الماتى كوشەلەرىنە «اقىلدى» باعدارشامدار ورناتىلدى

قالالىق پد اكىمشىلىك پوليتسياسى حابارلاعانداي, مەگاپوليستە جول قوزعالىسىن باسقارۋدىڭ اۆتوماتتاندىرىلعان جۇيەسىن جاڭعىرتۋدىڭ, قايتا قۇرۋدىڭ جانە دامىتۋدىڭ ءبىرىنشى كەزەڭى بويىنشا جۇمىس مارەسىنە جەتتى. اتقارىلعان جۇمىس ناتيجەلەرى بويىنشا, جۇيەگە 93 باعدارشام قوسىلدى.

«بۇگىندە ۋپو عيماراتتارىن جوندەۋ جۇمىستارى اياقتالدى, قىزمەتتىك بولمە مەن دەتەكتورلىق زەرتحانا جابدىقتالدى, 93 باعدارشام نىسانىندا Euro كونتروللەرلەر ورناتىلدى. جقباج-عا 357 باعدارشامدى قوسۋ بويىنشا ەكىنشى كەزەڭدەگى جۇمىستار 2022 جىلعا جوسپارلانعان. ەكىنشى كەزەڭ اياقتالعاننان كەيىن جۇيە ناقتى ۋاقىت رەجيمىندە باعىتتار بويىنشا ناقتى قوزعالىس قارقىندىلىعىن, ستاتيستيكانى ەسەپتەۋدى جانە كولىك قوزعالىسى قارقىندىلىعىن تالداۋدى, بەيىمدەلۋ رەجيمىندە كەرى ساناق تاقتاسىنىڭ جۇمىسىن ەسكەرە وتىرىپ, قيىلىستارداعى قوزعالىستى رەتتەۋدى قامتاماسىز ەتەدى», دەپ ءتۇسىندىردى الماتى قالالىق پد اكىمشىلىك پوليتسيا باسقارماسىنىڭ باستىعى نۇرلان امانبەك.

ەكىنشى كەزەڭنىڭ ماڭىزدى كورسەتكىشتەرى:

كولىك وتكىزۋ قابىلەتىن ارتتىرۋ - 18-20%; جول ءجۇرۋ ۋاقىتىن قىسقارتۋ - 15-25%; جول بويىنداعى ايالدامالار سانىنىڭ ازايۋى - 20-40%; اتموسفەراعا شىعاتىن شىعارىندىلار كولەمىن ازايتۋ - 7%; جانارماي شىعىنىن ازايتۋ - 5-10%; قوعامدىق كولىك قوزعالىسىنىڭ كەشىگۋىن ازايتۋ - 20-60%.