالعان.